Hoahy o Efesianao
3 Izay ty mahavy ahy Paoly ho gadra noho i Kristy Jesosy, mba hahasoa anareo ndaty boake amy ty firenena hafao... 2 naho toe nirei’areo vata’e ty miomba i fiandraiketagne i hasoa fagnahin’Agnahare miambake nimeagne ahike mba hahasoa anareoy, 3 i nampahafantaregne ahike tamy ty alala ty fampibaribariagne i raha mietake masigneỳ, arake ty fa nisorateko fohefohe tama’areo. 4 Naho fa mamaky itoy areke nareo, le hotaka’areo tie, haiko soa ty raha mietake masigne miomba i Kristy. 5 Tsy nampahafantaregne ty taranake taloha o raha mietake masigne iohoe, manahake ty nampahafantaragne aze amy izao amo o apostoly masigneo naho amo o mpaminanio, amy ty alala i fagnahỳ. 6 Ty dika izay, naho fa tafaharo amy i Kristy Jesosy sady magneke i talily soay o ndaty boake amy ty firenena hafao, le hanjare ho mpiharo lova naho ho agnisa ty vatagne raike vaho hahazo i fampitamagney miarake ama’ay. 7 Nanjare mpanompo o raha iohoe raho, noho ty hasoa fagnahy miambake asehon’Agnahare. Nimea’e o fagnomezagne maimaim-poagne iohoe raho, naho fa nimea’e ty heri’e.
8 Amako, le iraho ty fara’e kidikidy amo o ndaty masigne, nimeagne hasoa fagnahy miambakeo iaby. Amy izay raho hagnambara ty talily soa miomba ty harena tsy misy fetra omea i Kristy, amo o ndaty boake amy ty firenena hafao, 9 naho hanao ze hahatreava ze kila ndaty ty fitantanagne i raha mietake masigne naetake tagnate ty taogne maroy. I Andrianagnahare namboatse ze kila rahay ty nagnetake aze. 10 Niseho zay, amy izay amy ty alala o fiangonagneo ro hampahafantaragne ty hilalan’Agnahare, i aseho’e amy ty fomba maro sambe hafay, amy ty fitondragne naho ty fahefagne an-dagnitse agne. 11 Mifagnarake amy i fikasa’e nainai’ey zay. Fa nanapa-kevetse reke tie, hotanterahe’e amy ty alala i Jesosy Kristy Tompontikagne ze fikasa’e zay. 12 Noho ireke ro anagnantika fahasahiagne mirehake naho fahasahiagne hiharine an’Agnahare, noho itika mino aze. 13 Mangatake anareo areke raho mba tsy ho kivy, amo o haoreagne iaretako noho ty ama’areò, satria midika ho voninahitse ho anareo rey.
14 Izay ty mahavy ahy manongaleke agnatreha i Rae eo. 15 Boake ama’e ty ahazoa ze keleiagne an-dagnitse agne naho an-tane etoy agnaragne. 16 Mivavake raho mba hohatanjahe i Andrianagnahare manan-karena voninahitsey, ty fo’areo naho ty sai’areo, amy ty alala ty hery i fagnahi’ey. 17 Mivavake ka raho mba ho am-po’areo ao avao ty Kristy naho ty hatea, noho inareo mino. Lonike nareo hamahatse naho hioregne mafe amy i fototsey eo, 18 amy izay nareo naho o ndaty masigneo iaby hahatakatse soa ty am-pohe, ty halava, naho ty haabo vaho ty halale ty raha miomba an’Agnahare, 19 sady hofanta’areo ty hatea i Kristy, i mandikoatse ze hene fahalalagney. Amy izay hoazo’areo boake aman’Agnahare iaby ze hene toetse’e.
20 Arake i heri’e miasa amantikagne aoy, le vita’e ty manao mihoatse lavitse ze raha angatahentikagne ndra eretseretentikagne. 21 Ho aze abey ty voninahitse amy ty alala o fiangonagneo naho amy ty alala i Kristy Jesosy, hatrake amy ze taranake iaby afara agne nainai’e! Amena.