Hoahy o Efesianao

2 Ankoatse izay, le nivelomen’Agnahare nareo, ndra tie nimate noho ty fahadisoa’areo naho ty fahota’areo aza, 2 tamy inareo nandeha arake ty tontolo toỳ. Tamy izay nareo, le nitarihe ty fahefà ty rivotse, ndra i toe-tsaigne miasa amo o ana ty tsy fankatoavagneo ao amy izaoy. 3 Ie, nagnorike ty fagniria ty nofontikagne tika tamy izay, nagnatanterake ty fagniria ty nofontika naho ty eretserentika, sady ni-ana ty havigneragne, manahake o ndatio iaby avao, nanomboke ty niterahagne antikagne. 4 Faie noho ty halahibey ty hatea naseho i Andrianagnahare manan-karena famindram-poy amantika, 5 le nivelome’e miarake amy i Kristy tika, ndra tamy itika nimate noho ty fahadisoantikagney aza. Fa navota’e noho i hasoa fagnahi’e miambakey nareo. 6 Niarake nivelome’e naho niarake natobo’e an-dagnitse agne ka tika, noho itika tafaharo amy i Kristy Jesosy. 7 Amy izay, amy i tontolo ho avỳ ao, le haseho’e antikagne, fa fara izay ty lahibey ty hasoa fagnahi’e miambake, naho fa manao raha soa ho antika tafaharo amy i Kristy Jesosio reke.

8 O hasoa fagnahi’e miambake iohoe ro nagnavota’e anareo noho ty finoa’areo. Tsy noho ty kezake natao’areo ty nahazoa’areo izay, fa fagnomezagne boake aman’Agnahare. 9 Aha’a, tsy voka ty kezake natao ze raha zay, amy izay tsy hisy ndaty ho afake hirehareha. 10 Asa ty fitàn’Agnahare tikagne sady niforognegne mba hanao asa soa, noho itika tafaharo amy i Kristy Jesosy. Nomanen’Andrianagnahare mialoha hataontikagne ze asa zay.

11 Tadidio’areo areke fa taloha nareo, le ndaty boake amo o firenena hafao naho arake ty nofotse, sady nitokave o ndaty “nitapahegne” tamy ty alala ty tagna o ndatio tihoe, “tsy mitapake.” 12 Tsy nanagne i Kristy ka nareo tamy izay, nisarahegne tamy ty firene o Israelio, ambahiny naho amy i fifagnekeagne miomba i fampitamagneỳ, sady tsy nanagne fanantenagne naho tsy nanagne an’Agnahare. 13 Nilavitse an’Agnahare nareo tie taloha, faie fa marine aze tie amy izao, satria tafaharo amy i Kristy Jesosy, noho i lio i Kristỳ. 14 Ty anto’e, ireke ty nampilongo antikagne, satria natamba’e raike i ndaty roe tonta rey sady naroda’e ka i manda agnivo eo nampisarake iareoy. 15 Tamy ty alala i nofo’ey ty namoagnagne i fahavaloy, ndra i Lalàna misy lily maroy, amy izay ho tafaharo raike ama’e i ndaty roe tonta rey, le hanjare ho ndaty raike vaovao sady ho mpilongo. 16 Amy izay o vahoake rehoe hanjare vatagne raike, le hilongo soa aman’Agnahare noho i hazo fijaleagney, satria fa vinono’e tamy ty alala ty vata’e i fahavaloy. 17 Niavy ka reke mba hagnambara ty talily soa i filongoagney tama’areo lavitse an’Agnahare naho tamy ze narine aze, 18 satria amy ty alala’e ty ahafahantika roe tonta magnarine i Rae, amy ty alala ty fagnahy raike.

19 Tsy ambahiny sasa areke nareo, sady tsy boake amy ty firenena hafa agne, fa tompon-tane manahake o ndaty masigneo, sady agnisa ty keleian’Agnahare. 20 Fa naoregne ambone i fototsey ey nareo. Tsy ia zay, fa o apostolio naho o mpaminanio, le i Kristy Jesosy ty vato anjoro’e eo natao fototse. 21 Noho o tragno aoregne iohoe tafaharo ama’e sady tafakambagne soa iaby ze raha amboaragne aze, le miakatsemiakatse avao reke, hafarà’e manjare tempoly masigne hoahy i Jehovah. 22 Noho inareo tafaharo ama’e ka, le miarake aoregne mba hanjare toeragne hisy an’Agnahare amy ty alala ty fagnahi’e.