Hoahy o Efesianao
1 Ty taratasy toy le boake amy i Paoly, apostoly i Kristy Jesosy noho ty zoton’arofon’Andrianagnahare. Hoahy ty ndaty masigne a Efesosy agne naho tsy mivalike tafaharo amy i Kristy Jesosy aò:
2 Lonike abey nareo mba hanagne i hasoa fagnahy miambake naho i fiadagnagne boake aman’Andrianagnahare Raentikagne naho i Jesosy Kristy Tompoy!
3 Hoderaegne abey ty Andrianagnahare Rae i Jesosy Kristy Tompontikagne! Ty anto’e, noho itika tafaharo amy i Kristy ao, le nimea’e fitahiagne maro amy ty faritse an-dagnitse agne. 4 Nijobogne’e mba ho tafaharo ama’e ao tikagne, taloha ty nagnoregnagne ty tontolo toy, le toko’e haneho hatea naho ho masigne sady tsy hisy tsiko’e agnatreha’e eo. 5 Ty anto’e, fa tinendre’e mialoha tikagne mba hatsanga’e ho ana’e, amy ty alala i Jesosy Kristy, arake ze mahafale aze naho ty zoton’arofo’e. 6 Amy izay hoderaegne reke noho ty habey ty hasoa fagnahi’e miambake, i nimea’e antikagne taman-kasoa fagnahy tamy ty alala i Ana-dahi’e tea’eỳ. 7 Tamy ty alala’e ro anagnantikagne fahafahagne noho i solovoigne naloa tamy ty alala ty lio’ey. Ie, amy ty alala’e ro nahazoantikagne famelan-keloke. Tena bey vata’e ty hasoa fagnahy miambake asehon’Agnahare.
8 Nifenoen’Agnahare o hasoa fagnahi’e miambake iohoe tikagne, sady nimea’e ze hene hilala naho ze hene fahatakaran-draha, 9 mba hampahafantaragne antikagne i raha mietake masigne miomba ty zoton’arofo’ey. Mahafale aze io sady mifagnarake amy ty fikasa’e 10 hanangagne fitantanan-draharaha, naho fa tapetse i fotoagne fa tinondroy, mba hamoriagne ze kila raha iaby amy i Kristy ao. Agnisa izay ty raha an-dagnitse agne naho an-tane etoy. Ie, 11 tafaharo ama’e zahay sady tinendre ho mpandova. Tinendren’Agnahare mialoha zahay, arake ty fikasa’e, satria manao ze hene raha tea’e hatao reke, mifagnarake amy ty zoton’arofo’e. 12 Amy izay amy ty alala’ay, i voaloha’e nitama i Kristỳ ro hahazoa’e dera naho voninahitse. 13 Faie nitama aze ka nareo naho fa naharey i saontsy ty hamaregnagney, ndra i talily soa miomba ty fagnavotagne anareoy. Tafara ty ninoa’areo, le nasiagne tampò tamy ty alala’e nareo. I fagnahy masigne nampitamaegney o tampò iohoe. 14 Io ka ty antoke mialoha, fa hahazo i lovantikagney tika. Nanao izay ty Andrianagnahare mba hagnafaha’e o fanagna’e manokagneo, amy ty alala i solovoigney, mba hahazoa’e voninahitse naho fideragne.
15 Izay ty nahavy ahy, naho fa naharey ty finoa’areo i Jesosy Tompo, naho ty hatea naseho’areo amo o ndaty masigneo iaby, 16 nisaotse an’Agnahare avao. Lava tognoneko amy ty vavake ataoko avao nareo, 17 amy izay i Andrianagnahare i Jesosy Kristy Tompontikagney, i Rae ty voninahitsey, hagnomey anareo i fagnahy ty hilalay naho i fagnahy ty fampibaribariagne ty fahalalagne maregne miomba azey. 18 Nihazavae’e ty maso ty fo’areo, amy izay hohai’areo i fampitamagne nikanjia’e anareoy naho i harena bey voninahitse maro tamirie’e, mba holovà o ndaty masigneoy. 19 Tena fara izay ty lahibey ka ty heri’e nimea’e antika mpino. Trea ty halahibey ze heri’e zay naho fa nampiasae’e, 20 mba hamelomagne i Kristy tamy ty mate naho nametrahagne aze tan-kavana’e eo, amy ty faritse an-dagnitse agne. 21 Natao’e fara’e ambone amy ze hene fitondragne naho fahefagne naho hery naho Tompo naho ze hene agnaragne iaby reke. Tsy amy ty tontolo toy eto avao, fa amy i ho avỳ ka. 22 Nampagnekegne aze iaby ka ze kila raha, le natao ambane tombo’e eo, sady ireke ty natao ho loha’e amy ze kila raha amo o fiangonagneo eo, 23 ndra i vata’ey, i feno ze kila raha miomba azey, sady ireke ka ty mameno ze kila raha ao.