Mahery Noho o Demonia ty Jesosy

NAGNINO ro nanjare Satana Devoly ty raike amy i anjelin’Andrianagnahare rey naho ohatse tadidi’o? Tea tegna reke le nagniry hivavahagne. Izay ty nahavy aze nanohetse an’Andrianagnahare. Nisy anjely hafa nanao manahake i Satana ka vao? Eka. ‘Anjely i Satana’, ndra demonia ty irehafa ty Baiboly iareo.​—Apokalypsy 12:9.

Mino ty fisian’Andrianagnahare vao i anjely raty rey ndra i demonia rey? Hoe ty Baiboly: ‘Mino o demonia fa misy ty Andrianagnahare.’ (Jakoba 2:19) Faie matahotse iareo ty amy izao. Fanta’e fa ho sazean’Andrianagnahare iareo satria nanao raha raty. Ino ty raha natao iareo?

Rehafe ty Baiboly fa niala tan-dagnitse agne o anjely rehoe, le nizotso an-tane etoy mba hipetrake etoy manahake o ndatio. Nanao izay iareo satria te hila i ampela soa tan-tane etoy rey. (Genesisy 6:1, 2; Joda 6) Ino ty fanta’o miomba tihoe lahilahy naho ampela mifampila?

Fomba raike mampiharo ty lahilahy naho ty ampela ty tihoe filagne. Va’e hisy ajaja hiforogne ty an-tro i ampelay ao naho fa boake nanao io iareo. Faie tsy toko’e hanao o raha iohoe o anjelio. Ze ndaty mpivaly ara-dalàna avao ty tean’Andrianagnahare hifampila, ty dika izay lahilahy raike naho ampela raike. Amy izay hikarakara ze ajaja va’e hatera iareo i mpivalỳ.

Niova ho ndaty i anjely rey sady nilae’e i ampela rey. Nanagn’anake iareo naho fa niavy eo, le nanjare bey naho abo ty ana iareo naho fa nibey. Tena raty fagnahy i ana iareo rey sady nampijale o ndatio. Nampiavy Safodrano areke ty Andrianagnahare, le nimate iaby i ndaty bey naho abo rey naho ze ndaty raty fagnahy. Nampamboare’e Sambofiara ndra sambo bey ty Noa mba hagnavotagne i ndaty tsiampeampe nanao ty soa rey. Nisaontsie i Mpagnanatse Lahibeỳ fa tena ilaegne ty mitadidy ze raha niseho tamy i Safodranoy.​—Genesisy 6:3, 4, 13, 14; Lioka 17:26, 27.

Ino ty natao i anjely raty rey naho fa niavy i Safodranoy, naho fanta’o? Niheregne ho anjely an-dagnitse agne indraike iareo. Faie fa tsy nanjare anjelin’Andrianagnahare sasa iareo fa nanjare anjely i Satana ndra demonia. Ino ty nanjò i ana’e bey naho abo rey? Nimatemate tamy i Safodranoy iareo, le nimatemate ka ze ndaty tsy nankatò an’Andrianagnahare.

Tsy nengàn’Andrianagnahare hiova ho ndaty sasa i demonia rey nanomboke tamy i Safodranoy. Tsy trea maso o demonia reo, faie mbe mitarike o ndatio hanao raha raty avao. Iareo ty mahavy o haoreagneo ho maro amy hinane zao. Satria natokare boake an-dagnitse agne ho an-tane etoy iareo.

Nagnino ro tsy treantikagne o demoniao? Satria tsy trea maso iareo. Faie fantantikagne fa velogne iareo. Rehafe ty Baiboly fa ‘mamitake ze kila ndaty an-tane etoy’ ty Satana, le magnampe aze i demonia’e rey.​—Apokalypsy 12:9, 12.

Va’e ho voafita i Devoly naho o demonia’e reo ka vao tika? Eka, ho voafita’e tika naho tsy mitao. Faie tsy toko’e hatahotse tikagne. Hoe i Mpagnanatse Lahibeỳ: ‘Tsy manandily amako ty Devoly.’ Hiaro antikagne amy i Devoly naho o demoniao ty Andrianagnahare naho mifandrambe soa ama’e lognandro tikagne.​—Jaona 14:30.

Tena ilaentikagne ty mahafantatse ze raha raty andrisiha o demoniao antikagne. Eretsereto soa areke zao: Inogne iaby ty raha raty anoe o demoniao? Nila ampela iareo taloha i Safodranoy. Faie raha tsy toko’e hatao ty anjely zay. Fale i demonia rey naho tsy mankatò ty lalàn’Andrianagnahare miomba ty filagne o ndatio. Mba valeo moa ty fagnonteneagne toy: Ia avao ty toko’e hifampila? Maregne i toin-dreha’o tihoe tie ze mpivaly ara-dalàna avao.

Misy ajalahy naho somondrara mifampila faie tsy mete zay. Misy boke amy Baiboly ao mirehake miomba ty ‘ty maha lahilahy. (Levitikosy 15:1-3) Maha ampela ty agnara ty taovam-pananaha o ampelao. Misy anto’e manokagne nahavy i Jehovah namorogne o raha rehoe, sady natao’e hoahy ty mpivaly avao. Fale o demoniao naho fa manao ty raha tsy engà i Jehovah hatao’e o ndatio. Fale ohatse iareo naho fa mihisa ty maha lahilahy ty ajaja raike ty ajaja ampela raike. Fale ka iareo naho fa mihisa ty maha ampela ty ajaja raike ty ajaja lahilahy raike. Faie tsy te hampifale o demoniao tikagne, sa tsy izay?

Misy raha hafa ka tea o demoniao faie tsy tea i Jehovah. Inogne zay naho fanta’o? O hampiarotegneo. (Salamo 11:5) Ndaty raty fagnahy o ndaty mpiarotegneo satria mampijale ty ndaty hafa. Tadidio fa izay ty natao i ndaty bey naho abo ana i demonia reỳ.

Tea o demoniao ka ty mamerevere o ndatio. Misy fotoagne iareo sare mangala-tahake ty pozy o ndaty fa nimateo. Hay iareo aza ndra ty mitsikombe ty feo o ndaty fa nimateo. Amy izay maro ty ndaty voafitake tie mbe velogne avao o ndaty mateo sady afake mirehake amy ty ndaty velogne. Manjare mino o angatseo areke ty ankamaroa o ndatio.

Tsy maintsy mitao tikagne mba tsy ho voafita i Satana naho o demonia’eo. Hoe ty Baiboly: ‘Miseho ho anjely ty mazava ty Satana sady manao hoe izay ka o mpanompo’eo.’ (2 Korintianina 11:14, 15) Faie tena raty i demonia’e rey. Andao hohenteantikagne ty fomba va’e hitariha’e antikagne hanahake aze.

Akore ty hahavy o ndatio hianatse raha raty maro miomba o hampiarotegneo, o fanoagne filagne malotò, o anjely ratio naho o angatseo? Misy filma ndra raha hafa boake amo o tele eo naho o radiò naho o Interneteo vaho o bokeo ty ahatreavagne ty maro amo o raha rehoe. Naho ty heve’o, mifandrambe amy i Jehovah vao tikagne naho manao o raha rehoe sa mifandrambe amy i Devoly naho o demoniao?

Ia ty fale naho mitsanogne sady magnente raha raty tikagne? Izay, i Satana naho i demonia’e rey. Ino areke ty tsy maintsy ataontikagne? Mamaky, mitsanogne, sady magnente ze raha mahasoa antikagne naho magnampe antikagne hanompo i Jehovah. Rehafo areke ty ila’e amy raha soa zay!

Tsy toko’e hatahotse o demoniao tikagne naho manao ty soa. Mahery noho iareo ty Jesosy, le atahora’e. Indraike andro zay, le hoe iareo tamy i Jesosy: ‘Avy mba hamonovono anay v’iheo?’ (Marka 1:24) Ho fale vata’e tikagne naho fa ho avy ty fotoagne hamonovonoa i Jesosy i Satana naho o demoniao, sa tsy izay? Faie amparake ty hiavia izay, le hiaro antika ty Jesosy naho mifandrambe soa ama’e naho aman-dRae’e lognandro tika.