Talily Soa Nisorate i Matio

23 Ie naho fa niavy eo, le hoe ty Jesosy tamy i vahoakey naho tamy i mpiana’e rey: 2 “Nametrake ty vata’e amy i toera i Mosesỳ eo o mpampianatse lalànao* naho o Fariseò. 3 Izao areke: Anò naho oriho areke ze raha rehafe iareo ama’areo, faie ko anoegne ze raha atao iareo, satria mirehake avao iareo fa tsy magnorike i raha rehafe iareoy. 4 Avory iareo o entagne mavesatseo, le ampitarazoe iareo o ndatio, ie amy izao ndra ty rambotagna iareo tsy mitsapa i entagney. 5 Ze kila raha atao iareo, le atao’e mba hotrea o ndatio. Habeize iareo zao ohatse, i boate misy andinin-teny boake amy ty Soratse Masigne atao iareo fiaroy. Halavae iareo ka ty ramborambo i akanjo iareoy. 6 Teà iareo ty toeragne miambake natokagne hoahy ty ndaty ambone naho fa amo o feteo agne. Teà iareo ka ty mitoboke aloha ey naho fa amo o sinagogao ao, 7 ty hosalamaegne am-pagnajagne naho fa a bezara ey naho ty hotokavegne tihoe Raby.* 8 Faie ianareo, ko mete tokavegne tihoe Raby, satria raike avao ty Mpagnanatse anareo, sady mpirahalahy iaby nareo. 9 Fagnampe izay ka, ko mitoka ndra ia ndra ia an-tane etoy ho rae’areo satria raike avao ty Rae’areo, le i Aze an-dagnitse agney. 10 Ko magneke hotokavegne tihoe mpitarike ka nareo satria raike avao ty Mpitarike anareo, le i Kristy. 11 Faie ze fara’e ambone ama’areo ro tsy maintsy ho mpanompo’areo. 12 Haetre ze magnambone tegna, fa ze miambane ro hasondrotse ambone.

13 “Loza ty hanjò anareo mpampianatse lalàna naho Fariseo mpanao soa miatrekeo, satria sakana’areo o ndatio mba tsy hilitse amy i Fanjakà i lagnitsey ao. Inareo tsy mba mizilike ao, ie amy izao ze ndaty te hizilike ao sakana’areo. 14 ——

15 “Loza ty hanjò anareo mpampianatse lalàna naho Fariseo mpanao soa miatrekeo, satria nitsake riake naho nitete tane nareo, mba handreseagne lahatse o ndatio hiova finoagne.* Faie naho fa miova i ndatỳ, le atao’areo fagneva ty hatorake amy i Gehena agne ambonembone’areo.

16 “Loza ty hanjò anareo goa mpitari-dalagneo. Rehafe’areo tie: ‘Naho misy ndaty manao vava amy i tempolỳ, le tsy magnahy ndra tie tsy vitae’e i vava natao’ey. Fa naho misy ndaty manao vava amy ty volamena i tempolỳ, le tsy maintsy vitae’e i vava natao’ey.’ 17 O ry minegne naho ry goa, ty aia ty tena lahibey, i volamenay vao sa i tempoly mahavy i volamenay ho masigney? 18 Mirehake ka nareo tie: ‘Naho misy manao vava amy i alitaray, le tsy magnahy ndra tie tsy vitae’e i vava natao’ey. Fa naho misy manao vava amy ty fagnomezagne hatolotse ambone i alitaray eo, le tsy maintsy vitae’e i vava natao’ey.’ 19 O ty goa retoa, ty aia ty tena lahibey, i fagnomezagney vao sa i alitara mahavy i fagnomezagney ho masigney? 20 Ndra ia ndra ia manao vava amy i alitaray, le tsy amy i alitaray avao ty anoa’e vava fa amy ze raha iaby atolotse amy i alitaray eo ka. 21 Le ndra ia ndra ia ka manao vava amy i tempolỳ, le tsy amy i tempolỳ avao ty anoa’e vava fa amy i miambesatse aoy ka. 22 Le ze manao vava amy i lagnitsey, le manao vava amy ty sezan-droandrian’Andrianagnahare naho amy i miambesatse ambone’eoy.

23 “Loza ty hanjò anareo mpampianatse lalàna naho Fariseo mpanao soa miatrekeo, satria magnomey ty ampahafolo o solilao naho o anetao vaho o kominao nareo, faie tsy darea’areo ty raha tena lahibey* amy i Lalànay ao. Agnisa izay tihoe manao ty rare’e, ty mamindra fo vaho ty ho azo atokisagne.* Ilaegne ty magnomey ty ampahafolo i raha rey, faie tsy atao ambanen-draha ka o raha hafa rehoe. 24 O ry goa mpitari-dalagne, o mokegneo afaha’areo amy ty raha inome’areo, ie amy izao o ramevao agodra’areo avao.

25 “Loza ty hanjò anareo mpampianatse lalàna naho Fariseo mpanao soa miatrekeo, satria liove’areo ty ivela o kopeo naho o fingao, ie amy izao ty agnate iareo ao feno hatea tegna naho fagnirian-draty tsy voafehe. 26 O ry Fariseo goa, liovo hey ty agnate o finga’areò ao naho o kope’areò, vaho izay halio ka ty ivela’e.

27 “Loza ty hanjò anareo mpampianatse lalàna naho Fariseo mpanao soa miatrekeo, satria nareo manahake o kibory nilaloragne fotio, le soasoa ty ivela’ey, fa ty agnate’e ao feno taolam-pate naho raha logne.* 28 Hoe izay ka nareo satria ty ivela’e etoy, le hoe ndaty maregne ty fahatreava o ndatio anareo, faie ty agnate’areo ao feno fanoagne soa miatreke naho tsy fagnorihan-dalàna.

29 “Loza ty hanjò anareo mpampianatse lalàna naho Fariseo mpanao soa miatrekeo, satria mamboatse ty kibory o mpaminanio naho magnengohengo ty kibory o ndaty maregneo nareo. 30 Mirehake nareo tie: ‘Naho nivelogne tamy ty andro ty razambei’ay zahay, le tsy ho niarake amy iareo nampitè ty lio o mpaminanio.’ 31 Ty vatategna’areo avao hinane zay ro mirehake tie tarana i ndaty namono o mpaminanio rey nareo. 32 Vitao’areo hatrake am-para’e areke i raha raty natao i razambei’areoy rey.*

33 “Ry tarana o meregne misy poizigneo, mieretseretse vao nareo tie hovita’areo ty hilay mba tsy hatorake amy i Gehena agne? 34 Nagnirake o mpaminanio naho o ndaty hendreo vaho o mpagnanatseo ho ama’areo agne raho, faie ty ila’e amy iareo vinono’areo, ty ila’e nahanto’areo amy ty boda-katae, le ty ila’e nikaravasie’areo amo o sinagogao ao vaho pinai’areo mbaombao amy ze tanàgne misy aze. 35 Amy izay le hivale ama’areo iaby ty lio i ndaty maregne natè’areo an-tane eo rey. Nanomboke tamy ty lio i Abela hatrake amy ty lio i Zakaria ana i Barakia, i nivonoe’areo tampagnivoa i toeragne masigney naho i alitaray teoy. 36 Volagneko ama’areo to vata’e, fa hifotetse iaby amy ty taranake toy ze raha iaby zay.

37 “O Jerosalema, Jerosalema, i mpamono mpaminany naho mpitorake vato ze ndaty irahegne ho ama’e aoy. Fagnimpireko zay ty te hamory o ana’ò, manahake ty atao o akoho mamory ty ana’e ambane ela’e aò! Faie tsy nimete rehe. 38 Hengagne eo areke i anjomba’areoy ho anareo. 39 Rehafeko ama’areo fa tsy hahatrea ahy sasa nareo manomboke amy izao hatrake amy ty hirehafa’areo tie: ‘Hotahiegne abey i avy amy ty tahina i Jehovah-y!’”