Taratasy Voaloha’e Hoahy o Korintianao

7 Naho ty miomba i raha nisorate’areoy, le izao ty vale’e: Tena soa hoahy ty lahilahy ty tsy mikasike ampela. 2 Faie noho ty fiparitaha o fijangajangagneo, le toko’e hanambaly ty lahilahy tsikiraidraike, le ty ampela tsikiraidraike ka toko’e hanambaly. 3 Toko’e hanao ty adidi’e amy ty vali’e ty lahilahy, le ty ampela ka toko’e hanao ty adidi’e amy ty vali’e. 4 Ty ampela tsy managne fahefagne amy ty vata’e, fa i vali’e ro managne fahefagne ama’e. Ty lahilahy ka tsy managne fahefagne amy ty vata’e, fa i vali’e ro managne fahefagne ama’e. 5 Toko’e hanao izay avao nareo naho tsy tihoe misy fotoagne fa natoka’areo tsy hanoagne izay, fa mba hatoka’areo hivavaha’areo. Afara izay nareo afake miharo indraike mba tsy hahavy i Satana hitsapa hevetse anareo, noho inareo tsy mahafehe tegna. 6 Faie torohevetse ze raha rehafeko zay fa tsy lily. 7 Irieko mba hanahake ahy ty ndaty iaby. Faie sambe managne ty fagnomezagne nimean’Andrianagnahare aze ty tsikiraidraike. Ty raike ho hoe izao fa ty hafa ho hoe izao.

8 Izao ka ty rehafeko amo o tsy manambalio naho amo o vantotseo: Tena soa naho mijanogne manahake ahy avao iareo. 9 Faie naho tsy mahafehe tegna iareo, le ndra aleo manambaly ta tie i fagniriagney ro hanjare hifehe iareo.*

10 Izao ty torohevetse omeako o manambalio, faie tsy boake amako zay fa boake amy i Tompo: Tsy toko’e hiala ty vali’e ty ampela.* 11 Faie naho miala reke, le tsy toko’e hanambaly, ndra ka azo’e atao ty miheregne amy i vali’ey agne. Ty lahilahy ka tsy toko’e hiala ty vali’e.

12 Izao ka ty rehafeko amy ty ila’e faie boake amako fa tsy boake amy i Tompo: Naho misy rahalahy manambaly tsy mpino sady magneke hiharo toboke ama’e ty vali’e, le tsy toko’e hiala ama’e reke. 13 Naho misy ampela ka manambaly tsy mpino sady magneke hiharo toboke ama’e ty vali’e, le tsy toko’e hiala amy i vali’ey reke. 14 Ty anto’e, i lahilahy tsy mpinoy, le manjare masigne noho ty amy i vali’e, le i ampela tsy mpinoy manjare masigne noho ty amy i rahalahy vali’ey. Naho tsy izay, le tsy halio ty ana’areo faie fa masigne iareo tie amy izao. 15 Faie naho ohatse i tsy mpinoy ro manapa-kevetse ty hiala, le engagne reke hiala. Naho izay ty raha misy, le tsy voatere hisisike hijanogne ama’e i rahalahy ndra i rahavave nengagney. Faie fa nitoka anareo ho amy ty fiadagnagne ty Andrianagnahare. 16 Hai’o avao vao rampela kera irehe ro hahavoavonje i vali’oy? Hai’o ka vao naho lahilahy manambaly rehe kera ihe ro hahavoavonje i vali’oy?

17 Faie ndra izay aza, le toko’e handeha arake ze fa nikanjian’Agnahare aze ty tsikiraidraike, arakarake ze anjara* nimey i Jehovah aze. O fiangonagneo iaby ty omeako ze torohevetse zay. 18 Fa nitapake vao ty ndaty raike tamy ie nitokavegney? Tsy toko’e hiheregne tsy mitapake indraike reke. Misy ndaty ka vao mbe tsy nitapake tamy ireke nitokavegney? Toko’e hijanogne amy izay avao reke. 19 Tsy misy dika’e o fanapahagneo, le tsy misy dika’e ka o tsy fanapahagneo. Ty fagnorihagne ty lilin’Agnahare ro tena lahibey. 20 Ndra nanao akore areke ndra nanao akore ty toe-draha nisy ty tsikiraidraike tamy ireke tinokay, le toko’e hijanogne amy izay avao reke. 21 Nimpanompo vao rehe tamy ihe tinokay? Ko atao’o mampinekoneko azo zay. Fa naho afake ty hanjare ndaty afake rehe, le hararaoto zay. 22 Ze nitokavegne ho amy i Tompo ao tamy tie ireke niondevo, le hahazo fahafahagne sady hanjare mpanompo i Tompo. Hoe izay ka, fa ze ndaty afake tamy ireke nitokavegney, le hanjare mpanompo i Kristy. 23 Fa vinily nareo, le ko mete hanjare mpanompo o ndaty sasa. 24 Ndra nanao akore areke ndra nanao akore ty toe-draha nisy ty tsikiraidraike tamy ireke tinokay, ry rahalahy, le toko’e hijanogne amy izay avao reke agnatrehan’Agnahare eo.

25 Ty amo o virjinio ka, le tsy nahazo lily boake amy i Tompo raho, faie hirehake ty heveko avao raho, satria nanehoa i Tompo famindram-po mba hahavy ahy ho azo atokisagne. 26 Izao areke, tena soa hoahy ty lahilahy raike naho mijanogne amo ze o misy aze zao avao, satria sarotse ze o fiaignagne zao. 27 Lahilahy voafehe ty fanambaliagne vao rehe? Ko mipay fomba hialagne areke. Lahilahy tsy voafehe ty fanambaliagne vao rehe? Ko mipay valy sasa. 28 Faie ndra tie fa manambaly ka aza rehe, le tsy manota. Naho misy virjiny ka mieretseretse ty hanambaly, le tsy manota reke. Faie, hanan-kaoreagne amy ty nofo’e ze manambaly, le tsy teako hanjò anareo zay.

29 Izao ka ty rehafeko ama’areo ry rahalahy, fa kede ty sisa i fotoagney. Manomboke amy izao areke, ze manambaly, le toko’e hanahake o tsy manambalio, 30 ze mitagny, hanahake o tsy mitagnio; ze mifale, hanahake o tsy mifaleo; ze mivily, hanahake o tsy managneo; 31 ze mampiasa ty tontolo toy, hanahake o tsy mampiasa aze tanterakeo, satria haintika tie miovaova ty raha miseho amy ty tontolo toy eto. 32 Tena teako tsy hinekoneko nareo. Ty lahilahy tsy manambaly, le minekoneko amy ze hene raha miomba i Tompo, le tihoe akore ty hahazoa’e sitrake amy i Tompo. 33 Fa ty lahilahy manambaly, le minekoneko amy ty raha amy ty tontolo toy eto, le tihoe akore ty hahazoa’e sitrake amy i vali’e. 34 Voazarazara areke reke. Hoe izay ka fa ty ampela tsy manambaly, naho ty virjiny, le minekoneko amy ze hene raha miomba i Tompo, amy izay ho masigne ty vata’e naho ty sai’e. Fa ty ampela manambaly, le minekoneko amy ty raha amy ty tontolo toy eto, le tihoe akore ty hahazoa’e sitrake amy i vali’e. 35 Ty hahasoa anareo ty mahavy ahy mirehake izay, fa tsy tihoe noho iraho te hamehefehe anareo. Ty anto’e, te handrisike anareo hanao ze mete naho hifantoke avao amy ty fanompoagne i Tompo tsy misy fagnelengelegna ty raha hafa raho.

36 Faie naho misy ty mieretseretse tie hanaotao fahatane avao reke naho tsy manambaly sady fa matoe ka ty vata’e naho ty sai’e,* vaho mete ama’e ka zay, le toko’e hengagne hanao ze tea’e reke. Tsy manota reke naho manambaly. 37 Fa naho misy ty tapa-kevetse am-po’e ao ty tsy hanambaly sady tsy misy raha manere aze vaho voafehe’e ka ty fagniria’e, le soa ze fanapahan-keve’e zay. 38 Soa areke ty manambaly faie mbe soa mandikoatse izay ty tsy manambaly.

39 Voafehe ty fanambaliagne ty ampela raike naho mbe velogne ty vali’e. Fa naho mate ty vali’e, le afake manambaly ze tea’e reke, faie amy i Tompo ao avao. 40 Faie naho ty heveko, le tena ho sambatse reke naho mijanogne tsy manambaly. Matoky ka raho fa nahazo ty fagnahin’Andrianagnahare.