Talily Soa Nisorate i Lioka
9 Nitokave i Jesosy i 12 lahy rey tafara izay, le nimea’e hery naho fahefagne mba handroake demonia naho hagnasitragne ze hene aretegne. 2 Nirahe i Jesosy areke iareo mba hitory miomba i Fanjakàn’Andrianagnaharey naho hagnasitragne ze narare. 3 Le hoe reke tamy iareo: “Ko minday ndra inogn’ino nareo, ndra doda zay, ndra raha fisiagne hanegne, ndra mofo, ndra vola, ndra akanjo roe. 4 Faie ndra aia ndra aia tragno idira’areo, le mijanogna ao amparake ty ialà’areo boake ao. 5 Ndra ia ndra ia tsy mandrambe anareo, le mialà amy ze tanàgne zay ao sady ahintsagno ty lemboke amy ty tombo’areo mba ho vavolombelogne amy iareo. 6 Nandeha isake tanàgne areke iareo, le nitory i talily soay naho nagnasitragne ze narare.
7 Naho fa nirey i Heroda lahibeim-paritse ze raha niseho zay iaby, le nivali-doha reke, satria nisy ndaty nirehake tie nivelogne tamy ty mate ty Jaona. 8 Fa ty ila’e nirehake tie i Elia zay. Nisy ka ty nirehake tie ty raike amo o mpaminany talohao o nivelogne tamy ty mateo. 9 Le hoe ty Heroda: “I Jaona fa tinapako ty loha’e. Ia areke ze o ndaty reiko mahavita manao raha sambe karaza’e zao?” Nite hahatrea i Jesosy mafe areke ty Heroda.
10 Naho fa niheregne i apostoly rey, le nirehafe iareo tamy i Jesosy ze raha iaby natao iareo. Tafara izay, le nente’e nitokagne tamy ze tanàgne raike atao tihoe Betsaida zay agne i apostoli’e rey. 11 Faie nihay i vahoakey zay, hafarà iareo nagnorike aze. Nirambese i Jesosy iareo, le nanomboke nirehake tamy iareo ty miomba i Fanjakàn’Andrianagnaharey reke sady nisitragne’e ka ze narare tamy iareo. 12 Ie nifolakandrokandro i androy, le nimbama’e mbeo i 12 lahy rey sady nirehake tihoe: “Ravao agne o vahoakeo mba hipaliava iareo toeragne hiroroa’e naho hiviliana iareo hanegne amy ty tanàgne marinerine etoy, satria mitokagne ty toeragne misy antikagne toy.” 13 Faie hoe ty Jesosy tamy iareo: “Meo’areo raha hohane’e iareo.” Le hoe iareo tama’e: “Mofo dime naho fiagne roe avao ty anagna’ay. Faie tsy ho ampe iareo zay, naho tsy izahay ro handeha hivily hanegne hoahy ty ndaty retoa iaby.” 14 Lahilahy 5 000 teo ho eo ty teo tamy izay. Le hoe ty Jesosy tamy i mpiana’e rey: “Ampitoboho’areo o ndaty reo, le aharò’areo tsiki-50.” 15 Norihe iareo i reha i Jesosỳ, le nampitobohe iareo i ndaty rey. 16 Nalae i Jesosy i mofo dimey naho i fiagne roey naho fa niavy eo, le niandrandra i lagnitsey reke sady nivavake. Nitapatapahe’e i mofo rey tafara izay, le nimea’e i mpiana’e rey reketse i fiagney, le nizarae iareo tamy i vahoakey. 17 Nihinagne areke iareo iaby, le nivontsy.* Naho fa navory iareo ty sisa tsy lany tamy i mofoy, le nahafeno 12 harogne.
18 Ie tie indraike zay, le nivavake irery ty Jesosy. Naho fa nimbama’e mbeo i mpiana’e rey, le nagnontenea’e tihoe: “Ia ty fahaia o vahoakeo ahy?” 19 Le hoe ty navale iareo: “I Jaona Mpanao Badisa. Fa ty ila’e mirehake tie i Elia. Misy ka ty mirehake tie, raike amo o mpaminany talohao o nivelomegne tamy ty mateo.” 20 Le hoe reke tamy iareo: “A inareo, ia ty fahaia’areo ahy?” Namale ty Petera tie: “I Kristy, i nirahen’Agnaharey.” 21 Le rinara’e mafe iareo mba tsy hirehake izay ndra amy ia ndra amy ia. 22 Hoe ka reke tamy iareo: “Tsy maintsy hampijalé o androanavio naho o lahibey ty mpisorogneo vaho o mpampianatse lalànao i Ana o ndatỳ sady holiere iareo naho hovonoe iareo ka. Faie mbe hovelomegne indraike reke amy ty andro fahatelo.”
23 Hoe ka reke tamy iareo iaby: “Naho misy ndaty te hagnorike ahy, le tsy maintsy mandietse ty vata’e naho minday ty hazo fijalea’e isan’andro isan’andro, sady magnorike ahy avao. 24 Ndra ia ndra ia te hamonje ty fiai’e, le hamoe aze. Fa ndra ia ndra ia mamoe ty fiai’e noho ty amako, le hamonje aze. 25 Ino maregne ty soa hoazo ty ndaty raike naho mahazo ze kila raha amy ty tontolo toy eto reke, faie afoe’e ty fiai’e ndra simba ty fiaigna’e? 26 Ndra ia ndra ia megnatse ahy naho ty rehako, le ho megnatse aze ka i Ana o ndatỳ naho fa ho avy amy ty voninahi’e naho ty voninahin-dRae’e vaho ty voninahy o anjely masigneo. 27 Faie volagneko ama’areo to vata’e, fa misy ama’areo magnatreke etò tsy homate, amparake ty ahatreava iareo i Fanjakàn’Andrianagnaharey.”
28 Ie valo andro tafara ty nirehafa’e izay, le nente’e niarake ama’e ty Petera, i Jaona naho i Jakoba. Nanganike tamy ze vohitse raike zay ty Jesosy mba hivavake. 29 Tamy ireke nivavakey, le namilepiletse ty tarehe’e sady nanjare foty bey ka i akanjo’ey. 30 Nisy lahilahy roe ka nifampirehake tama’e. I Mosesy naho i Elia o lahilahy rehoe. 31 Namilepiletse iareo. Nirehafe iareo ka ty fomba hialà i Jesosy amy ty tontolo toy, i hotanterahe’e a Jerosalema agney. 32 Niazon-droro ty Petera naho i nama’e rey tamy izay. Faie naho fa nifoha iareo, le nahatrea ty voninahy i Jesosy naho ty voninahy i lahilahy roe niarake tama’e teo rey. 33 Naho fa nenga iareo ty Jesosy, le hoe ty Petera tama’e: “O Mpagnanatse, soa ho antika ty mitoboke eto. Engao zahay hanangagne tragnolay telo, le ty raike ho azo, ty raike hoahy i Mosesy, le ty raike hoahy i Elia.” Nirehake izay reke faie tsy fanta’e ze raha nirehafe’e zay. 34 Tamy i Petera mbe nirehakey, le nisy rahogne niforogne ty tambone iareo eo nagnaloke iareo. Naho fa nandrakoke iareo i rahogney, le natahotse iareo. 35 Nisy fiaragnanagne ka ty boake amy i rahogney ao nanao tihoe: “Io i Anak’isoko jinobokoy. Tsanogno’areo reke.” 36 Tamy iareo naharey i fiaragnanagneỳ, le i Jesosy irery avao ty teo. Tsy nirehafe iareo ndra amy ia ndra amy ia i raha nitrea iareo tamy i andro ignehoey.
37 Ie naho fa nizotso boake am-bohitse ey iareo naho fa nimaray igne, le nisy ndaty maro nanalaka i Jesosy. 38 Nisy lahilahy raike zay nirehake mafe tihoe: “O Mpagnanatse, mihalale ama’o raho mba hagnente i ana-dahiko bakotokagne zay. 39 Misy demonia reke. Misy fotoagne reke le avy le mikorakorake avao, sady atao i demoniay mifanitotsintogne le mamore iaby ty vava’e. Ie reke fa deme’e vaho izay enga’e. 40 Fa niangaviako o mpiana’o reo mba handroake aze, faie tsy nivita iareo.” 41 Le hoe ty navale i Jesosy: “Ry taranake tsy manam-pinoagne naho raty fagnahy, hatrake ombia ty tsy maintsy hijanognako ama’areo eto? Hatrake ombia ty tsy maintsy handeferako ama’areo? Indeso mbetoa i ana-dahi’oy.” 42 Naho fa nentegne mbamy i Jesosy mbeo i ajajay, le natonta i demoniay tan-tane eo sady natao’e nifanitotsintogne. Faie niroahe i Jesosy i demoniay, le nisitragne’e i ajajay. Natolo’e an-drae’e reke naho fa niavy eo. 43 Le nilatsa iareo iaby noho ty herin’Andrianagnahare.
Tamy iareo mbe nilatsa noho ty raha natao’ey, le hoe reke tamy i mpiana’e rey: 44 “Tsanogno’areo soa ty raha horehafeko toy sady tadidio’areo: Hisy hifotetse i Ana o ndatỳ, le hatolotse an-tagna o ndatio eo.” 45 Faie tsy niazo iareo ze reha’e zay. Ty anto’e, mbe tsy nabaribary tamy iareo ty dika’e, amy izay tsy azo iareo. Faie natahotse ty hagnontane aze miomba i raha nirehafe’ey iareo.
46 Nialy hevetse i mpiana’e rey tie ia ty fara’e ambone amy iareo. 47 Nihay i Jesosy ty raha tam-po iareo ao, le nangalake ajaja reke sady nampitsangane’e tagnila’e eo, 48 le hoe reke: “Ndra ia ndra ia mandrambe ty ajaja toy amy ty agnarako, le mandrambe ahy. Ndra ia ndra ia ka mandrambe ahy, le mandrambe i nagnirake ahỳ. Ze mihevetse ty vata’e ho fara’e ambane ama’areo, le ie ty fara’e ambone.”
49 Le hoe ty Jaona: “O Mpagnanatse, nahatrea ndaty nandroake demonia amy ty agnara’o zahay, le rinara’ay reke satria tsy miarake amantika.” 50 Faie hoe ty Jesosy tama’e: “Ko raragne reke, satria ze tsy manohetse anareo, le manohagne anareo.”
51 Naho fa nihanarine i andro hangalagne i Jesosỳ, le nitapa-kevetse reke fa handeha ho a Jerosalema agne. 52 Nagnirake ty ila’e tamy i mpiana’ey rey areke reke mba hialoha aze. Le nandeha iareo. Nizilike tamy ty tanà o Samaritanao agne iareo mba hagnomagne ty fiavi’e. 53 Faie tsy nirambese iareo ty Jesosy, satria fa nitapa-kevetse ty ho a Jerosalema agne reke. 54 Naho fa nahatrea izay ty Jaona naho i Jakoba, le hoe iareo: “O Tompo, tea’o vao ty hampipoha’ay afo boake an-dagnitse agne mba handevogne iareo?” 55 Faie nitolike reke sady nendaha’e iareo. 56 Nandeha amy ty tanàgne hafa areke iareo.
57 Tamy iareo tan-dalagne eỳ, le nisy ndaty zay nirehake tie: “Hagnorike azo raho ndra aia ndra aia omba’o.” 58 Faie hoe ty reha i Jesosy tama’e: “O amboahakò manan-davake hitoboha’e, le o vorogneo managne ty tragno’e, fa i Ana o ndatỳ ndra ty hasia’e ty loha’e aza tsy misy.” 59 Hoe ka ty Jesosy tamy ze lahilahy raike zay: “Andao hagnorike ahy.” Faie hoe i lahilahỳ: “O Tompo, engao hey raho handeha handevegne an-draeko.” 60 Le hoe ty Jesosy tama’e: “Engao ty mate handevegne ty mate. Fa irehe, akia mandehana, le tseizo mbaombao i Fanjakàn’Andrianagnaharey.” 61 Nisy ndaty hafa ka nirehake tihoe: “Hagnorike azo raho Tompo, faie engao hey raho hanao veloma ty an-tragno ama’ay ao.” 62 Le hoe ty Jesosy tama’e: “Tsy misy ndaty mitagne lasarỳ faie mitolike magnafara, le ho fagneva i Fanjakàn’Andrianagnaharey.”