Talily Soa Nisorate i Matio
18 Tamy i fotoagne ignehoe, le nimbamy i Jesosy mbeo i mpiana’e rey sady nirehake tie: “Ia maregne ty fara’e lahibey amy i Fanjakà i lagnitsey ao?” 2 Nitoka ajaja raike areke ty Jesosy, le nampitsangane’e tagnivo iareo teo, 3 le hoe reke: “Volagneko ama’areo to vata’e, fa naho tsy miova mba hanahake o ajajao nareo, le tsy hizilike amy i Fanjakà i lagnitsey ao. 4 Ndra ia ndra ia areke miambane manahake ty ajaja toy, le ireke ty fara’e lahibey amy i Fanjakà i lagnitsey ao. 5 Ndra ia ndra ia mandrambe ty ajaja hoe itoy amy ty agnarako, le mandrambe ahy ka. 6 Faie ndra ia ndra ia manao raha mba haminganagne ty raike amy i kidikidy mino ahy rey, le soa hoahy ze ndaty zay ty rohizagne o vato bey figosam-bare ahody o birìkeò ty am-bozo’e eo, le atorake an-driake laleke agne.
7 “Loza ty hanjò ty tontolo toy, satria iareo manao raha mba haminganagne. Toe tsy maintsy hisy ze raha zay, faie hoazon-doza ze ndaty manao raha mba haminganagne. 8 Naho mahavy azo hanota areke ty tagna’o ndra ty tombo’o, le tapaho sady ario lavitse azo. Ndra aleo’e rehe do-tagnagne ndra do-tomboke, faie mahazo i fiaignagney, ta tie managne tagnagne roe ndra tomboke roe, faie hatorake amy i afo maharetse nainai’ey* ao. 9 Naho ty maso’o raike ka ty mahavy azo hanota, le afaho sady ario lavitse azo. Ndra aleo’e rehe toka-maso, faie mahazo i havelogney, ta tie, ey iaby i maso’o roey, faie ndra hatorake amy i Gehena mirehetsey agne. 10 Mitaoa nareo tsy mone tsy hisia’areo dika’e ty raike amy i kidikidy rey, satria rehafeko ama’areo fa i anjely iareo an-dagnitse agney, le mahatrea lognandro ty lahara i Raeko an-dagnitse agney. 11 ——
12 “Akore ty heve’areo amy itoy? Naho misy lahilahy raike managne agnondry 100 faie nimontso ty raike, tsy henga’e am-bohitse ey hey vao i 99-y, le handeha hipay i raike nimontsoy reke? 13 Volagneko ama’areo to vata’e, fa naho fa trea’e i raike nimontsoy, le igne ro tena mahafale aze ambone i 99 tsy nimontso rey. 14 Hoe izay ka fa tsy tea i Raeko an-dagnitse agney hisy ho montso, ndra ty raike avao amy i kidikidy rey aza.
15 “Naho misy rahalahi’o manota areke, le mandehana mbama’e mbeo sady ampahafantaro aze i fahadisoa’ey naho fa mitolake nareo. Naho ohatse reke mitsanogne azo, le nivita’o ty nagnampe aze mba hiala amy i fahadisoa’ey. 16 Faie naho tsy mitsanogne azo reke, le mindesa ndaty raike ndra roe hiarake ama’o mbama’e mbeo, soa tie azo antoke ze raha iaby, satria misy vavolombelogne roe ndra telo. 17 Naho mbe tsy mitsanogne iareo ka reke, le mirehafa amy i fiangonagney.* Naho mbe tsy mitsanogne i fiangonagney avao ka reke, le ampanahafo ty ndaty amy ty tontolo toy naho o mpitake hetrao.
18 “Volagneko ama’areo to vata’e, fa ze raha arohi’areo an-tane etoy, le fa mirohy an-dagnitse agne, le ze raha hahà’areo an-tane etoy, le fa mihaha an-dagnitse agne ka. 19 Volagneko ama’areo indraike to vata’e, fa naho misy roe ama’areo an-tane etoio mivavake miomba ty raha lahibey, le hotanterahe i Raeko an-dagnitse agney i fangataha’areoy. 20 Ty anto’e, ndra aia ndra aia ivoria ty roe ndra telo amy ty agnarako, le agnivo iareo eo raho.”
21 Ie naho fa niavy eo, le nimbamy i Jesosy mbeo ty Petera sady nagnontane aze tie: “O Tompo, naho manota amako impire ty rahalahiko ro toko’e havelako ty fahota’e? Hatrake impito vao?” 22 Le hoe ty Jesosy tama’e: “Rehafeko ama’o, fa tsy hatrake impito avao fa hatrake im-77.
23 “I Fanjakà i lagnitseỳ areke, le azo ampitoviegne amy ty mpanjaka raike te hitake ty vola’e tamy ty mpanompo’e. 24 Naho fa nanomboke nitake i trosa’ey reke, le nindesegne mbama’e mbeo ze mpanompo raike nitrosa tama’e vola 10 000 talenta zay. 25 Faie satria reke tsy nanam-bola handoagne i trosay, le nirehafe i tompo’ey reke mba hamarotse ty vata’e naho ty vali’e naho ty ana’e vaho ze raha iaby nanagna’e, mba handoavagne i trosay. 26 Le niankohoke tagnatreha’e eo i mpanompoy sady nirehake tie: ‘Mba mandignisa hey rehe aba, fa mbe haloako avao i vola’oy iaby.’ 27 Niferegnesa i mpanjakay areke i mpanompoy, le nenga’e handeha reke sady nenga’e agne i trosa’ey.* 28 Faie naho fa nandeha i mpanompoy, le nifanalaka amy ty mpanompo raike hafa nanagna’e trosa vola 100 denaria. Nitana’e o mpanompo iohoe sady nifeoze’e, le hoe reke: ‘Le ndra aloao iaby i trosako ama’o agney!’ 29 Le niankohoke tagnatreha’e eo i mpanompo hafay sady nihalale tama’e tie: ‘Mba mandignisa hey rehe ajafady, fa mbe haloako i trosa’oy.’ 30 Faie tsy nagneke reke fa nampidire’e tam-pirizò agne i mpanompo hafay amparake ty andoava’e i trosay iaby. 31 Naho fa nahatrea izay i mpanompo ila’e rey, le tena nalahelo, hafarà iareo nandeha nitalily tamy i tompo iareoy ze raha iaby niseho. 32 Tafara izay, le nampangalae i tompo’ey i mpanompoy. Hoe reke tama’e: ‘O ty mpanompo raty saigne tia, nengako agne iaby i trosako tama’o agney naho fa nihalale tamako rehe. 33 Tsy toko’e mba ho namindra fo tamy i mpanompo nama’oy ka vao rehe, manahake ty namindrako fo tama’o?’ 34 Tena niboseke vata’e i tompo’ey, le natolo’e o mpiambegne gadrao reke, amparake ty andoa’e i trosa ama’e agney iaby. 35 Hoe izay ka ty raha hatao i Raeko an-dagnitse agney ama’areo, naho tsy mamela heloke ty rahalahi’areo amy ty fo’areo nareo tsikiraidraike.”