Taratasy Voaloha’e Hoahy o Tesalonianao

4 Fara’e, ry rahalahy, arake i toromareke niazo’areo boake ama’ay miomba ty toko’e handehana’areo mba hampifaleagne an’Agnaharey, i toe fa andehana’areo naho ty maregney, le mangatake ama’areo naho mihalale ama’areo amy ty alala i Jesosy Tompo zahay, mba ho vao mainke hanao izay soa lognandro. 2 Hai’areo tie boake amy i Jesosy Tompo i toromareke* nimea’ay anareo rey.

3 Ty anto’e, izao ty zoton’arofon’Agnahare: Toko’e ho masigne nareo sady hifaly ty fijangajangagne. 4 Sambe toko’e hahafehe tegna nareo tsikiraidraike, agnate ty fahamasignagne naho haja, 5 fa tsy amy ty fagniriagne tsy mete afa-po naho ty filagne tsy voafehe, manahake ty anagna o ndaty boake amy ty firenena hafa tsy mahafantatse an’Agnahareo. 6 Tsy misy toko’e hihoatse ty fetra naho hagnararaotse ty rahalahi’e amy ze raha zay, satria ty Jehovah magnasaze ty ndaty manao o raha rehoe iaby, arake ty fa nirehafe’ay mialoha tama’areo naho ty fa nampitaoa’ay mafe anareo. 7 Ty anto’e, i Andrianagnahare tsy nikanjy antika ho amy ty fahalotoagne, fa ho amy ty fahamasignagne. 8 Ze ndaty tsy midare izay, le tsy ndaty ro tsy darea’e, fa i Andrianagnahare, i magnomey ty fagnahi’e masigne anareoy.

9 Fa naho ty miomba ty hatea rahalahy, le tsy mila manoratse ama’areo zahay, satria fa nampianaren’Agnahare hifankatea nareo. 10 Toe fa izay ty atao’areo amy ty rahalahy iaby magneneke i Makedonia. Faie mandrisike anareo zahay ry rahalahy, mba vao mainke hampitomboe’areo ty fanoa’areo izay. 11 Anò’areo tanjogne ty hiaigne am-pilaminagne, ty tsy hizilike amy ty fiaigna ty ndaty hafa, naho ty hiasa amy ty tagna’areo, arake ty toromareke nimea’ay anareo. 12 Amy izay hotrea ty ndaty ivela’e ey tie, mandeha am-pahitsiagne nareo, sady tsy misy raha mahaore anareo.

13 Tsy tea’ay ka ry rahalahy naho tsy hohai’areo ty miomba i aze fa nimate rey, amy izay nareo tsy malahelo, manahake o ndaty tsy managne fanantenagneo. 14 Ty anto’e, naho mino tika tie nimate ty Jesosy faie fa nivelomegne indraike, le hino ka tika tie hindesen’Agnahare miarake ama’e ze nimate tafaharo amy* i Jesosy. 15 Izao ty raha rehafe’ay ama’areo, arake i saontsy i Jehovah-y: Ze mbe velogne amantika hatrake amy i fagnatreha i Tompoy, le tsy hovelomegne aloha ze fa nimate. 16 Ty anto’e, ty vatategna i Tompo ro hizotso boake an-dagnitse agne, le hagnomey komandy mafe naho amy ty feon’Arkanjely miarake amy ty trompetran’Agnahare, le hovelomegne voaloha’e ze nimate tafaharo amy i Kristy. 17 Afara izay tika ze mbe velogne, le hoentegne amy i rahogney ey mba hifankatrea amy i Tompo amy i lagnitsey ey, naho hiarake amy iareo, sady lelia’e hiarake amy i Tompo avao tika. 18 Mifampahereza amo o rehake rehoe avao areke.