Taratasy Voaloha’e Hoahy o Korintianao
2 Naho fa niavy tama’areo agne areke raho ry rahalahy, le tsy nampiasa ty reha o ndaty manam-pahaiagneo ndra ty hilala iareo, naho fa nagnambara tama’areo i raha mietake masigne miomba an’Agnaharey. 2 Ty anto’e, nanapa-kevetse raho fa tsy hampahafantatse anareo raha hafa ankoatse i Jesosy Kristy naho ty namonoagne aze tamy i boda-kataey eo. 3 Naho fa niavy tama’areo agne ka raho, le naleme naho natahotse vaho tena nihondrahondra. 4 Naho fa nirehake naho nitory ka raho, le tsy nampiasa rehake maharese lahatse boake amo o ndaty mahilalao fa nampiseho ty hery i fagnahỳ. 5 Amy izay ty finoa’areo tsy hioregne amy ty hilala o ndaty, fa amy ty herin’Agnahare.
6 Mirehake miomba ty hilala amy ze matotse tika, faie tsy ty hilala ty tontolo toy ndra ty ahy ty mpitondra ty tontolo toy ho foagneo, 7 fa miomba ty hilalan’Agnahare, i nahaja tamy i raha mietake masigney aoy. Io i fa nomanen’Agnahare taloha ty tontolo toy mba hahazoantika voninahitsey. 8 Tsy nisy nahafantatse ze hilala zay ty mpitondra amy ty tontolo toy eto, satria naho nihay iareo io, le tsy ho vinono iareo* i Tompo bey voninahitsey. 9 Fa voasoratse tie: “Tsy nisy maso nahatrea naho sofy naharey, ndra ndaty nahazo eretseretse* ty raha nomanen’Agnahare hoahy ze ndaty tea aze.” 10 Itika ro nampibaribarian’Agnahare i raha rey tamy ty alala i fagnahi’ey, satria i fagnahỳ mikaroke ze kila raha, ndra ty raha laleke miomba an’Agnahare aza.
11 Ia ty mahay ty miomba* ty ndaty raike naho tsy ty vatategna’e avao? Hoe izay ka fa tsy misy mahay ty miomba an’Agnahare* naho tsy ty fagnahin’Agnahare avao. 12 Tsy nandrambe ty fagnahy ty tontolo toy tikagne fa i fagnahy boake aman’Agnaharey, amy izay hofantantikagne ty raha nimean’Andrianagnahare antika taman-kasoa fagnahy. 13 Naho fa mirehake o raha rehoe ka tikagne, le tsy mampiasa* ty rehake ampianare o ndaty manan-kilalao, fa ty rehake ampianare i fagnahỳ. Rehake arake i fagnahỳ areke ro agnazavantikagne raha ara-pagnahy.
14 Fa ty ndaty arake ty nofotse, le tsy magneke* ze raha boake amy i fagnahin’Agnaharey, satria hagegeagne rey tie ama’e. Tsy afake mahafantatse irey reke, satria mipay ty fagnahin’Agnahare ty fandinehagne irey. 15 Fa ty ndaty arake ty fagnahy, le mandineke ze kila raha, sady tsy misy ndaty afake mitsara aze.* 16 “Ia ty nanjare nahafantatse ty vetsevetse i Jehovah mba hampianatse aze?” Fa itika managne ty say i Kristy.