Taratasy Voaloha’e Hoahy o Korintianao
14 Mikezaha mafe hifankatea lognandro, faie mikezaha mafe ka mba hahazo i fagnomezagne boake amy i fagnahỳ rey, lohotsie fa ty hahay haminany. 2 Ty anto’e, ze mirehake amy ty firehake sambe hafa, le tsy mirehake ama o ndaty fa aman’Agnahare. Tsy misy mahazo ty raha rehafe’e, satria mirehake raha mietake masigne boake amy i fagnahỳ reke. 3 Fa ze maminany, le mampahery naho magnatanjake vaho mampionogne ty hafa amy ty raha rehafe’e. 4 Ze mirehake amy ty firehake sambe hafa, le mampahery ty vata’e. Fa ze maminany, le mampahery o fiangonagneo. 5 Teako nareo iaby naho mirehake amy ty firehake sambe hafa, faie ndra aleoko nareo maminany. Ty anto’e, ty maminany ro tena soa mandikoatse ty mirehake amy ty firehake sambe hafa, naho tsy tihoe adika’e i reha’ey mba hahazoa o fiangonagneo fampaherezagne. 6 Faie naho amy izao raho ry rahalahy ro avy ama’areo agne, sady mirehake amy ty firehake sambe hafa, hahasoa anareo vao zay? Tsy hahasoa anareo zay naho tsy tihoe mirehake ty raha nabaribary tamako raho, ndra mirehake fahalalagne ndra mirehake faminaniagne ndra mirehake fampianaragne.
7 Hoe izay ka o raha magnenò, ohatse, o solio ndra o harpao. Naho tsy mampiboake feo sambe hafa, le tsy hofantatse tie feo boake amy i solỳ vao zao sa boake amy i harpay. 8 Naho tsy mazava soa ty feo aboa o trompetrao, ia ty ho vognogne hialy? 9 Hoe izay ka fa naho tsy mora azo ty raha rehafe’areo, le akore ty hahaia ty hafa ty raha rehafe’areo? Naho ty maregne, le mitovy amy ty mirehake amo o tiokeo nareo. 10 Va’e misy rehake maro sambe karaza’e ty amy ty tontolo toy eto, faie sambe managne ty heve’e i rehake rey. 11 Naho tsy azoko ty dika i rehakey, le ho vazaha amy i ndaty mirehakey raho, le i ndaty mirehakey ho vazaha amako. 12 Hoe izay ka nareo, satria nareo magniry mafe hahazo i fagnomezagne boake amy i fagnahỳ rey, le anò ze hanagnagne maro i fagnomezagne mampahery o fiangonagneo rey.
13 Ze mahay mirehake amy ty firehake sambe hafa areke, le mivavaha mba hahay handika rehake. 14 Naho mivavake amy ty firehake sambe hafa raho, le i fagnomezagne boake amy i fagnahỳ o mivavakeo, fa ty saiko tsy mahazo o raha rehafekò. 15 Ino areke ty toko’e hataoko? Naho fa mivavake raho, le hampiasa i fagnomezagne boake amy i fagnahỳ, faie hivavake ka raho mba hoazoko ty raha rehafeko.* Hampiasa i fagnomezagne boake amy i fagnahỳ ka raho naho fa mihira fideragne, faie hihira fideragne amy ty firehake azoko* ka raho. 16 Naho midera an’Agnahare sady misaotse aze rehe, faie mampiasa i fagnomezagne boake amy i fagnahỳ, akore ty hirehafa ty ndaty tsotra ama’areo eo tihoe: “Amena”, ie amy izao tsy azo’e ty raha rehafe’o? 17 Maregne fa soa ty fomba nanoa’o i fisaora’oy, faie tsy mahazo fampaherezagne ty hafa. 18 Misaotse an’Agnahare raho, fa afake mirehake amy ty firehake sambe hafa maro naho oharegne ama’areo iaby. 19 Faie ndra aleoko mirehake rehake dime azoko* mba hampianaragne ty hafa amo o fiangonagneo eo, ta tie hampiasa rehake ray alegne amy ty firehake hafa.
20 O ry rahalahy, ao nareo tsy hanahake ty fisaigna o ajajao. Faie toko’e ho ajaja amy ty raha raty nareo, sady mikezaha hanahake ty fisaigna o ndaty beio. 21 Izao ty voasoratse amy i Lalànay ao: “‘Hirehake fireham-bazaha naho ty fireha o firenena hafao amy ty vahoake toy raho. Faie ndra tie izay aza, le mbe tsy hitsanogne ahy iareo’, hoe ty Jehovah.” 22 Famantaragne hoahy o tsy mpinò areke ty firehafagne amy ty firehake sambe hafa fa tsy hoahy o mpinò. Fa ty faminaniagne, le hoahy o mpinò fa tsy hoahy o tsy mpinò. 23 Naho miarake mivory amy ty toeragne raike areke i fiangonagney iaby sady mirehake amy ty firehake sambe hafa iareo iaby, faie misy ndaty tsotra ndra tsy mpino mizilike, tsy hirehake vao iareo tie minegne nareo? 24 Faie naho maminany nareo iaby, le amy izay ro misy tsy mpino ndra ndaty tsotra mizilike, le hahazo fagnanaragne reke sady handineke soa ty tegna’e. 25 Hibaribary ty raha mietake am-po’e ao, le hiankohoke naho hivavake aman’Agnahare reke sady hirehake tie: “Ama’areo eo vata’e ty Andrianagnahare.”
26 Naho fa mivory nareo, le misy ty mihira, misy ty mampianatse, misy ty mirehake ty raha nabaribary tama’e, misy ty mirehake amy ty firehake hafa, le misy ty mandika rehake. Faie ino ty toko’e hatao’areo ry rahalahy? Ze kila raha atao’areo, le anò mba hampaherezagne ty hafa. 27 Naho misy ndaty mirehake amy ty firehake hafa, le toko’e ho feragne ho roe ndra telo zay sady tsy maintsy misy ndaty mandika rehake. 28 Fa naho tsy misy mandika rehake, le tsy maintsy mitsìgne avao reke amo o fiangonagneo eo fa hirehake aman’Agnahare am-po’e ao. 29 Toko’e ho mpaminany roe ndra telo ty mirehake, le ty ila’e mamantatse ty dika i raha rehafe iareoy. 30 Faie naho misy amy iareo mitoboke eoy nampibaribarian’Agnahare raha, le toko’e hitsìgne hey i mirehakey. 31 Sambe afake maminany nareo iaby, faie toko’e hanao tsikiraidraike, amy izay miana-draha naho hahazo fampaherezagne nareo iaby. 32 I fahaiagne maminany boake amy i fagnahỳ, le toko’e ho voafehe ze mpaminany. 33 Ty anto’e, i Andrianagnahare, le tsy Andrianagnahare ty fikorontagnagne fa Andrianagnahare ty fiadagnagne.*
Manahake ty amy ty fiangona ty ndaty masigne iaby, 34 le toko’e hitsìgne avao o ampelao naho fa amo o fiangonagneo eo fa tsy mahazo mirehake. Toko’e hagneke fahefagne iareo, satria izay ty rehafe i Lalànay. 35 Naho misy raha tsy mazava amy iareo, le mbe hagnontane ty valy iareo iareo naho fa an-tragno agne, satria mahamegnatse naho mirehake amo o fiangonagneo eo o ampelao.
36 Boake ama’areo vao i saontsin’Agnaharey, sa inareo avao ty nimeagne aze?
37 Naho misy ty mieretseretse tie mpaminany reke, ndra nahazo fagnomezagne boake amy i fagnahỳ, le tsy maintsy eke’e tie lily i Tompo o raha sorateko ama’areò. 38 Fa naho misy tsy midare itoy, le tsy hodareagne ka reke.* 39 Izao areke ry rahalahy, mikezaha mafe haminany, faie ko raragne ty hafa naho mirehake amy ty firehake hafa. 40 Faie anò’areo amy ty toko’e ho ie naho milamigne soa ze kila raha.