Talily Soa Nisorate i Lioka
7 Naho fa nivita ty raha nirehafe i Jesosy tamy i vahoakey, le nilitse ta Kapernaomy ao reke. 2 Nisy mpanompo ty maramila manam-boninahitse raike zay narare mafe fa ho nimate. Tena nitea’e o mpanompo’e iohoe. 3 Naho fa naharey ty miomba i Jesosy reke, le nagnirake ty ila’e amo o androanavio ho mbamy i Jesosy mbeo hirehake aze, mba ho avy ama’e agne hagnasitragne i mpanompo’ey. 4 Naho fa niavy tamy i Jesosy agne iareo, le nihalale tama’e tihoe: “Mangatake azo zahay mba hagnampe aze, satria ndaty soa reke. 5 Tea’e ty firenentikagne toy, sady le ty vatategna’e ka ty namboatse i sinagogantikagney.” 6 Nandeha niarake tamy iareo areke ty Jesosy. Faie, ie reke fa narine ho avy tan-tragno i maramila manam-boninahitsey agne, le nisy nama i maramila manam-boninahitsey nirahe’e mba hirehake amy i Jesosy tie: “O aba, ko mandeha an-tragnoko agne rehe fa tsy fagneva ty handrambe azo an-tragnoko agne raho. 7 Izay nahavy ahy tsy nandeha mbama’o mbeò. Fa mirehafa avao rehe, le hositragne i mpanompokoy. 8 Satria ndra izaho ka managne ndaty afake mikomandy ahy hoe izay, sady managne maramila afake komandieko hoe izay ka. Le naho fa mirehake amy ty raike raho tie: ‘Mandehana!’ le mandeha reke, le amy ty raike ka tie: ‘Avia!’ le avy reke. Naho rehafeko ka o mpanompokò tie: ‘Anò toy!’ le anoe’e i raha ampanoeko azey.” 9 Nilatsa ty Jesosy naho fa naharey o raha rehoe. Le nitolike tamy i vahoake nagnorike aze rey agne ty Jesosy sady nirehake tihoe: “Rehafeko ama’areo fa mbe tsy nahatrea ndaty tena nanam-pinoagne hoe izay raho, ndra tamo o Israelio eo aza.” 10 Naho fa niheregne tan-tragno i maramila manam-boninahitsey agne i ndaty nirahe’e rey, le nitrea iareo tie fa nisitragne i mpanompo’ey.
11 Ie tsy ela tafara izay, le nandeha ta Naina agne ty Jesosy naho i mpiana’e rey vaho i vahoake nagnorike aze rey. 12 Naho fa narine ty vavahady i tanàgney reke, le nahatrea fate ty ajalahy raike nente o ndaty mba halevegne. Vantotse ty rene o ajalahy iohoe, sady ireke avao ka ty ana’e. 13 Naho fa nitrea i Tompo i ampela mate anakey, le niferegnesa’e sady hoe reke tama’e: “Soa hinane zay fa ko tomagny sasa.” 14 Nandeha mbamy i fatey mbeo ty Jesosy naho fa niavy eo, le nitsapae’e i raha nindesagne i fateỳ, le nijanogne i ndaty ninday aze rey. Hoe ty Jesosy tafara izay: “O kahe, hoe raho ama’o, mifohaza!” 15 Le niaregne i lahilahy fa nimatey sady nanomboke nirehake. Nimey i Jesosy an-drene’e reke naho fa niavy eo. 16 Le natahotse iareo sady nagnomey voninahitse an’Andrianagnahare tihoe: “Misy mpaminany lahibey ty amantikagne eto”, naho tihoe: “Niferenaigne o vahoa’eo ty Andrianagnahare.” 17 Niely nagneragne i Jodia naho tamy ty faritse nagnodidigne ey ze vaovao zay.
18 Natalily i mpiana i Jaona rey aze ze raha rezay. 19 Nitokave i Jaona areke ty roe lahy tamy i mpiana’e rey, le nirahe’e mbamy i Tompo mbeo mba hagnontane aze tie: “Irehe vao i Ndaty Ho Avy Linigney sa mbe mandigne ndaty hafa zahay?” 20 Naho fa niavy tamy i Jesosy agne iareo, le nirehake tie: “Nirahe i Jaona Mpanao Badisa zahay mba hagnontane azo tie: ‘Irehe vao i Ndaty Ho Avy Linigney sa mbe mandigne ndaty hafa zahay?’” 21 Maro ty ndaty narare nisitràgne i Jesosy tamy izay. Narare mafe ty ila’e amy iareo. Nandroake demonia naho nampahatrea ze goa ka reke. 22 Hoe areke ty navale’e iareo: “Mandehana, le atalilio’areo i Jaona ty raha nitrea’areo naho nirei’areo: Nampahatreavegne ty ndaty goa, nampandehanegne ty ndaty maleme, niliovegne ty ndaty voa ty habokagne,* nampahareizegne ty ndaty karegnegne, nivelomegne indraike ty ndaty nimate, le ty ndaty mahantra nirehafagne i talily soay. 23 Sambatse ze ndaty tena matoky ahy.”*
24 Naho fa nandeha i ndaty nirahe i Jaona rey, le nirehake ty miomba aze tamy i vahoake rey ty Jesosy tie: “Hagnente ino nandehana’areo niboake tam-patrambey agneo? Bararata raike aviombio o tiokeo vao? 25 Sa niboake mba hagnente ino inareò? Ndaty magnisy akanjo fanjaka vao? Amy ty tragno o mpanjakao agne ro misy ndaty magnisy akanjo fanjaka sady managne raha soa. 26 Hagnente inogne maregne areke o anto’e niboaha’areò? Hagnente mpaminany vao? Eka. Rehafeko ama’areo, fa lahibey lavitse mandikoatse o mpaminanio reke. 27 Izao ty voasoratse miomba aze: ‘Hiraheko aloha’o eo i irakoy mba hagnomagne ty lalagne homba’o.’ 28 Rehafeko ama’areo, fa tsy misy lahibey ambone i Jaona naho mbe ndaty nateran’ampela avao. Faie lahibey ambone’e ze ndaty fara’e kidikidy amy i Fanjakàn’Andrianagnaharey ao.” 29 (Naho fa naharey izay i vahoakey naho o mpitake hetrao, le nirehake tie maregne ty Andrianagnahare. Ty anto’e, nagneke hatao i Jaona badisa iareo. 30 Fa o Fariseò naho o ndaty nahay Lalànao tsy nagnorike ty toroheven’Andrianagnahare, satria tsy nimete hatao i Jaona badisa.)
31 Hoe ka ty Jesosy: “Ia areke ty hampitovieko amy ty taranake toy? Manahake an’ia iareo? 32 Manahake o ajaja mitoboke a bezara eio, le mifampitoka tihoeo tie: ‘Fa nitiofe’ay i solỳ faie tsy mba nitsinjake nareo; fa nanao hira fisaognagne ka zahay faie tsy mba nitagny nareo.’ 33 Hoe izay ka, fa naho fa niavy ty Jaona Mpanao Badisa, le tsy nihinagne mofo sady tsy ninogne divay. Faie hoe nareo: ‘Misy demonia reke.’ 34 Ie ka i Ana o ndatỳ nihinagne sady ninogne, le hoe nareo: ‘Henhenke ty lahy tea hanegne naho mamo lava sady nama o mpitake hetrao naho o mpanotao tike!’ 35 Faie ty fahendrea o ndatio, le hamaregne ty raha atao’e.”*
36 Nisy Fariseo raike zay nisisike hanasa i Jesosy avao mba hihinagne ama’e agne. Naho fa nizilike tan-tragno i Fariseoy ao reke, le nandre nitso-kiho amy i latabatsey eo mba hihinagne. 37 Nisy ampela raike nalaza ho mpanota tamy i tanàgney eo zay nahay tie nihinagne tan-tragno i Fariseoy ao ty Jesosy. Ninday tavoangy kedekede misy menake magnitse zay reke. 38 Nanongaleke tan-tombo i Jesosy eo reke, le nilegna’e tamy ty ranomaso’e i tombo i Jesosỳ, sady finafa’e tamy ty volo’e naho fa niavy eo. Norofa’e ka i tombo i Jesosỳ sady niligna’e i menake magnitsey. 39 Naho fa nahatrea izay i Fariseo nanasa azey, le hoe reke tagn’eretsere’e agne: “Naho toe mpaminany vata’e ty lahy tiagne, le ho nihai’e tie ia o ampela mitsapa azeo sady manao akore ka ty findesam-bata’e. Toko’e le avy le ho nihai’e tie mpanota reke.” 40 Faie hoe ty Jesosy tama’e: “O Simona, misy raha teako horehafegne ama’o zay.” Le hoe ty Simona: “Eka Mpagnanatse, rehafo.”
41 Le hoe ty Jesosy: “Nisy lahilahy roe nanagna ty mpampitrosa vola raike trosa. Ty raike tamy iareo nanagna’e 500 denaria, fa ty raike 50 denaria. 42 Faie naho fa tsy nanagne ndra inogn’ino hagnavahagne i trosay iareo, le nafoe i mpampitrosa volay tamy iareo agne iaby i vola’e rey. 43 Ia amy iareo roe lahy areke ro tena hotea i mpampitrosa volay?” Le hoe ty Simona: “I raike namoeza’e vola beỳ, hoe raho.” Le hoe ty Jesosy tama’e: “Tò zay.”* 44 Le nitolike tamy i ampelay agne ty Jesosy, sady hoe reke tamy i Simona: “Trea’o ty ampela tiagne, nizilike tan-tragno’o ato raho faie tsy nimea’o rano mba hanasako tomboke. Fa ireke nanasa ty tomboko tamy ty ranomaso’e sady nifafà’e tamy ty volo’e ka i tomboko rey mba himaiha’e. 45 Tsy nagnoroke ahike ka rehe. Fa o ampela iohoe tsy nado’e ty oroke ty tomboko amparake ze niavia’e ato zay. 46 Tsy niligna’o menake ka ty lohako. Fa o ampela iohoe niligna’e menake magnitse ty tomboko. 47 Rehafeko ama’o areke, fa ndra tie maro aza ty fahotagne natao o ampela iohoe, le voavela iaby, izay ty nahavy aze nibey hatea. Fa naho kedekede avao ty fahotagne amelagne ty ndaty raike, le kedekede ka ty hatea aseho’e.” 48 Hoe ty Jesosy tamy i ampelay naho fa niavy eo: “Voavela ty fahota’o.” 49 Faie ze nihinagne teo nifampirehake hoe izao: “Ia ka ty lahy tiagne ro managne fahefagne hamela heloke?” 50 Faie hoe ty Jesosy tamy i ampelay: “Ty finoa’o ro nahavoavonje azo. Akia mandehana, le ko minekoneko sasa.”