Talily Soa Nisorate i Matio

14 Tamy ze fotoagne zay, le naharey ty miomba ty raha natao i Jesosy ty Heroda lahibeim-paritse. 2 Le hoe reke tamo o mpanompo’eo: “I Jaona Mpanao Badisa zay. Nivelogne tamy ty mate reke, le izay ahavita’e fahagagagne hoe izaio.” 3 Toe fa nitsepahe i Heroda ty Jaona, le ginadra’e sady nirohiza’e tam-pirizò agne noho ty amy i Herodiasy valy i Filipo rahalahi’e. 4 Satria nirehake mateteke i Heroda avao ty Jaona tie: “Naho i lalànay ro henteagne, le tsy azo’o atao ty manambaly o ampela iohoe.” 5 Faie ndra tie te ho namono i Jaona aza reke, le tsy niafake nanao izay noho ty fatahora’e o vahoakeo. Ty anto’e, nino i vahoakey tie mpaminany ty Jaona. 6 Faie naho fa nankalaza ty andro niterahagne aze ty Heroda, le nandihy i anak’ampela i Herodiasỳ tamy izay. Tena nitea i Heroda ty dihy i somondraray. 7 Hafarà’e reke nanao vava tie homei’e i somondraray iaby ze raha angatahe’e. 8 Faie nimean-drene’e loha i somondraray, le izao ty rineha’e: “Ento mbamako mbetoa amy ty finga ty loha i Jaona Mpanao Badisa.” 9 Nalahelo i mpanjakay naho fa naharey izay, faie nitanterahe’e avao zay noho i vava natao’ey naho ty hegna’e i ndaty niarake nihinagne tama’e teo rey. 10 Le nagnirake maramila reke mba hanapake ty loha i Jaona am-pirizò agne. 11 Nentegne amy ty finga areke i loha i Jaonay, le nimeagne i somondraray, le nente i somondraray aman-drene’e agne ka. 12 Tafara izay, le nalae i mpiana’e rey agne ty fate i Jaona, le naleve iareo. Ie naho fa niavy eo, le nandeha mbamy i Jesosy mbeo iareo mba hitalily izay. 13 Naho fa naharey izay ty Jesosy, le niala ty eo. Nandeha lakagne amy ze toeragne mitokagne zay agne reke satria mba te ho irerike. Faie nirey i vahoakey zay, hafarà iareo nienga i tanà iareoy, le nandeha tomboke nagnorike i Jesosy.

14 Naho fa nitoly a moro’e ey ty Jesosy, le nahatrea ndaty maro. Niferegnesa’e iareo, le nisitragne’e tamy ty aretegne nahazo iareo. 15 Ie nifolakandrokandro i androy, le nimbama’e mbeo i mpiana’e rey, le nirehake tie: “Mitokagne ty toeragne toy sady fa ho hariva ka i androy, magnino naho ravà’o agne o ndaty reo mba holia’e hipaliava iareo tanàgne hivilia’e hanegne?” 16 Faie hoe ty Jesosy tamy iareo: “Tsy voatere handeha iareo, fa meo’areo raha hohane’e.” 17 Le hoe iareo tamy i Jesosy: “Mofo dime naho fiagne roe avao anio ty anagna’ay!” 18 Le hoe reke tamy iareo: “Indeso’areo atoy zay.” 19 Le nirehafe i Jesosy i ndaty maroy mba hitoboke amy i ahetsey ey. Ie naho fa niavy eo, le nalae’e i mofo dime naho i fiagne roe rey, le niandrandra i lagnitsey reke sady nivavake. Naho fa boake nitapatapahe’e i mofo rey, le nimea’e i mpiana’e rey, le i mpiana’e rey ka ty nizara aze amy i ndaty maroy. 20 Nihinagne areke iareo iaby, le nivontsy.* Naho fa navory i mpiana’e rey ty sisa tsy lany tamy i mofoy, le nahafeno 12 harogne. 21 Lahilahy 5 000 teo ho eo ty teo tamy izay, ankoatse ty ajaja aman’ampela. 22 Ie naho fa niavy eo, le avy le nampijogne’e agnate lakagne ao i mpiana’e rey, mba handeha a moro’e raike eroy aloha, fa ireke mbe nandrava i ndaty maroy.

23 Naho fa boake nandrava i ndaty maroy reke, le nandeha am-bohitse agne mba hivavake. Tagne avao reke irery ndra tie fa nihalegne aza i androy. 24 Fa nilavitse bey* i moro’ey i lakagne nandehana i mpiana’e reỳ. Nitioke i androy tamy izay, le nagnonja bey i riakey, hafarà i mpiana’e rey nisahiragne ty nivey i lakagney, satria nitohere i tiokey. 25 Faie tamy i lera fiambenagne fahaefatse* amy i halegneỳ, le nandeha mbamy iareo mbeo tambone riake ey ty Jesosy. 26 Naho fa nahatrea aze nandeha ambone riake ey i mpiana’e rey, le natahotse. Hoe iareo: “Indroy misy raha hafahafa rikiahe!” Le nikorakorake iareo satria natahotse. 27 Faie hoe ty Jesosy tamy iareo: “Ko matahotse nareo fa iraho avao toy.” 28 Le hoe ty Petera tama’e: “O Tompo, naho toe ihe vata’e io, le engao raho handeha mbama’o mbeo ambone rano ey.” 29 Le hoe ty Jesosy: “Mbetoa areke.” Le nizotso boake agnate lakagne ao ty Petera, le nandeha ambone rano ey mbamy i Jesosy mbeo. 30 Faie naho fa nahatrea i tiobeỳ reke, le natahotse. Hafarà’e reke nanomboke nilenteke. Nikorake mafe reke tie: “O Tompo, rombaho raho!” 31 Le avy le nirombahe i Jesosy i tagna’ey, le nisintone’e boake ao reke. Le hoe ty Jesosy tama’e: “Ry kele finoagne, nagnino rehe ro nanjare nisalasala?” 32 Ie iareo nijogne agnate lakagne ao, le nijanogne i tiobeỳ. 33 Ie naho fa niavy eo, le niankohoke tama’e teo ze mpiana’e tagnate i lakagney ao, sady nirehake tie: “Anan’Agnahare vata’e rehe.” 34 Nandeha iareo, le nijanogne naho fa niavy amy ze tanàgne atao tihoe Genesareta zay.

35 Naho fa nahafantatse aze ty ndaty tamo o tanàgne iohoe tao, le nikoike tamy ty faritse iaby nagnodidigne ey. Le nente o ndatio ama’eo ze narare. 36 Nangatake ama’e i ndaty rey mba henga’e hitsapa ty ramborambo i akanjo’ey. Ze nanao izay, le nisitragne tanterake tamy ze aretegne nahazo aze.