I Namàna Naho i Ajaja Ampela Israelitay

Nisy ajaja Israelita raike nipetrake lavitse ty longo’e ta Syria agne. Nandese o maramila syrianao tagne reke, le nanjare ndevo ty valy i Namàna, lahibey ty maramila. Nanompo i Jehovah avao o ajaja iohoe ndra tie tsy nisy tea i Jehovah ty ndaty tagne.

Narare mafe ty Namàna fa boka. Te hagnampe aze i ajaja israelitay, le nirehake tamy i valy i Namànay tie: ‘Fantako ty ndaty afake magnasitragne i vali’o. I Elisa ty agnara’e sady mpaminany i Jehovah a Israely agne reke. Ho vita’e ty hagnasitragne i vali’o.’

Nirehafe i vali’e tamy i Namàna iaby ze raha nirehafe i ajajay. Te ho sitragne mafe ty Namàna, le nandeha tamy i Elisa a Israely agne. Nieretseretse reke tie ndaty ambone, le hagnaja aze ty Elisa. Kay ndra i mpiasa i Elisay avao ty nampirehafe’e ama’e tie: ‘Miandroa impito amy ty Renerano i Jordana agne rehe, le ho sitragne.’

Diso fanantenagne ty Namàna, le hoe reke: ‘Ataoko mba hitoka ty Andrianagnahare’e reke, le hanao fahagagagne mba hagnasitragne ahy. Tsy aleoko ndra miandro amy ty renerano a Syria agne. Toe soa mihoatse ty ahy Israely ty agne.’ Boseke ty Namàna le nandeha noly.

Nampisaintsaigne i Namàna i mpiasa’e rey tie: ‘Tsy te ho sitragne v’iheo? Raha tsy mba sarotse ampanoe i mpaminanỳ azo zay vao le tsy ho vita’o?’ Nagneke ty Namàna, le nandeha mbamy i Renerano i Jordanay mbeo sady nijorobogne impito tagnate’e tao. Naho fa nivita zay, le nisitragne vata’e reke. Nandeha nisaotse i Elisa reke sady nirehake tie: ‘Fantako hinane zao fa i Jehovah ro Andrianagnahare vata’e.’ Nanao akore ty nihafalea i ajaja israelitay naho fa nisitragne ty Namàna?