Hoahy o Efesianao
6 Inareo anake, ankatoavo’areo ty rae aman-drene’areo, arake ze zoton’arofo i Tompo, satria mete ty manao izay. 2 “Hajao ty rae’o naho ty rene’o”, satria izay ty lily voaloha’e misy ty fampitamagne toy: 3 “Amy izay ho soa ty fiaigna’o* sady ho lava velogne an-tane etoy.” 4 Inareo rae ka, ko manao ze hahaboseke ty ana’areo, fa tezao’areo iareo, le ampiofagno’areo naho anaro’areo* mifagnarake amy ze saontsie i Jehovah.
5 Inareo mpanompo, ankatoavo’areo amy ty fo’areo o tompo’areo olombelogneo,* sady atahoro’areo naho hajao’areo, manahake ty atao’areo amy i Kristy. 6 Tsy tihoe naho fa misy magnente avao nareo ro toko’e hanao izay, satria hoe mipay sitrake ama o ndaty nareo naho manao izay. Toko’e hanao izay nareo, satria mpanompo i Kristy, sady manao ty zoton’arofon’Agnahare amy ty fo iaby. 7 Manompoa ty tompo’areo amy ty fo’areo,* manahake tihoe manompo i Jehovah, fa tsy ndaty. 8 Satria hai’areo, fa ze raha soa atao ty ndaty tsikiraidraike, le hahazoa’e valesoa boake amy i Jehovah, ndra ndevo reke, ndra ndaty afake. 9 Inareo tompo ka manoa hoe izay amy iareo, fa ko magnorohoro iareo, satria hai’areo tie, i an-dagnitse agney ty Tompo iareo naho ty Tompo’areo, sady tsy mifily volo reke.
10 Fara’e, mikezaha hahazo hery lognandro amy i Tompo, amy ty alala i heri’e matanjakey. 11 Agnisio’areo ze fitaovam-pialiagne iaby boake aman’Agnahare, amy izay nareo hioregne soa, le tsy hoazo ty hafetsea i Devoly. 12 Ty anto’e, tsy mialy amy ty lio naho ty nofotse tika, fa amy ty fanjakagne naho fahefagne naho ty mpitondra ty tontolo maiegne toy vaho amy ty fagnahy raty amy ty faritse amy i lagnitsey ey. 13 Rambeso’areo iaby areke, i fitaovagne fialiagne boake aman’Agnaharey, amy izay hovita’areo ty hanohetse i fahavaloy amo ze o andro raty zao, sady hioregne soa nareo naho fa vita’areo iaby ze kila raha.
14 Mioregna soa areke, le adiagno ambania’areo eo manahake o sentirao ty hamaregnagne, sady isikino manahake o fiarovan-tratrao ty fanoagne ty maregne. 15 Agnisio manahake o kirarò an-tombo’areo ey ka ty fahavognonagne hitory ty talily soa i filongoagney. 16 Ankoatse o raha rehoe iaby, le rambeso ka i fikalagnam-bala jabajabay, ndra ty finoagne, satria io ro ahafaha’areo mamono ze balam-polesidoro mirehetse alefa i ratỳ. 17 Agnisio ka i fiarovan-dohay, ndra ty fagnavotagne, sady rambeso i mesabey ty fagnahỳ, ndra ty saontsin’Agnahare. 18 Mivavaha naho mihalalea ka amy ty fomba isan-karaza’e, sady ekeo ty fitariha i fagnahỳ naho fa manao izay. Miambena avao areke, le mihalalea lognandro hoahy o ndaty masigneo iaby. 19 Mivavaha ho ahy ka, mba hagnomeagne ahy fahaiagne mirehake, amy izay raho hahavany hirehake naho fa mampahafantatse ty raha mietake masigne miomba i talily soay. 20 Ty anto’e, noho iraho ambasadera i talily soay ro mahavy ahy hogadraegne. Mivavaha ho ahy, amy izay raho tsy hatahotse hitory i talily soay, satria izay ty toko’e hataoko.
21 Mba hahafantara’areo ty miomba ahy naho tihoe manao akore raho, le hampahafantare i Tikiko rahalahy teagne sady mpanompo azo atokisagne amy i Tompo ao, anareo ze kila raha. 22 Hiraheko ama’areo agne reke noho ze anto’e zay, amy izay hohai’areo tie manao akore zahay, le ireke ka hampionogne ty fo’areo.
23 Lonike abey ty Andrianagnahare Rae naho i Jesosy Kristy Tompo, hagnomey fiadagnagne o rahalahio iaby naho haneho hatea amy iareo vaho hagnomey finoagne iareo! 24 Ho amy ze managne hatea tsy miovaova i Jesosy Kristy Tompontikagne abey ty hasoa fagnahy miambake!