Hoahy o Galatianao
5 Ty hahavy antikagne mba hanagne ze fahafahagne zay, ro nahavy i Kristy nagnafake antikagne. Mioregna soa areke, le ko magneke ho ambane fifehea i bao ty fagnandevozagney indraike.
2 Iraho Paoly ty mirehake ama’areo tie, naho tapahegne nareo, le tsy misy raha soa ndra kidikidy hoazo’areo amy i Kristy. 3 Hamafeseko ama’areo indraike tie, ze lahilahy tapahegne, le tsy maintsy magnorike ty raha rehafe i Lalànay iaby. 4 Naho inareo te hambara ho maregne noho i lalànay, le ho tafasarake amy i Kristy. Niala’areo i hasoa fagnahi’e miambakey. 5 Fa naho izahay, le noho i fagnahỳ ty mahavy anay tsy mahaligne i fampitamagne tihoey tie, hambara ho maregne noho ty finoagne. 6 Ty anto’e, tsy lahibey amy ze tafaharo amy i Kristy Jesosy ao tihoe, mitapake ndra tsy mitapake, fa tihoe manam-pinoagne iareo, sady miseho amy ty alala ty hatea zay.
7 Nilay soa nareo. Ia o nikalagne anareo mba tsy hagnorike sasa i hamaregnagneio? 8 Tsy i nikanjy anareoy o nandrese lahatse anareo hanao izaio. 9 Lalivay* kedekede avao, le fa mampitombo i kobay iaby. 10 Matoky raho fa mitovy hevetse amako miomba izay nareo, satria tafaharo amy i Tompo. Fa i magnakorontagne anareoy, ndra ia reke ndra ia, le hahazo ty fagnamelohagne fagneva aze. 11 Fa naho ty amako ry rahalahy, naho mbe mitory miomba i fanapahagney avao raho, nagnino raho ro mbe enjehegne avao? Naho izay ty nataoko, le tsy toko’e hahaboseke sasa ty fitoriako miomba i hazo fijaleagney. 12 Teako mba hovosiregne o lahilahy te hagnakorontagne anareo reo.
13 Kinanjy ho amy ty fahafahagne nareo ry rahalahy. Ao tsy hampiasae’areo mba hipaliagne hirike hagnatanterahagne ty fagniria ty nofotse ze fahafahagne zay, fa mifanompoa noho ty hatea nareo. 14 Ty anto’e, ty lily raike toy, le magnatanterake i Lalànay iaby: “Teavo manahake ty vata’o ty nama’o.” 15 Fa naho mifandrimitse naho mifandramatse avao nareo, le atahoragne hifanjamagne.
16 Fa iraho mirehake ama’areo tie, mandehana arake ty fagnahy avao, le tsy ombia hagnatanterake ty fagniria ty nofotse nareo. 17 Ty anto’e, i nofotsey le manohetse i fagnahỳ noho i fagniriagne agnate’e aoy, le i fagnahỳ manohetse i nofotsey. Mifanohetse iareo roe, amy izay nareo tsy hanao ty raha tea’areo hatao. 18 Ankoatse izay, naho tarihe i fagnahỳ nareo, le tsy ambane i lalànay.
19 Mibaribary ty asa o nofotseo. Tsy ino zay fa ty fijangajangagne, fahalotoagne, findesam-batagne tsy misy hegnatse, 20 fanompoan-tsampy, fifandrambesagne amo o demoniao, falaignagne, fifanointoignagne, fialognagne, habosehagne tsy voafehe, fifandiedieragne, fisaratsarahagne, sekta, 21 fagniriagne ty fanagna ty hafa,* hamamoagne, fete baranahigne naho ty raha manahake ireo. Fa nampitao anareo miomba o raha rehoe raho, faie le mbe mampitao anareo indraike tie, ze ndaty zatse manao o raha rehoe, le tsy handova i Fanjakàn’Andrianagnaharey.
22 Fa ty voka i fagnahỳ, le hatea, hafaleagne, fiadagnagne, faharetagne, hasoa fagnahy, hasoa toetse, finoagne, 23 fahalemem-pagnahy naho fifehezan-tegna. Tsy misy lalàna manohetse ty raha hoe ireo. 24 Ze ahy i Kristy Jesosy ka, le fa nipeke tamy i boda-kataey eo ty nofotse naho ty filagne mafe agnate’e ao vaho ty fagniria’e.
25 Naho engantika hisy heri’e amy ty fiaignantika i fagnahỳ, le andao hotohizantikagne lognandro ze fandehanantikagne arake i fagnahỳ zay. 26 Ao tika tsy hibohaboha sady tsy hanao raha hampisy fifaninanagne naho fifampialognagne.