Hoahy o Kolosianao

3 Faie naho nivelomegne miarake amy i Kristy nareo, le ifoforo’areo ty pay i raha ambone agne rey, i amy ipetraha i Kristy ankavan’Andrianagnahare eoy. 2 Afantoho’areo amy ty raha ambone agne ty sai’areo, fa tsy amy ty raha an-tane etoy. 3 Ty anto’e, fa nimate nareo sady fa naetake tamy i Kristy ao, i tafaharo aman’Agnaharey, ty fiaigna’areo. 4 Naho fa haseho ty Kristy, i fiaignantikagney, le haseho amam-boninahitse miarake ama’e ka nareo.

5 Vonò areke ty fagnirian-draty amy ty ratsambata’areo ao,* le ty fijangajangagne, fahalotoagne, filagne tsy voafehe, fagnirian-draty, naho ty fagniriagne tsy mete afa-po, i fanompoan-tsampỳ. 6 Noho o raha rehoe ty mahavy an’Andrianagnahare ho vignetse. 7 Nihoe izay ka ty fomba fiaigna’areo tie taloha. 8 Faie amy izao, le tsy maintsy afaha’areo ama’areo ey ty raha retoa: Habosehagne tsy voafehe, havigneragne, haratiagne, fiterateragne, naho ty rehake maloto rehafe ty vava’areo. 9 Ko mifamorom-bande. Afaho’areo i toetse talohay naho ty fahazaragne niarake tama’e, 10 le iakanjo’areo i toetse vaovaoy, i havaozegne amy ty alala ty fahalalagne maregney. Mampiseho ty vinta i namorogne azey o toetse iohoe. 11 Tsy misy sasa areke tihoe Grike, ndra Jiosy, ndra mitapake, ndra tsy mitapake, ndra ambahiny, ndra Skitiana, ndra ndevo, ndra ndaty afake. Fa i Kristy ro kila raha sady amy ze kila raha ao reke.

12 Noho inareo jinobon’Agnahare sady masigne naho teagne, le miakanjoa fiferegnesagne, hasoa fagnahy, fiambaneagne, fahalemem-pagnahy, naho faharetagne. 13 Mifandefera avao ka sady mamelà heloke amy ty fo, ndra tie managne anto’e hitaraignagne miomba ty hafa aza. Manahake ty namelà i Jehovah tanterake anareo, ro tsy maintsy amelà’areo ty hafa ka. 14 Fa ankoatse o raha rehoe iaby, le miakanjoa hatea, satria taly voririke mampitambatse antika ho raike io.

15 Engao’areo hanjaka am-po’areo ao ka i fiadagna i Kristỳ, satria tinoka mba ho amo o fiadagnagne iohoe ao nareo, mba hanjare vatagne raike. Atorò’areo ka fa mahay misaotse nareo. 16 Engao’areo hitoetse agnate’areo ao ty reha i Kristy iaby, i magnomey ze hene hilalay. Mifagnanara naho mifampahereza lognandro amy ty alala ty salamo, miderà an’Agnahare, sady mihirà hira masigne mba ho fisaoragne aze. Mihirà amy ty fo hoahy i Jehovah. 17 Ndra inogn’ino raha rehafe’areo naho atao’areo, le anò’areo amy ty agnara i Jesosy Tompo ze kila raha sady misaora i Andrianagnahare Rae, amy ty alala’e.

18 Inareo ampela manambaly, ekeo’areo ty vali’areo, satria izay ty mete amy i Tompo. 19 Inareo lahilahy manambaly, teavo’areo lognandro ty vali’areo sady ko boseke mafe ama’e. 20 Inareo anake, ankatoavo’areo amy ze kila raha ty rae aman-drene’areo, satria izay ty mampifale i Tompo. 21 Inareo rae, ko manao ze hahaboseke ty ana’areo, tsy mone hamoe fo iareo. 22 Inareo mpanompo, ankatoavo’areo amy ze kila raha o tompo’areo olombelogneo.* Tsy tihoe naho fa magnente anareo avao iareo vaho manao izay nareo, fa manjare te hipay sitrake ama o ndaty nareo, fa anò’areo amy ty fo’areo noho ty fatahoragne i Jehovah. 23 Ndra inogn’inogne atao’areo, le anò’areo amy ty fo, manahake tihoe hoahy i Jehovah, fa tsy hoahy o ndaty, 24 satria hai’areo, fa boake amy i Jehovah ty hahazoa’areo i lova ho valesoa’areoy. Manompoa i Tompo’areoy, le i Kristy. 25 Ze manao raty, le tsy maintsy hovaleagne noho i raha raty natao’ey, fa tsy misy fifilianagne volo.