Talily Soa Nisorate i Lioka

3 Tamy ty taogne faha-15 nanjakà i Tiberio Kaisara, le i Pontio Pilato ty governora i Jodia, le i Heroda ty lahibeim-paritse tamy ty faritse i Galelia, le i Filipo ty lahibeim-paritse tamy ty faritse i Itoria naho i Trakonitisy, le i Lizania ty lahibeim-paritse tamy ty faritse i Abilena, 2 le i Anasy naho i Kaiafa ty mpisorombey. Tamy izay ty Jaona ana i Zakaria ro nahazo hafatse boake aman’Agnahare, tamy ie tam-patrambey agney.

3 Nandeha tamy ty faritse nagneragne i Jordana areke reke, le nitory tamo o ndatio, fa toko’e hatao badisa iareo mba hanoroa iareo tie mibebake, amy izay iareo mahazo famelan-keloke. 4 Niseho ze raha zay, amy izay tanterake i raha voasoratse amy i boke i Isaia mpaminany ao tihoey tie: “Inay ty feo o ndaty mikoike am-patrambey agne manao tihoe: ‘Omano ty lala i Jehovah. Anò mahitsy i lala’ey. 5 Holembefagne tane ze vavasaka, le ze vohitse naho haboagne hatao tane mira. Hatao mahitsy ze lalagne miolakolake, le ze misy lavadavake harenegne soa. 6 Ty ndaty* iaby ka hahatrea ty fagnavotan’Agnahare.’”

7 Le nirehake tamy i vahoake nimbama’e mbeo mba hatao’e badisa rey reke tie: “Inareo tarana o meregne misy poizigneo, ia o nampitao anareo mba tsy hotra ty havigneran’Agnahareo? 8 Atorò’areo amy ty raha atao’areo areke tie mibebake vata’e nareo. Ao nareo tsy hirehake tie: ‘Izahay anio ana i Abrahama!’ Rehafeko ama’areo, fa hain’Agnahare ty magnova ty vato retiagne hanjare ho ana i Abrahama. 9 Naho ty maregne, le fa am-poto i hataey eo i famakỳ. Ze hatae tsy mamoa voa soa areke, le hofiraegne sady hatorake agnate afo ao.”

10 Le hoe ty niontane i vahoakey aze: “Ino areke ty toko’e hatao’ay?” 11 Hoe reke tamy iareo: “Ze managne akanjo roe, toko’e hagnomey ze tsy managne. Le ze manan-kanegne ka, toko’e hagnomey ze tsy managne.” 12 Ndra o mpitake hetrao ka aza, le nimbama’e mbeo mba hatao’e badisa. Le hoe iareo tama’e: “O mpagnanatse, ino ty toko’e hatao’ay?” 13 Le hoe reke tamy iareo: “Ze hetra toko’e haloa o ndatio avao ro takeo’areo fa ko aonjogne.” 14 Le hoe ka ty niontane o maramilao aze: “Ino ty toko’e hatao’ay?” Le hoe reke tamy iareo: “Ko magnampatse fahefagne mba hahazoam-bola, ndra manao dramotse, fa mikezaha hionogne amy ty karama’areo.”

15 Fa nandindìgne avao ty hiavia i Kristy o ndatio, le hoe iareo miomba i Jaona: “Va’e ireke varagne o Kristio?” 16 Hoe areke ty Jaona tamy iareo: “Iraho manao badisa anareo amy ty rano. Fa i ho avy afarako zay mahery amboneko, le ndra iraho aza tsy fagneva ty hagnafake ty kapa’e. Hanao badisa anareo amy ty fagnahy masigne naho amy ty afo reke. 17 Fa an-tagna’ey i fitaovagne fikororohagney mba hagnaliova’e i toeragne famofoham-barey. Le havori’e an-driha’e ao ze vare, fa i kafo’ey reketse i taho’ey horoa’e amy ty afo tsy mete mate.”

18 Nagnomey iareo torohevetse maro hafa ka reke, sady nagnambara tamy iareo lognandro i talily soay. 19 Fa i Heroda lahibeim-paritse nanare’e mafe noho ty amy i Herodiasy valy i rahalahi’ey naho amy ty raha raty hafa natao’e iaby. 20 Ndra tie fa nanao o raha raty rehoe aza reke, le mbe ginadra’e ka ty Jaona.

21 Naho fa natao badisa o ndatio, le natao badisa ka ty Jesosy. Tamy i Jesosy nivavakey, le nisokake i lagnitsey, 22 sady nizotso manahake o voromahilalao tambone’e teo i fagnahy masigney. Nisy fiaragnanagne boake an-dagnitse agne ka nanao hoe izao: “Irehe i Ana-dahiko tena teako sady ankasitrahakoy.”