Talily Soa Nisorate i Jaona

19 Nalae i Pilato ty Jesosy naho fa niavy eo, le nikaravasie’e. 2 Namboara i maramila rey satro-boninahitse tamy ty raha misy fatipatike reke, le natao iareo tan-doha’ey. Nampagnisie iareo akanjo ivela’e voloparasy zay ka reke. 3 Le nifandimbelimbe nandeha mbama’e mbeo iareo sady nirehake tie: “Arahabaegne rehe Mpanjaka o Jiosio!” Tsy nadò iareo ty takapike ka reke. 4 Niboake indraike ty Pilato sady hoe reke tamy i vahoakey: “Hoenteko agnatreha’areo eto reke, amy izay hofanta’areo tie tsy treako ty hadisoa’e.” 5 Niakatse boake agne areke ty Jesosy sady mbe tama’e tey i satro-boninahitse misy fatipatike natao iareo an-doha’eỳ naho i akanjo ivela’e voloparasy nampagnisie iareo azey. Le hoe ty Pilato tamy iareo: “Io i lahilahỳ!” 6 Faie naho fa nahatrea aze o lahibey ty mpisorogneo naho i mpiambegne rey, le nikorakorake iareo tie: “Peho amy ty boda-katae reke! Peho amy ty boda-katae reke!”* Le hoe ty Pilato tamy iareo: “Indeso’areo reke, le vonò’areo fa iraho tsy mahatrea ty hadisoa’e.” 7 Hoe ty navale o Jiosio aze: “Managne lalàna zahay. Arake i lalànay, le fagneva ty hovonoegne reke satria nanao ty vata’e ho anan’Agnahare.”

8 Naho fa naharey ze raha nirehafe iareo zay ty Pilato, le vao mainke natahotse. 9 Hafarà’e reke nizilike tan-tragno’e ao indraike sady hoe reke tamy i Jesosy: “Boake aia maregne iheo?” Faie tsy namale aze ty Jesosy. 10 Hoe areke ty Pilato tama’e: “Tsy hamale ahy zane rehe? Tsy fanta’o vao tie managne fahefagne hamotsotse azo raho sady managne fahefagne hamono azo ka?”* 11 Hoe ty navale i Jesosy aze: “Tsy ho nanagne ze fahefagne zay amako rehe, naho tsy niazo’o boake ambone agney. Izay ty mahavy i lahilahy nanolotse ahy ama’oy ho bey hakeo ambone’o.”

12 Izay ty nahavy i Pilato nipay fomba avao mba hamotsoragne i Jesosy. Faie nikorakorake o Jiosio tie: “Naho votsora’o o lahilahy iohoe, le tsy ragne i Kaisara rehe. Ze ndaty manao ty vata’e ho mpanjaka, le manohetse i Kaisara.” 13 Naho fa naharey ze reha iareo zay ty Pilato, le nente’e niboake ty Jesosy. Nitoboke tamy i seza fitsaragne amy i toeragne atao tihoe Kiririsa Vatoy eo reke. Gabata ty agnara o toeragne iohoe amy ty rehake hebreo. 14 Tamy lera fahaenegne teo ho eo* tamy izay sady andro Fiomanagne tamy i Pasakey. Le hoe ty Pilato tamo o Jiosio: “Io i mpanjaka’areoy!” 15 Faie nikorakorake iareo tie: “Vonò agne reke! Vonò! Peho amy ty boda-katae reke!”* Le hoe ty Pilato tamy iareo: “Hovonoeko vao i mpanjaka’areoy?” Le hoe ty navale o lahibey ty mpisorogneo: “I Kaisara avao ty mpanjaka’ay.” 16 Le natolo’e iareo ty Jesosy mba hopehegne amy ty boda-katae.

Nindese iareo areke ty Jesosy. 17 Ireke avao ty ninday i hazo fijaleagne hipehagne azey amy i toeragne atao tihoe Karakan-doha zay agne. Golgota ty agnara o toeragne iohoe amy ty rehake hebreo. 18 Nipehe iareo tamy ty boda-katae reke naho fa niavy agne. Nisy lahilahy roe rezay ka nipehe iareo tamy ty boda-katae, le natao iareo tan-kavia’e naho tan-kavana’e eo, fa i Jesosy tagnivo iareo eo. 19 Nanoratse tamy ze pilàke zay ka ty Pilato, le natao’e tamy i hazo fijaleagney eo. Izao i soratsey: “I Jesosy te Nazareta, Mpanjaka o Jiosio.” 20 Maro ty Jiosy namaky o soratse iohoe satria narine i tanàgney ty toeragne nipehagne i Jesosy tamy i boda-kataey. Sinoratse tamy ty rehake hebreo naho latina vaho grike o rehake rehoe. 21 Faie hoe o lahibey ty mpisoro o Jiosiò tamy i Pilato: “Ko atao tihoe: ‘Mpanjaka o Jiosio’, fa anò tihoe: ‘Mpanjaka o Jiosio raho’, satria izay ty rineha’e.” 22 Hoe ty navale i Pilato: “Ze fa sinorako eo, le fa ie zay.”

23 Naho fa nipehe i maramila rey tamy ty boda-katae ty Jesosy, le nalae iareo i akanjo’e ivela’ey, le zinara iareo efatse, le sambe nahazo iareo tsikiraidraike. Nafaha iareo ka i akanjo’e agnate’ey. Tsy misy zaitse o akanjo’e iohoe fa tinenogne avao boake ambone agne hatrake ambane agne. 24 Nifampirehake areke iareo tie: “Tsy horiatentikagne toy, fa andao tika hanao kitsapake mba hahafantarantikagne ty hahazo aze.” Niseho ze raha zay, amy izay tanterake ty raha rehafe ty Soratse Masigne tihoe toy tie: “Zinara iareo i akanjobeikoy, le i akanjokoy nanoa iareo kitsapake.” Izay vata’e ty raha natao i maramila rey.

25 Nitsangagne narine i hazo fijaleagne nipehagne i Jesosỳ teo ty rene’e naho i rahavaven-drene’ey vaho i Maria valy i Kleopasy naho i Maria Magdalena. 26 Naho fa nahatrea an-drene’e naho i mpianatse tea’ey nitsangagne teo ty Jesosy, le hoe reke taman-drene’e: “O rampela, ingo ty ana-dahi’o!” 27 Le hoe ka reke tamy i mpianatsey: “Ingo ty rene’o!” Nanomboke tamy izay, le nente i mpianatsey ho ama’e agne ty Maria.

28 Tafara izay, le nihay i Jesosy tie fa nivita’e iaby i raha nampanoen-dRae’e aze rey. Le nirehake hoe izao ka reke naho fa niavy eo: “Marandrano raho.” Nagnatanterake i raha nirehafe ty Soratse Masigney reke naho fa nanao izay. 29 Nisy kope feno divay makira zay ty teo. Nangalake eponzy areke iareo, le najo iareo tagnate i divay makiray ao. Natao iareo tamy ze tahona hisopa* zay i eponzỳ naho fa niavy eo, le natoho iareo am-bava i Jesosy eo. 30 Naho fa nagnandragne tamy i divay makiray ty Jesosy, le nirehake tihoe: “Vita!” Naondre’e i loha’ey, le nipototse ty fiai’e.

31 Satria andro Fiomanagne tamy i Sabatay tamy izay, le nangatake tamy i Pilato o Jiosio mba hanapahagne ty ranjo i ndaty nipehegne rey, amy izay hafahagne amy i hazo fijaleagney ey ty fate iareo, tsy mone hotra i Sabatay ey (Sabata bey tamy izay). 32 Niavy areke i maramila rey, le nanapake ty ranjo i lahilahy roe nipehegne tamy ty boda-katae tagnila i Jesosy eo rey. 33 Faie naho fa niavy tamy i Jesosy eo iareo, le nitrea iareo tie fa nimate reke, hafarà’e tsy nitapahe iareo sasa i ranjo’ey. 34 Faie tinombo ty raike amy i maramila rey lefogne tamy ty leme’e ty Jesosy, le avy le nisy lio naho rano nikararake. 35 Vavolombelo izay i nahatrea maso azey sady maregne ty raha rehafe’e. Hay o mpianatse iohoe fa maregne ty raha rehafe’e, le nirehake o raha rehoe reke, amy izay mino ka nareo. 36 Niseho o raha rehoe, amy izay tanterake ty raha nirehafe ty Soratse Masigne tihoe toy tie: “Tsy hisy hotapake* ndra raike ty taola’e.” 37 Hoe ka ty andine’e hafa amy ty Soratse Masigne ao: “Hagnente i nitombohe iareo lefogney iareo.”

38 Tafara ze raha rezay, le nangatake tamy i Pilato ty Josefa boake a Armatia agne tie, azo’e afahagne amy i hazo fijaleagney ey vao i fate i Jesosỳ. Le nimea i Pilato alalagne reke. Nandeha mbeo areke reke, le nafaha’e i fate i Jesosỳ sady nindese’e. Mpiana i Jesosy o lahilahy iohoe faie tsy nirehadrehake tama o ndaty noho ty fatahora’e o Jiosio. 39 Niavy eo ka ty Nikodemosy, i lahilahy nandeha tamy i Jesosy agne tie indraike halegney. Ninday miora mifangaro aloesy, 100 livatse eo ho eo* reke. 40 Nafaha iareo areke i fate i Jesosỳ, le nifognose iareo tamy ze lamba fanjaka nisia iareo raha magnitse zay, arake ty fombafomba fandevegna o Jiosio. 41 Nisy teteke ty tamy i toeragne namonoagne azey* eo. Nisy kibory vaovao vaho nilavahagne sady mbe tsy nandevegnagne zay ty tao. 42 Naleve iareo tao ty Jesosy satria Andro Fiomana o Jiosio amy i Sabatay tamy izay sady toe narine teo ka o kibory iohoe.