Nanohetse i Jehovah Iareo

Tafara tatoy, le nanohetse i Mosesy ty Kora, i Datana naho i Abirama vaho ty lahilahy 250. Hoe iareo: ‘Fa entsake azo zahay kahe. Ihe naho i Arona avao vao ro toko’e ho mpisorom-bey sady mpitarike? Izahay ka teà i Jehovah fa tsy inareo avao.’ Tsy nahafale i Jehovah ty fanoheragne i ndaty finili’e rey.

Hoe ty Mosesy tamy i Kora naho o ndati’e reo: ‘Miavia an-tragno lay i Jehovah ao naho maray, le mindesa findesagn’afo sady asio raha magnitse. Le hotreantikagne eo ze filie i Jehovah.’

Ie nimaray igne, nifanao fotoagne amy i Mosesy tamy i tragno lay masigney agne ty Kora naho o ndati’e 250 reo. Sambe nagnoro ty raha magnitse nente’e iaby iareo. Le hoe ty Jehovah tamy i Mosesy naho i Arona: ‘Mihalavira i Kora naho ty lahilahy miarake ama’e nareo.’

Nimbamy i Mosesy tan-tragno lay masigney agne ty ry Kora, fa i Datana naho i Abirama vaho ty keleia iareo tsy nandeha, fa nitsangagne taloha i tragno iareoy eo. Nisaontsia i Jehovah o Israelitao mba tsy hagnarine ty tragno lay iareo. Nisintake malaky o Israelitao. Nisokake tampoke i taney, le nitelegne iareo. Faie nisy afo nipoke boake an-dagnitse agne ka nagnoro i Kora miharo i 250 lahy rey.

Hoe ty Jehovah tamy i Mosesy: ‘Alao ty kobay ty mpitarike ty foko tsikiraidraike, le sorato eo ty agnara’e. Ty agnara i Arona ty sorato amy ty kobay ty foko i Levy. Anò agnila i tragno lay masigney eo i kobaigne rey, fa hisy folera hitiry amy ty kobay ty lahilahy ho filieko.’

Nindese i Mosesy iaby ze kobaigne navori’e, le natoro’e o mpitarikeo. Faie ty kobay i Arona raike avao ro nitiria ty folera. Tamy izay ty nagnamafea i Jehovah tie i Arona ty finili’e ho mpisorom-bey.