Taratasy Voaloha’e Hoahy o Korintianao

6 Naho misy ama’areo tsy mifagnarake amy ty hafa, le tsy hahamegnatse aze vao ty hitory i rahalahi’ey amo o fitsaragneo ey, agnatreha o ndaty tsy maregneo eo? Tsy ndra aleo’e vao mandeha amo o ndaty masigneo agne reke? 2 Sa, tsy fanta’areo fa hitsara ty tontolo toy o ndaty masigneo? A naho hitsara ty tontolo toy nareo, le tsy hovita’areo vao ty handamigne ty olagne tena madinedineke? 3 Tsy fanta’areo vao fa hitsara o anjelio tika? A nagnino ro tsy ho vitantika ty hamaha ty olagne amy ty fiaignantika amy izao? 4 Naho managne olagne toko’e halamigne areke nareo, le o ndaty tsy agnisa o fiangonagneò vao ro tendre’areo hitsara anareo? 5 Mirehake izay raho mba hahamegnatse anareo. Le tsy mba misy ndaty mahilala ndra raike afake mandamigne ty olagne misy amo o rahalahi’eo eo vao ty ama’areo eo, 6 ro mahavy ty rahalahy raike mitory i rahalahi’ey amo o fitsaragneo agne, agnatreha o tsy mpinò eo?

7 Naho ty maregne aza, naho inareo mifampitory, le fa fahareseagne ho anareo zay. Tsy ndra aleo’areo vao magneke hihara ty tsy rare’e? Tsy ndra aleo’areo ka vao magneke hokatramoegne, 8 ta tie hanao ty tsy rare’e naho hikatramo i rahalahi’areoy?

9 Sa tsy fanta’areo vao fa ty ndaty tsy maregne, le tsy handova i Fanjakàn’Andrianagnaharey? Ko magneke ho fitahegne nareo. Ty mpijangajanga, ty mpanompo sampy, ty mpagnitsakitsa-baly, ty lahilahy magneke hilaen-dahilahy, ty lahilahy mila lahilahy, 10 ty mpangalatse, ty ndaty tsy mete afa-po, ty mamo lava, ty mpanivetive naho ty mpandrava magnente, le tsy handova i Fanjakàn’Andrianagnaharey. 11 Fa nimpanao izay ty ila’e ama’areo tie taloha, faie fa sinasa malio naho nihamasignegne. Fa nambara ho maregne tamy ty agnara i Jesosy Kristy Tompo naho ty fagnahy masy i Andrianagnaharentikagney nareo.

12 Azoko atao ze kila raha, faie tsy ze kila raha ro mahasoa. Azoko atao ze kila raha, faie tsy misy ndra inogn’ino hengako hamehefehe ahy. 13 O hanegneo, le natao hoahy o trokeo, le o trokeo natao hoahy o hanegneo. Faie sambe hofoagnan’Agnahare iareo roe. Tsy natao hoahy o fijangajangagneo o vatagneo fa natao hoahy i Tompo, le i Tompo hoahy o vatagneo. 14 Faie fa nivelomen’Agnahare tamy ty mate ty Tompo, le hovelomegne amy ty mate ka tikagne amy ty alala ty heri’e.

15 Tsy fanta’areo vao fa ratsambata i Kristy o vata’areò? Halaeko vao areke o ratsambata i Kristy reo, le haharoko amy ty makorely? Sagnatria zay! 16 Tsy fanta’areo vao fa ndra ia ndra ia miharo amo o makorelio, le manjare vatagne raike ama’e? Ty anto’e, misaontsy ty Andrianagnahare tie, “ho nofotse raike avao iareo roe.” 17 Fa ze miharo amy i Tompo, le hitovy saigne* ama’e. 18 Ilaiso o fijangajangagneo! Ze fahotagne hafa iaby atao o ndatio, le ivela ty vata’e, fa ze mpijangajanga, le manota amy ty vata’e avao. 19 Tsy fanta’areo vao fa tempoly i fagnahy masigne ama’areo ao, niazo’areo boake aman’Agnaharey ty vata’areo? Sady toe tsy anareo ka i vata’areoy, 20 satria fa vinily nareo. Naho izay areke, le omeo voninahitse amy ty alala ty vata’areo ty Andrianagnahare.