Hoahy o Efesianao
4 Mihalale ama’areo areke raho, izaho migadra noho ty amy i Tompo, mba hanagna’areo fomba fiaignagne mifagnarake amy i nikanjiagne anareoy. 2 Mikezaha hiambane lognandro, haleme fagnahy, hanam-paharetagne naho hifakatante noho ty hatea. 3 Fa natamba i fagnahỳ ka nareo, le anò ze azo’areo atao mba hiharoagne raike avao sady milongoa amy ty hafa. 4 Raike i vatagney, le raike ka i fagnahỳ, manahake ty maha raike i fanantenagne nikanjiagne anareoy. 5 Raike ty Tompo, raike ty finoagne, raike ty badisa. 6 Raike ka ty Andrianagnahare naho i Rae iareo iabỳ, i ambone iareo iaby naho miasa amy ty alala iareo iaby vaho agnate iareo ao iabỳ.
7 Nimeagne hasoa fagnahy miambake tika tsikiraidraike, arakarake ty fatra nagnarana i Kristy, i fagnomezagne maimaim-poagney. 8 Ty anto’e, hoe reke: “Naho fa nionjogne ambone agne reke, le ninday ndaty maro hondevo. Nagnomey lahilahy ho fagnomezagne reke.” 9 Ino moa ty dika tihoe “nionjogne reke”? Midika zay tie ireke ka, le nizotso amy i faritse ambane etoỳ, ndra an-tane etoy. 10 O nizotso iohoe, le io avao ka ro nionjogne tambone ze hene lagnitse, amy izay reke hagnatanterake ze kila raha.
11 Le ty ila’e tinendre’e ho apostoly, ty ila’e ho mpaminany, ty ila’e ho mpitory talily soa, le ty ila’e ho mpiarake naho mpampianatse, 12 mba hagnitsy o ndaty masigneo, sady hanao ty asa fanompoagne naho mba hagnoregne* i vata i Kristỳ, 13 amparake ty hahavy antika iaby hanagne finoagne raike naho fahalalagne maregne soa miomba i Ana-dahin’Agnaharey. Amy izay tika hanjare ho ndaty bey,* le ho matotse tanterake manahake i Kristy.* 14 Tsy toko’e ho ajaja sasa areke tika, le hatopatopa o onjao naho haviombio o tiokeo, ndra ty fampianaragne iaby mamitake boake amo o ndatio, atao amy ty alala ty hafetseagne naho famorognagne heve-diso. 15 Fa mandehana amy ty hamaregnagne sady manehoa hatea, amy izay tika hanjare ho matotse amy ty lafi’e iaby manahake i lohay, ndra i Kristy. 16 Noho ty ama’e ty mahavy o ratsam-batagneo ho tafakambagne soa naho hiara-hiasa, amy ty alala i fiforetan-taolagne rey, i magnomey ze ilaegney. Naho fa miasa soa ty ratsam-batagne tsikiraidraike, le manjare mitombo i vatagney sady mioregne amy ty hatea.
17 Izao areke ty raha rehafeko ama’areo sady hamafeseko agnatreha i Tompo eo: Tsy toko’e handeha manahake ty tontolo toy sasa nareo, satria iareo mandeha arake ty tsy fisian-tsay iareo. 18 Ty anto’e, maiegne ty say iareo sady lavitse i havelogne boake aman’Agnaharey iareo, noho ty tsy fahafantara iareo naho ty hamafe ty fo iareo. 19 Fa tsy misy tragnon-kegnatse sasa iareo, hafarà’e atao iareo iaby ze karazam-pindesam-batagne baranahigne naho ze karazam-pahalotoagne sady mbe tsy mete afa-po avao ka.
20 Faie tsy hoe izay ty raha nianara’areo miomba i Kristy, 21 naho toe ie vata’e ro nirei’areo sady nampianaregne tamy ty alala’e nareo, mifagnarake amy i hamaregnagne amy i Jesosy aoy. 22 Nampianaregne mba hagnafake i toetse talohay nareo, i nifagnarake tamy ty fomba fiaigna’areo talohay. Mihasimbamihasimba avao i fiaigna’areo talohay, satria voafita i fagniria’areoy nareo. 23 Toko’e hikezake hagnavao i hery mikomandy ty toe-tsai’areoy nareo, 24 sady toko’e hiakanjoa’areo i toetse vaovao niforognegne mifagnarake amy ty zoton’arofon’Agnahare, naho mifagnarake amy ty tena hamaregnagne naho ty tsy fivalihagney.
25 Fa naria’areo areke o vandeo, le mirehafa ty maregne amy ty nama’areo nareo tsikiraidraike, satria ratsam-batagne mifampiankigne tika. 26 Miboseha faie ko manota. Ao tsy hotra ty hitsofora i androy ty haboseha’areo. 27 Ko omeagne hirike* ty Devoly. 28 Ao ze mangalatse tsy hangalatse sasa, fa toko’e hiasa mafe reke, le hanao asa soa amy ty tagna’e, amy izay reke hanan-draha hozaraegne amy ze sahiragne. 29 Ao tsy hisy rehake raty hiboake amy ty vava’areo, fa ze rehake soa, mba hifampaherezagne avao naho fa ilaegne zay, mba hahasoa ze mitsanogne. 30 Ko atao ka ze hampalahelo i fagnahy masin’Agnaharey, fa nasiagne tampò tamy ty alala io nareo, mba hagnafahagne anareo amy ty alala i solovoigney, naho fa avy i andro fagnavotagney.
31 Afaho tsy ho ama’areo eo ze hene lolom-po, habosehagne, habosehagne mafe, firoaroagne, fanivetiveagne naho ze hene haratiagne. 32 Fa mikezaha ho soa fagnahy amy ty hafa, hiferenaigne naho hifamela heloke tanterake, manahake ty namelan’Agnahare tanterake ty helo’areo, tamy ty alala i Kristy.