Talily Soa Nisorate i Matio

27 Ie naho fa nimaraindraigne i androy, le nivory o lahibey ty mpisorogneo naho o mpitarike jiosio mba handineke ty fomba hamonoagne i Jesosy. 2 Narohy iareo reke tafara izay, le nindese iareo amy i Pilato governora agne.

3 Naho fa nitrea i Jodasy, i namadike azey tie nimelohegne hovonoegne ty Jesosy, le nanegnegne reke sady nahere’e tamo o lahibey ty mpisorogneo naho o androanavio i sekely volafotsy 30-y. 4 Le hoe reke tamy iareo: “Tena nanota raho satria namadike ndaty tsy manan-tsiny.” Le hoe ty navale iareo aze: “Tsisy idira’ay ty miomba izay fa afera’o manokagne.” 5 Natora’e amy i tempolỳ ao areke i volay, le nandeha nagnanton-tegna reke. 6 Faie nalae i mpisorombey rey i volay, le hoe iareo: “Tsy azo atao amy i fagnajariam-bola amy i tempolỳ aoy retoa satria vilin-dio.” 7 Naho fa boake nifampidineke iareo, le nivilia iareo i tete ty mpamboatse raha amy ty tane lietsey i volay, mba hatao kiborin’ambahiny. 8 Nanomboke tamy izay, le natao tihoe Teten-dio i tetekey hatrake androany. 9 Nitanterake areke i raha nampanorategne i Jeremia mpaminany tihoey tie: “Le nalae iareo i sekely volafotsy 30-y. O vola iohoe ty fa nifagnaraha ty ila’e amo o ana o Israelio tie hivilianagne i lahilahỳ. 10 Nimey iareo mba hivilianagne i tete ty mpamboatse raha amy ty tane lietsey i volay, arake ty nandilia i Jehovah ahy.”

11 Nitsangagne aloha i governoray eo ty Jesosy, le nagnontenea’e tie: “Ihe vao ty Mpanjaka o Jiosio?” Le namale ty Jesosy tie: “Fa ie ze nitsarae’o zay.” 12 Faie naho fa natao o mpisorombeio naho o androanavio kitomboke ty Jesosy, le tsy namale ndra raike. 13 Le hoe ty Pilato tama’e: “Tsy rei’o vao o raha maro rehafe iareo tie natao’o zao?” 14 Faie tsy namale aze ndra raike reke, hafarà’e i governoray tena nigaga.

15 Isake fete, le fa fatao i governoray ty mamotsotse gadra raike ze tea i vahoakey hovotsoragne. 16 Tamy ze fotoagne zay, le nisy gadra nalaza raty zay. I Barabasy ty agnara’e. 17 Ie naho fa nivory i vahoakey, le hoe ty Pilato tamy iareo: “Ty aia amy iareo roe lahy ty tea’areo hovotsorako? I Barabasy sa i Jesosy, i atao tihoe Kristỳ?” 18 Ty anto’e, fanta i Pilato tie fialognagne o nahavy iareo nanolotse i Jesosy azeo. 19 Fagnampe izay ka, tamy i Pilato mbe nitoboke tamy i seza fitsaragney teoy, le nisy ndaty nirahe i vali’ey mba hirehake ama’e tie: “Ko mikitikitike o lahilahy maregne iohoe rehe, fa tena nijale raho tie androany noho ty ninofiko miomba aze.” 20 Faie o lahibey ty mpisorogneo naho o androanavio nandrese lahatse i vahoakey, mba hangatake ty hamotsoragne i Barabasy naho ty hamonoagne i Jesosy. 21 Le hoe indraike i governoray tamy iareo: “Ia amy iareo roe lahy ty tea’areo hovotsorako?” Le hoe iareo: “I Barabasy.” 22 Le hoe ty Pilato tamy iareo: “Ino areke ty hataoko amy i Jesosy, i atao tihoe Kristỳ?” Le hoe iareo: “Peho amy ty boda-katae!” 23 Le hoe reke: “Fa nagnino? Ino ty raha raty natao’e?” Faie vao mainke nikorakorake i vahoakey tie: “Peho amy ty boda-katae reke!”

24 Naho fa nitrea i Pilato tie, tsy nisy voka’e ty raha natao’e, fa vao mainke nikorontagne i vahoakey, le nangalake rano reke sady nanasa tagnagne tagnatreha iareo eo. Hoe reke: “Tsy tompon’andraikitse amy ty lio ty lahilahy tia raho fa le inareo ty tompon’andraikitse ama’e.” 25 Le namale iareo iaby tie: “Engao ho izahay naho ty ana’ay ty ho tompon’andraikitse amy ty famonoagne aze.” 26 Navotso i Pilato areke ty Barabasy, fa i Jesosy nampikaravasie’e naho natolo’e mba hopehegne amy ty boda-katae.

27 Nindese i maramila i governoray rey tan-dapa’e agne ty Jesosy, le nihodidìgne i maramila maro rey reke. 28 Nafaha iareo i akanjo’ey naho fa niavy eo, le nampagnisie iareo akanjo mena bey reke. 29 Namboara iareo satro-boninahitse tamy ty raha misy fatipatike reke, le natao iareo an-doha’ey, sady nampitane iareo bararata i tagna’e havanay. Nitongaleke tagnatreha’e eo iareo naho fa niavy eo, sady nitsikike aze hoe izao: “Arahabaegne rehe Mpanjaka o Jiosio!” 30 Tafara izay reke, le nandrorà iareo, sady nalae iareo ka i bararata tan-tagna’eỳ, le najera iareo ty loha’e. 31 Tafara izay, naho fa boake nitsikihe iareo ty Jesosy, le nafaha iareo i akanjo mena bey nampagnisie iareo azey, le nampagnisie iareo aze indraike i akanjo’ey. Le nindese iareo reke mba hopehegne amy ty boda-katae.

32 Naho fa niakatse boake amy i tanàgney ao iareo, le nahatrea ze lahilahy te Kirena zay. I Simona ty agnara’e. Niforeseva iareo mba hinday i hazo fijaleagne hipehagne i Jesosỳ reke. 33 Ie naho fa niavy tamy ze toeragne raike atao tihoe Golgota ndra Karakandoha zay iareo, 34 le nimea iareo divay nafangaro raha mafaitse ty Jesosy mba hinome’e. Faie naho fa nandrama’e i rahay, le tsy nipaoke ninogne aze reke. 35 Naho fa nivita iareo peke tamy i boda-kataey ey ty Jesosy, le nanao kitsapake iareo mba hahafantaragne tie ia ty hahazo i akanjo ivela’ey. 36 Le nitoboke tey avao iareo mba hiambegne aze. 37 Nisia iareo pilàke magnazava ty anto’e namonoagne aze ty ambone loha’e eo. Izao i soratsey: “Intoy o Jesosy Mpanjaka o Jiosiò.”

38 Nisy malaso roe ka nipehegne tamy ty boda-katae tagnila’e eo. Ty raike tan-kavana’e eo, le ty raike tan-kavia’e eo. 39 Ze nandalo mbeo, le nanivetive aze naho nagnolikoligne ty loha’e, 40 sady nirehake tie: “Ihe nirehake tie horava’o i tempolỳ, le haore’o agnate ty telo andro. Avoto areke ty vata’o hinaneo. Naho toe anan’Agnahare vata’e rehe, le mizotsoa boake amy i hazo fijaleagney ey.” 41 Le nanomboke nitsikike aze ka ty lahibey o mpisorogneo naho o mpampianatse lalànao* vaho o androanavio tie: 42 “Ty ndaty hafa nivita’e ty nagnavotse aze, ie ty vata’e vaho tsy vita’e ty magnavotse aze. Naho toe Mpanjaka o Israelio vata’e reke, le hizotso boake amy i hazo fijaleagney ey, amy izay tika hino aze. 43 Natoky an’Agnahare reke, le naho toe fale ama’e ty Andrianagnahare, le hamonje aze, satria nirehake reke tie: ‘Anan’Agnahare raho.’” 44 Ndra i malaso nipehegne tamy ty boda-katae tagnila’e teo rey ka aza nagninjeinje aze hoe izay.

45 Ie nanomboke tamy ty lera fahaenegne hatrake tamy ty lera fahasive,* le naiegne i taney iaby. 46 Ie tamy i lera fahasive teo ho eoy ty Jesosy, le nitoka mafe tihoe: “Elỳ, Elỳ, lamà sabaktanỳ?” ndra “O Andrianagnahareko, o Andrianagnahareko, nagnino rehe ie nahafoe ahio?” 47 Naho fa naharey izay ty ila’e amy i ndaty nitsangagne teo rey, le hoe iareo: “Mitoka i Elia ty lahy tia.” 48 Le avy le nilay malaky ty raike amy iareo, le nangalake eponzy, le najò’e agnate i divay makiray ao. Natao’e tamy ty bararata i eponzỳ, le natoho’e ambava i Jesosy eo mba hinome’e. 49 Fa ty ila’e nirehake tie: “Engao’areo avao reke, hagnenteagne aze tie ho avy eo ty Elia hamonje aze.” 50 Le mbe nitoka mafe indraike ty Jesosy, le avy eo reke niala aigne.

51 Ie naho fa niavy eo, le nizara roe boake ambone agne hatrake ambane agne, i ridò tamy i toeragne masigney aoy. Nisy horohoron-tane ka, le nivakivaky i lamilamy rey. 52 Nisokake i kibory rey, le maro tamy ty fate i ndaty masigne rey ro nitsangagne. 53 Maro ty ndaty nahatrea izay. (Tafara ty namelomagne i Jesosy tamy ty mate, le nizilike tamy i tanàgne masigney ao, ty ndaty boake amy ty faritse nisy i kibory rey ey.) 54 Naho fa nahatrea i horohoron-taney naho ze raha niseho iaby zay, i maramila manam-boninahitsey naho i ndaty niambegne i Jesosy rey, le natahotse mafe iareo sady nirehake tie: “Anan’Agnahare vata’e ty lahy tia!”

55 Maro tamy i ampela niarake tamy i Jesosy boake a Galelia agne mba hikarakara aze rey, ro nitalake lavidavitse ze raha iaby rezay. 56 Agnisa izay ty Maria Magdalena, i Maria rene i Jakoba naho i Josesy, vaho i rene i ana-dahy i Zebedio rey.

57 Ie naho fa nifolakandro i androy, le nisy lahilahy boake Arimatia agne zay niavy eo. I Josefa ty agnara’e. Mpiana i Jesosy ka reke. 58 Nimbamy i Pilato mbeo o lahilahy iohoe mba hangatake i fate i Jesosỳ. Le nandily i maramila’e rey ty Pilato mba hagnomey aze i fate i Jesosỳ. 59 Nalae i Josefa i fatey, le nifognose’e tamy ze lamba rongony tena fanjaka zay. 60 Le naleve’e tamy i kibori’e vaovaoy ao ty Jesosy. Lamilamy nilavahagne o kibory iohoe. Naho fa navarimbari’e tamy i lala i kiborỳ eo, ze vato pisake bey niboriboriegne natao hili’e zay, le nandeha reke. 61 Fa i Maria Magdalena naho i Maria rene i Jakoba naho i Josesy, mbe nijanogne tamy i kiborỳ eo avao.

62 Tamy i Andro Fiomanagne amy i Sabataỳ ty nisehoa o raha rehoe iaby. Ie nihamaray igne, le nivory mbamy i Pilato mbeo, o lahibey ty mpisorogneo naho o Fariseò. 63 Le hoe iareo: “O Ragnandria, tadidi’ay fa nirehake i mpisandoke ignehoe tamy ie mbe nivelogney tie: ‘Hovelogne indraike raho afake telo andro.’ 64 Izao areke: Rehafo o maramila’ò mba hiambegne i kiborỳ soa, amparake ty hifenoa i telo androy. Tsy mone ho avy i mpiana’e rey hangalatse i fate’ey, le hirehake amo o ndatio tie: ‘Fa nivelomegne amy ty mate reke.’ Le ho raty ambone i vande voaloha’ey ze raha zay.” 65 Le hoe ty Pilato tamy iareo: “Mangalà mpiambegne, le mandeha miarake amy iareo, sady ambeno’areo soa arake ze vita’areo i kiborỳ.” 66 Nandeha areke iareo, le nisia iareo tampò i vato nahily i kiborỳ sady nasia iareo mpiambegne ka ty teo mba hahavy aze ho voaro soa.