Talily Soa Nisorate i Matio

10 Nitokave i Jesosy i mpiana’e 12 rey, le nimea’e fahefagne mba handroake demonia naho hagnasitragne ze karazan’aretegne nahazo o ndatio.

2 Itoa iaby ty agnara i apostoly 12 rey: I Simona i tokavegne tihoe Peteray, naho i Andrea rahalahi’e; i Jakoba ana i Zebedio naho i Jaona rahalahi’e; 3 i Filipo naho i Bartolomeo; i Tomasy naho i Matio mpitake hetra; i Jakoba ana i Alfeo naho i Tadeo; 4 i Simona Kananeana naho i Jodasy Iskariota i namadike aze naho fa tafara tatoỳ.

5 Naho fa nirahe i Jesosy iareo 12 lahy, le izao ty toromareke nimea’e iareo: “Ko mandeha amy ty tanà o ndaty firenena hafao agne ndra mizilike amy ty tanà o Samaritanao, 6 fa amy ze agnondry nimontso amy ty firene o Israelio eo avao ro andehano’areo. 7 Naho fa mandeha nareo, le mitoria hoe izao: ‘Fa marine i Fanjakà i lagnitseỳ.’ 8 Sitragno ty marare, velomo ty mate, liovo ze ndaty azo ty habokagne,* le roaho o demoniao. Fa nahazo maimaimpoagne nareo, le magnomeza maimaimpoagne. 9 Ao nareo tsy hipay vola mba hatao agnate kitapo’areo ao, ndra vola* vita tamy t’inogne zay ndra vola vita tamy t’inogne. 10 Ko minday hanegne ka mba hatao’areo vatiagne, satria o mpiasao fagneva ty hahazo hanegne. Ko minday akanjo roe ndra kapa ndra fitognogne.

11 “Amy ze hene rova naho tanàgne kedekede idira’areo, le paliavo ze fagneva ty hifantohagne ao. Mijanogna ao nareo amparake ty ialà’areo ao. 12 Naho fa mizilike an-tragno ao nareo, le salamao’areo ze ndaty ao. 13 Naho mandrambe anareo soa iareo, le hahazo i fitahiagne irie’areo mba hoazo iareoy. Fa naho tsy mandrambe anareo iareo, le tsy hoazo iareo ze fitahiagne zay. 14 Ndra ia ndra ia tsy mandrambe anareo, ndra tsy mitsanogne ty raha rehafe’areo, le mialà amy ze tragno zay ndra amy ze tanàgne zay ao, le ahintsagno’areo ty lemboke amy i tombo’areoy. 15 Volagneko ama’areo to vata’e, fa amy i andro fitsaragney, le ndra mbe ho moramora ka ty raha hanjò ty tanà i Sodoma naho i Gomora ta ty raha hanjò ze tanàgne zay.

16 “Magnirake anareo raho, faie manahake ty agnondry agnivo ty amboahako eo nareo. Mahimbagna manahake o meregneo areke nareo, faie mikezaha ka mba tsy hanan-tsiny manahake o voromahilalao. 17 Mitaoa nareo, satria hatolo o ndatio amo o fitsaragneo ey naho hojerae iareo amo o sinagoga iareò ao. 18 Hoente iareo amo o governorao agne naho amo o mpanjakao eo nareo noho ty amako, amy izay nareo ho afake hirehake amy iareo naho amo o firenenao ty raha inoa’areo. 19 Faie naho fa entegne agnatreha iareo eo nareo, le ko minekoneko amy ty raha horehafe’areo ndra amy ty fomba hirehafa’areo aze, satria homeigne anareo amy ze lera zay ty raha horehafe’areo. 20 Ty anto’e, tsy inareo avao ro hirehake amy izay, fa i fagnahy masy i Rae’areoy ro hirehake amy ty alala’areo. 21 Ankoatse izay, le hanolotse ty rahalahi’e mba hovonoegne o ndatio, le ty rae hanolotse ty ana’e mba hovonoegne, le ty anake hanjehatse ty rae’e naho hanao raha mba hamonoagne aze. 22 Hoheje ze kila ndaty iaby ka nareo noho ty agnarako, faie ze miaretse hatrake am-para’e ro ho voavonje. 23 Naho fa enjehe iareo nareo amy ty tanàgne raike, le milaisa amy ty tanàgne hafa agne. Satria volagneko ama’areo to vata’e, fa tsy hovita’areo tsitsike iaby ty tanà o Israelio amparake ty hiavia i Ana o ndatỳ.

24 “Ty mpianatse, le tsy ambone noho ty mpampianatse aze, le o mpanompò ka, tsy ambone noho i tompo’ey. 25 Fa ampe areke naho fa manahake i mpampianatse azey i mpianatsey, le i mpanompoy manahake i tompo’ey. Naho ohatse zao i Belzeboba ty irehafa o ndatio i tompon-tragnoy, tsy ho hoe izay avao ka vao ty hirehafa iareo ze ndaty an-tragno’e ao? 26 Ko matahotse iareo areke, satria tsy misy raha mietake tsy habaribary zao, le tsisy raha sekiré ka lelia’e tsy hofantatse zao. 27 Ze raha rehafeko ama’areo amy ty maiegne ao, le ambarao’areo amy ty mazava ao. Ze raha bisibisihegne ama’areo, le koiho’areo ambone tafotragno ey. 28 Ko matahotse ze ndaty mamono anareo satria tsy hovita iareo ty mikalagne anareo mba tsy hovelomegne indraike. Fa i mahavita mamono anareo amy i Gehena agney ro atahoro’areo. 29 Tsy ariary raike* vao ty vily ty foly roe? Faie ndra ty raike amy iareo avao aza ro poke an-tane eo, le fanta i Rae’areoy. 30 Hai’areo, ndra o volo’areò aza hai’e ty isa’e. 31 Ko matahotse areke, fa sarobily ambone o folio iaby nareo.

32 “Ze magneke ahy agnatreha o ndatio eo, le hekeko ka agnatreha i Raeko an-dagnitse agney. 33 Fa ze tsy magneke ahy agnatreha o ndatio eo, le tsy hekeko ka agnatreha i Raeko an-dagnitse agney. 34 Ko mieretseretse tie hinday fiadagnagne ty niaviako an-tane etoy. Tsy hinday fiadagnagne ty niaviako fa hinday mesa. 35 Satria niavy raho mba hampisarake ty anake lahilahy amy ty rae’e, le ty anak’ampela amy ty rene’e, le ty vinanto ampela amy ty rafoza’e ampela. 36 Ty keleia o ndatio avao ro ho fahavalo’e. 37 Ndra ia ndra ia tea ty rae’e ndra ty rene’e mandikoatse ty hatea’e ahy, le tsy fagneva ty ho mpianako. Le ndra ia ndra ia ka tea ty ana-dahi’e ndra ty anak’ampela’e mandikoatse ty hatea’e ahy, le tsy fagneva ty ho mpianako. 38 Le ndra ia ndra ia tsy magneke hinday ty hazo fijalea’e sady tsy manonjohy ty liako, le tsy fagneva ty ho mpianako. 39 Ze mandrombake ty fiai’e, le hamoe aze. Fa ze mamoe ty fiai’e noho ty amako ro hahazo aze.

40 “Ze mandrambe anareo, le mandrambe ahy ka. Le ze mandrambe ahy, le mandrambe i nagnirake ahỳ. 41 Ze mandrambe mpaminany satria eke’e tie mpaminany i ndatỳ, le hahazo ty valesoa ty mpaminany. Le ze mandrambe ndaty maregne satria eke’e tie ndaty maregne i ndatỳ, le hahazo ty valesoa ty ndaty maregne. 42 Le ndra ia ndra ia magnomey rano manintsigne ty raike amy i kidikidy rey ndra tie kope’e raike avao aza, satria eke’e tie mpianako reke, le volagneko ama’areo to vata’e, fa tena hahazo valesoa ze ndaty zay.”