Tsy Nitagne ty Vava Nanoe’e Iareo

Hoe ty Jehovah tamy i Mosesy: ‘Manganiha atoy fa hisy lalàna homeiko azo, hosorateko amy ty vato pisake.’ Nanganike tamy i vohitsey ey ty Mosesy sady nijanogne tagne 40 andro. Sinora i Jehovah tamy ty vato pisake roe i Lily Foloy, le nimei’e i Mosesy.

Ela tam-bohitse agne ty Mosesy, le nieretseretse o Israelitao tie nenga’e. Hoe iareo tamy i Arona: ‘Ipaliao mpitarike zahay, sady amboaro andrianagnahare.’ Hoe ty Arona: ‘Omeo’areo atoy o volamena’areò.’ Natrana i Arona sady namboara’e sare vongagne anak’agnombe i rahay. Hoe i vahoakey: ‘O anak’agnombe iohoe ty Andrianagnahare nitarike antika boake a Ejipta agne.’ Nanao fete iareo sady nivavake tama’e. Tsy nitagne ty vava nanoe’e tamy i Jehovah iareo.

Nivazoho i Jehovah zay, le hoe reke tamy i Mosesy: ‘Mizotsoa rehe fa nivalike amako o vahoakeo. Nanompo andrianagnahare hafa iareo.’ Nizotso ty Mosesy, le nente’e i vato pisake roey.

Naho fa narine i tobey reke, le nahatrea o vahoakeo nihirahira sady nitsinjake naho nivavake tamy i anak’agnombey. Boseke ty Mosesy, le natora’e an-taneo i vato pisake rey le nipotepoteke. Nipotehe’e ka i sare vongagne anak’agnombey. Le hoe reke tamy i Arona: ‘Natao o vahoakeo akore i reheo ie le nagneke avaò?’ Hoe ty Arona: ‘Ko boseke rehe fa fanta’o soa ty vahoake retoa. Nangatake andrianagnahare iareo, le natorako agnate afo ao ty volamena iareo, le o anak’agnombe iohoe ty niakatse boake ao.’ Tsy mete ty raha nanoe i Arona. Nandeha tamy i vohitsey agne indraike ty Mosesy mba hangatake i Jehovah hamela ty helo o vahoakeo.

Namela ty hadisoa ze nankatò aze ty Jehovah. Trea tamy io fa nila nankatò ty fitariha i Mosesy o Israelitao.