Talily Soa Nisorate i Matio
16 Naho fa niavy eo, le nimbamy i Jesosy mbeo o Fariseò naho o Sadoseò mba hitsapa hevetse aze. Nangatahe iareo reke mba hampiseho famantaragne boake an-dagnitse agne. 2 Le hoe ty navale i Jesosy iareo: “Naho fa hotsofotse i androy, le hoe nareo tie: ‘Ho soa ty andro hamaray, satria mena i lagnitsey.’ 3 Ie naho fa maraindraigne, le hoe ka nareo: ‘Hanintsigne sady hagnoragne tie androany, satria mena i lagnitsey sady mandopoke.’ Hai’areo fantaregne amy ty raha miseho amy i lagnitsey ey areke ty ho toetse i androy, faie tsy hai’areo ty dika ty raha miseho amo o fotoagne zao. 4 Lava mipay famantaragne avao o taranake raty fagnahy naho mpagnitsakitsa-balio. Faie tsy misy famantaragne homeagne anareo, naho tsy i famantaragne tamy i Jona igne avao.” Nenga’e eo iareo tafara izay, le nandeha reke.
5 Nifindra a moro’e raike ey i mpiana’e rey naho fa niavy eo. Faie nagnaligno ninday mofo iareo. 6 Le hoe ty Jesosy tamy iareo: “Mitaoa soa nareo amy ty lalivay* o Fariseò naho o Sadoseò.” 7 Le nifampirehake iareo tie: “Va’e itika tsy ninday mofò nio mahavy aze mirehake izaio.” 8 Nifanta i Jesosy zay, le hoe reke: “Nagnino inareo ie mifampirehake tie tsy managne mofò, ry kele finoagne? 9 Le mbe tsy azo’areo avao vao ty teako horehafegne? Sa tsy tsiaro’areo i mofo dime nahampe ndaty 5 000-y? Tsy tsiaro’areo ka vao tie fire harogne i sisa’e tsy nilanỳ? 10 Sa, haligno’areo ka i mofo fito nahampe ndaty 4 000-y? Tsy tsiaro’areo vao tie fire vaha bey ty nisisa’e? 11 Nagnino ro tsy taka’areo tie tsy miomba ty mofo i raha rehafekoy? Ty lalivay o Fariseò naho o Sadoseò ro nampitaoako anareo.” 12 Vaho izay nitaka iareo tie ty fampianara o Fariseò naho o Sadoseò ty tea’e hampitaoagne iareo, fa tsy o lalivay fampiasaegne amo o mofò.
13 Naho fa niavy amy ty faritse a Kaisaria Filipo agne ty Jesosy, le nagnontenea’e i mpiana’e rey tie: “Ia ty fahaia o ndatio i Ana o ndatỳ?” 14 Le hoe iareo: “Ty ila’e mirehake tie i Jaona Mpanao Badisa. Le misy ka ty manao tie i Elia. Le ty ila’e ka manao tie i Jeremia, ndra ty raike amy i mpaminany rey.” 15 Le hoe reke tamy iareo: “A inareo, ia ty fahaia’areo ahy?” 16 Le namale aze ty Simona Petera tie: “I Kristy rehe, Ana i Andrianagnahare velogney.” 17 Le hoe ty navale i Jesosy i Petera: “Sambatse rehe Simona ana i Jona, satria tsy nofotse naho lio ty nampahafantatse azo izay fa i Raeko an-dagnitse agney. 18 Izao ka ty raha ambarako azo: Irehe o Peterao, le aoreko ambone ty lamilamy toy i fiangonakoy sady tsy haharesy aze ty vavahady i Kiborỳ. 19 Homeiko azo ty lakile i Fanjakà i lagnitseỳ. Ndra inogn’ino arohi’o an-tane etoy, le fa arohy an-dagnitse agne ka. Le ze raha hahà’o an-tane etoy, le fa mihaha an-dagnitse agne ka.” 20 Ie naho fa niavy eo, le nafanto’e i mpiana’e rey mba tsy hirehake ndra amy ia ndra amy ia tie ireke ro Kristy.
21 Nanomboke tamy ze fotoagne zay, le nagnazava tamy i mpiana’e rey ty Jesosy tie tsy maintsy mandeha a Jerosalema agne reke, le hampijaléjalé o androanavio naho o lahibey ty mpisorogneo vaho o mpampianatse lalànao* sady hovonoe iareo. Faie mbe hovelomegne indraike reke amy ty andro fahatelo. 22 Nindese i Petera nikisake kede ty Jesosy sady nitohere’e hoe izao reke tie: “O Tompo, toko’e ho soa fagnahy amy ty vata’o rehe; Tsy ombia hanjò azo ze raha zay!” 23 Faie niambohoa’e ty Petera sady hoe reke: “Mb’ambohoko atoa rehe Satana! Ndra ihe ka ro manjare vato mamingagne alohako eo, satria tsy ty fomba fiheven’Agnahare ro eretserete’o, fa ndra ty fomba fiheve o ndatio.”
24 Le hoe ty Jesosy tamy i mpiana’e rey naho fa niavy eo: “Naho misy ndaty te hagnorike ahy, le tsy maintsy mandietse ty vata’e naho minday ty hazo fijalea’e sady magnorike ahy avao. 25 Ndra ia ndra ia te hamonje ty fiai’e, le hamoe aze. Faie ndra ia ndra ia mamoe ty fiai’e noho ty amako, le hahazo aze. 26 Ino moa ty soa hoazo ty ndaty raike naho mahazo ze kila raha amy ty tontolo toy eto reke, faie afoe’e ty fiai’e? Sa, ino ty raha azo o ndatio omeigne mba hotakalo ty fiai’e? 27 Ty anto’e, ho avy amy ty voninahin-dRae’e i Ana o ndatỳ reketse o anjeli’eo, le hovalea’e arake ze raha natao’e ty tsikiraidraike. 28 Volagneko ama’areo to vata’e, fa misy ama’areo magnatreke etò tsy homate, amparake ty ahatreava iareo hey i Ana o ndatỳ ho amy i Fanjakà’ey ao.”