Taratasy Faharoe Hoahy o Korintianao

9 Naho ty miomba i fanompoagne ty ndaty masigney, le tsy le tena mila manoratse ama’areo raho, 2 satria haiko ty fahavognona’areo hagnampe. Mirehareha raho ty mirehake amo o Makedonianao tie, fa tamy i herentaogney inareo a Akaia agneo ro nivognogne hagnampe, sady noho inareo tea magnampe ty hafa, ro nandrisike ty maro amy iareo hagnampe ty hafa ka. 3 Faie hagnirake rahalahy ama’areo agne raho, amy izay ho voaporofo vata’e ty raha irehareha’ay miomba anareo, sady tena ho vognogne ka nareo, arake i nirehafeko tama’areoy. 4 Tsy mone naho misy Makedoniana miarake amako, le hotrea iareo tie tsy vognogne nareo, le ho megnatse zahay noho ty fatokisa’ay anareo. Faie tsy izahay avao, fa ndra inareo ka aza. 5 Nieretseretse areke raho, fa soa naho risihegne mba ho avy aloha ty fotoagne ama’areo agne i rahalahy rey, mba hamory mialoha i fagnomezagne maro nampitamae’areo rey. Amy izay fa ho vognogne i fagnomezagney naho fa avy zahay, le hotrea tie matarike nareo fa tsy sinere.

6 Tadidio’areo zao: Ze mitongy tsy ampe, le ho tsy ampe avao ka ty vokatse azo’e. Fa ze mitongy maro, le ho maro ka ty vokatse azo’e. 7 Toko’e hagnomey arake ze fa nifanapahan-keve’e tam-po’e ao ty tsikiraidraike, fa tsy hagnomey aman’alahelo, ndra an-tere, satria ze magnomey am-pifaleagne ro tean’Agnahare.

8 Vitan’Andrianagnahare ka ty maneho i hasoa fagnahi’e miambakey iaby ama’areo, amy izay nareo hanagne lognandro ze raha paliae’areo, sady ho tsahatse anareo zay. Hanagna’areo maro ka ze raha paliae’areo mba hanoagne ze asa soa iaby. 9 (Arake ty voasoratse toy tie: “Nizara fagnomezagne maro reke. Nagnomey o mahantrao reke. Maharetse nainai’e ty hamaregna’e.” 10 I magnomey tabiry maro hoahy o mpitongio naho magnomey mofo maro hohanegney, ro hagnomey sady hampitombo ty tabiry tongise’areo, naho hampitombo ty voka ty hamaregna’areo.) 11 Nimeagne harena maro tamy ze kila raha nareo, amy izay matarike amy ty fomba isan-karaza’e. Le hisaotse an’Agnahare o ndatio, noho i fagnomezagne nimea’areo hozarae’ay amy ty hafa rey. 12 Satria i fanompoagne natao mba hagnampeagne ty hafay, le tsy natao mba hahavy o ndaty masigneo hahazo ze raha paliae iareo avao, fa mba hahavy ty ndaty maro ka hisaotse an’Agnahare. 13 O fagnomezagne iohoe ro hagnaporofo tie ndaty manao akore nareo. Le hagnomey voninahitse an’Agnahare iareo, satria nareo manao raha mifagnarake amy i talily soa miomba i Kristy torie’areoy, sady matarike amy iareo naho amy ty ndaty iaby. 14 Hotea anareo ka iareo, sady hihalale aman’Agnahare ho anareo, noho ty hasoa fagnahi’e miambake naseho’e tama’areo.

15 Isaoragne abey ty Andrianagnahare noho i fagnomezagne maimaim-poagne boake ama’e tsy hay ty hirehafagne azey!