Hoahy o Galatianao
2 Ie 14 taogne tafara izay, le nionjogne mba Jerosalema mbeo indraike raho naho i Barnabasy. Nenteko niarake amako ka ty Titosy. 2 Nionjogne mbeo raho, satria nisy raha nabaribary tamako, le nihazavaeko tamy iareo i talily soa torieko amo o ndaty boake amo o firenena hafaoy. Faie tagnatreha o rahalahy tena nihajaegne reo eo ro nanoako izay, mba ho azoko antoke tie, mete ty lay nataoko, ndra tsy nilay fahatane avao raho. 3 Fa ndra i Titosy aza, i niarake amakoy, le tsy nisy nanere aze mba hotapahegne, ndra tie Grike aza reke. 4 Faie niseho ze olagne zay noho o rahalahy sandoke nazilike moramora tamo o fiangonagneo eo, mba hitsikilo i fahafahagne anagnantika tafaharo amy i Kristy Jesosio, amy izay tikagne hanjare hondevo iareo tanterake. 5 Tsy nagneke iareo zahay, ndra tie tagnate ty fotoagne kedekede avao aza, amy izay ho ama’areo eo avao i hamaregnagne agnate i talily soay aoy.
6 Fa naho ty miomba o rahalahy heveregne ho ambone sady tena hajaegne reo, le tsy nisy raha vaovao nirambeseko tamy iareo. Tsy ahoako ino ndra tie nanao akore iareo tie taloha, satria ty Andrianagnahare tsy mitsara ivela’e. 7 Naho fa nihay iareo aza tie, nankignegne tamako ty fitoriagne i talily soay amo o ndaty tsy mitapakeo, manahake ty nagnankignagne tamy i Petera ty fitoriagne amo o mitapakeo, 8 satria i nagnomey fahefagne i Petera ho apostoly hoahy o mitapakeoy ro nagnomey fahefagne ahy ka ho apostoly o firenena hafao, 9 sady naho fa nihay i Jakoba naho i Kefasy vaho i Jaona, i agnisa ty fahagne* hoahy o fiangonagneoy tie, nanehoagne hasoa fagnahy miambake raho, le natolo iareo anay amy i Barnabasy ty tagna iareo havana, mba ho mareke ty fiaraha-miasa’ay. Le nandeha amo o firenena hafao agne zahay, fa iareo nandeha amo o ndaty mitapakeo agne. 10 Izao avao ty raha nampanoe iareo anay, le ty haneho fiheveragne o mahantrao, sady toe fa nikezake mafe nanao izay avao ka raho.
11 Faie naho fa niavy ta Antiokia agne ty Kefasy, le nitohereko mivantagne reke, satria nibaribary tie tsy mete ty raha natao’e. 12 Ty anto’e, taloha ty niavia i lahilahy boake amy i Jakoba agne rey, le niarake nihinagne tamo o ndaty boake amy ty firenena hafao reke. Faie, ie i ndaty rey niavy, le tsy nanao izay sasa reke, sady niala’e iareo, satria natahotse o ndaty mitapakeo reke. 13 Nanao soa miatreke manahake aze ka ty Jiosy tao. Ndra i Barnabasy aza nivoatao iareo hanao soa miatreke ka. 14 Faie naho fa nitreako tie, tsy nandeha arake i hamaregnagne agnate i talily soay aoy iareo, le izao ty nirehafeko tamy i Kefasy tagnatreha iareo eo iaby: “Ihe Jiosy aza manao ty atao o ndaty boake amy ty firenena hafao, fa tsy manao ty raha toko’e hatao o Jiosio, le nagnino o ndaty boake amy ty firenena hafao ro seré’o hagnorike ty fombafomba o Jiosio?”
15 Jiosy boake an-troke agne tikagne, fa tsy mpanota boake amo o firenena hafao. 16 Haintika fa tsy noho ty asa i lalànay ty agnambaragne ty ndaty raike ho maregne, fa noho ty finoa’e i Kristy Jesosy. Mino i Kristy Jesosy areke tikagne, amy izay hambara ho maregne, faie tsy noho ty asa i lalànay fa noho ty finoantikagne i Kristy. Ty anto’e, tsy misy ndaty hambara ho maregne noho ty asa i lalànay. 17 Naho trea tie mpanota tika tie amy izao, ie amy izao tikagne te hambara ho maregne noho ty amy i Kristy, le midika vao zay tie mpanompo ty ota ty Kristy? Sagnatria zay! 18 Naho ohatse i raha rinavakoy ro aoreko indraike, le hotrea tie mpandika lalàna raho. 19 Ty anto’e, noho iraho nagnorike i lalànay ro nahavy ahy homate amy i lalànay, amy izay raho hovelogne ho an’Agnahare. 20 Pineke tamy ty boda-katae niarake tamy i Kristy raho. Tsy velogne hoahy ty vatako sasa areke raho, fa hoahy i Kristy, i velogne sady tafaharo amakoy. Ie, amy iraho mbe nofotse zao, le miaigne mifagnarake amy ty finoako i Ana-dahin’Agnaharey, i nitea ahy sady nanolotse ty tegna’e ho ahỳ. 21 Tsy mandietse i hasoa fagnahy miambake asehon’Agnaharey raho. Ty anto’e, naho amy ty alala i lalànay ro agnambaragne ty ndaty raike ho maregne, le nimate fahatanetane avao ty Kristy.