Talily Soa Nisorate i Lioka

2 Tamy ze fotoagne zay, le nampiboake lily ty Aogosto Kaisara tie, mila misoratse agnaragne ty ndaty iaby ambone tane etoy. 2 (I Kirenio ty governora i Siria tamo o fisoratagne agnaragne voaloha’e iohoe.) 3 Le nandeha tamy ty tane niavia’e agne iaby areke ze kila ndaty mba hisoratse agnaragne. 4 Niala boake a Nazareta a Galelia agne ty Josefa, le nandeha a Betlehema a Jodia agne satria reke tarana i Davida sady keleia’e. 5 Nandeha hisoratse agnaragne iareo amy i Maria vali’e. Fa narine hiterake ty Maria tamy izay. 6 Nitsongo ty Maria tamy iareo tagney. 7 Niterake i ana-dahi’e voaloha’ey ty Maria, le nifognose’e lamba sady nampandre’e amy ze raha fihinanam-biby zay ao. Ty anto’e, fa tsy nisy sasa ty tragno fandrambesagne ambahiny hisy iareo.

8 Nisy mpiarak’agnondry ty tamo o faritse iohoe, le nijanogne an-teteke agne avao iareo naho fa halegne mba hiambegne i agnondry iareo rey. 9 Ie tampoke teo, le nisy anjely i Jehovah niseho tamy iareo. Namilepiletse nagnodidigne i anjely rey ty voninahy i Jehovah, le tena natahotse i mpiarak’agnondry rey. 10 Faie hoe i anjelỳ tamy iareo: “Ko matahotse, fa hagnambara talily soa hinday hafaleam-bey hoahy ze kila ndaty ama’areo raho, 11 satria naterake androany an-tanà i Davida ao i mpamonje hagnavotse anareoy, le i Kristy Tompo. 12 Izao ty hamantara’areo aze: Hahatrea anak’ajaja mifognogne lamba, mandre amy ty raha fihinanam-biby ao nareo.” 13 Ie tampoke teo, le avy le nisy anjely maro boake an-dagnitse agne nidera an’Agnahare tihoe: 14 “Voninahitse hoahy i Andrianagnahare andindìgne agney, le fiadagnagne hoahy ze ndaty mampifale aze an-tane etoy.”

15 Naho fa niheregne an-dagnitse agne i anjely rey, le nifampirehake i mpiarak’agnondry rey tie: “Andao tika ho a Betlehema agne mba hagnente o raha nampahafantare i Jehovah antikagne zao.” 16 Le avy le nandeha areke iareo, le nahatrea i Maria naho i Josefa vaho i anak’ajajay nandre amy i raha fihinanam-bibỳ ao. 17 Naho fa nahatrea izay iareo, le nambara iareo o ndatio ty hafatse nambara i anjelỳ iareo miomba i anak’ajajay. 18 Le nigaga ze naharey ty raha nirehafe i mpiarak’agnondry rey, 19 fa i Maria nitadidy ze raha rezay avao sady nandineke ty dika’e. 20 Noly areke i mpiarak’agnondry rey, le nidera naho nagnomey voninahitse an’Agnahare, satria ty raha nitrea iareo naho nirey iareo, le nagnaporofo tie maregne vata’e i raha nirehafegne tamy iareoy.

21 Ie valo andro tafara izay, le nitapahegne* i ajajay, le natao tihoe Jesosy ty agnara’e. O agnaragne iohoe ty nimea i anjelỳ aze taloha i nivesaragne azey.

22 Naho fa niavy ka i andro fagnaliovagne iareoy, le nente iareo a Jerosalema agne reke mba haseho agnatreha i Jehovah eo, arake i nisorategne amy i Lalà i Mosesỳ aoy. 23 Ty anto’e, izao ty voasoratse amy i Lalà i Jehovah-y ao: “Ze talén’anake lahilahy, le tsy maintsy omeigne* i Jehovah.” 24 Le nanolotse sorogne iareo, satria arake ty rehafe i Lalà i Jehovah-y, le “deho roe ndra anam-boromahilala roe” ty toko’e hatao iareo sorogne.

25 Nisy lahilahy raike zay ty ta Jerosalema agne. I Simeona ty agnara’e. Ndaty maregne naho natahotse an’Agnahare reke sady nandigne i fotoagne hampionognan’Agnahare o Israelioy. Niasa tama’e ka i fagnahy masigney. 26 Ankoatse izay, le fa nabaribarin’Agnahare tama’e tamy ty alala i fagnahy masigney fa tsy ho mate reke naho tsy mahatrea i Kristy, i voahoso i Jehovah-y. 27 Nitarihe i fagnahy masigney ty Simeona, le nandeha amy i tempolỳ agne. Tamy izay, le nente i rae aman-drene’e rey tamy i tempolỳ agne ty Jesosy tamy ie mbe anak’ajajay mba hagnorihagne ty raha nirehafe i lalànay miomba aze.* 28 Nalae i Simeona ty Jesosy, le nitrotroe’e. Nidera an’Andrianagnahare hoe izao reke naho fa niavy eo: 29 “O Tompo Fara Tampo’e, fa nitreako hinane zay i ajaja nisaontsie’oy, le engao amy izay ty mpanompo’o toy ho mate am-piadagnagne, 30 satria fa nitrea ty masoko i hinday famonjeagne 31 nirahe’oy, sady fa trea ze kila ndaty iaby reke amy izao. 32 Ireke i fahazavagne hagnafake i lamba mandrakoke o firenenao naho ho voninahy o Israely vahoa’oỳ.” 33 Naho fa naharey ze raha nirehafe’e miomba i ajajay zay ty rae’e naho i rene’e, le tena nigaga. 34 Nitsodrano iareo ka ty Simeona sady nirehake tamy i Maria tie: “Noho ty ajaja toy, le maro ty ndaty a Israely agne hotonta, le maro ka ty hitsangagne indraike. Maro ty halaigne* aze ndra tie hanao famantaragne amy ty alala’e aza ty Andrianagnahare. 35 Tinendre ka reke mba hampibaribary ty raha am-po ty ndaty maro ao (fa irehe Maria, le hoe tinomboke amy ty mesa lava).”

36 Nisy mpaminanivave zay ka boake amy ty foko i Asera. I Ana ty agnara’e. Anak’ampela i Fanoela reke. Fa niantetse reke tamy izay. Nimate ty vali’e, fito taogne tafara ty nifanambalia iareo. 37 Vantotse reke sady fa 84 taogne ka. Niavy tsy tapake tamy i tempolỳ ao reke mba hanao fanompoagne masigne handro halegne. Nifaly hanegne ka reke sady nanao vavake fihalaleagne. 38 Tamy izay ka, le niharine iareo reke sady nisaotse an’Agnahare, vaho nirehake ty miomba i ajajay tamy ze ndaty nandigne ty hagnafahagne i Jerosalema.

39 Naho fa nivita iareo iaby ty nanao ze raha také i Lalà i Jehovah-y, le nandeha noly a Galelia a Nazareta agne iareo. 40 Le nihabey naho nitombo hilala avao i ajajay sady lava nanohagne aze avao ka ty Andrianagnahare.

41 Fatao i rae aman-drene’e rey ty nandeha a Jerosalema agne mba hankalaza i fete i Pasakeỳ isan-taogne. 42 Tamy i Jesosy ni-12 taogney, le nandeha ta Jerosalema agne iareo mba hankalaza i fetey. 43 Naho fa nivita i fetey, le noly iareo. Fa i Jesosy nijanogne ta Jerosalema agne avao, faie tsy nivoamare i rae aman-drene’e rey. 44 Nieretseretse varagne iareo tie niarake amy i ndaty niharo lia tamy iareo rey reke. Fa nandeha tagnate ty andro raike iareo, vaho izay nanomboke nipay aze tamy ty longo iareo naho ty nama iareo agne. 45 Naho fa tsy nitrea iareo reke, le niheregne ta Jerosalema agne iareo, le nikodebe aze tagne. 46 Ie telo andro tafara izay, vaho izay reke nitrea iareo tamy i tempolỳ ao. Nitoboke tagnivo i mpagnanatse rey eo reke, le nitsanogne iareo sady nametrake fagnonteneagne tamy iareo ka. 47 Le nigaga ze nitsanogne teo noho ty fahatakaran-draha’e naho ty toin-dreha’e. 48 Naho fa nahatrea aze tamy i mpagnanatse rey eo i rae aman-drene’e rey, le nilatsa. Le hoe ty rene’e tamy i Jesosy: “Nagnino zahay anake ie atao’o hoe izaò? Tena fa nivali-doha zahay aman-drae’o ty nipay azo.” 49 Faie hoe reke tamy iareo: “Inogne o raha nipalia’areo ahio? Tsy fanta’areo vao tie tsy maintsy ho agn’anjomban-dRaeko ato raho?” 50 Faie tsy niazo iareo ze raha nirehafe’e tamy iareo zay.

51 Le nandeha noly niarake tamy iareo a Nazareta agne reke sady nagnorike ty raha nirehafe iareo avao ka. Nitadidien-drene’e naho nisaintsaigne’e avao ka i raha nirehafe i Jesosy rey. 52 Le nihabey naho nitombo hilala avao ty Jesosy, sady nampifale an’Andrianagnahare naho o ndatio ka.