Nanam-paharetagne Tamy i Jona ty Jehovah

Raty toetse ty ndaty tamy ty tanàgne asyriana ta Ninive agne. Nirahe i Jehovah ho agne ty Jona mpaminany, hampitao ty ndaty agne mba hiova iareo. Faie ndra nilay an-tane hafa ty Jona, le nandeha sambo ta Tarsisy agne.

Nisy tiobey naho fa tagnate riakey i samboy. Natahotse iaby i tantsambo rey, le sambe nivavake tamy ty andrianagnahare iareo tie: ‘Ino ty mahavy izao? Hoe ty Jona tamy iareo: ‘Izaho ty mahavy izao. Tsy nankatò i Jehovah raho fa nilay. Atoraho’areo an-driakey raho, le ho soa ty andro toy.’ Tsy te hanorake aze i tantsambo rey, faie mami’e ty fiay iareo, le natora iareo reke. Nijanogne amy izay i tiokey.

Fa tsy nitamà ho velogne ty Jona. Nivavake tamy i Jehovah reke naho fa nilenteke. Le nandefa trozogne hitelegne aze ty Jehovah, le tsy nimate reke. Naho fa tagnate tro i trozogney ao ty Jona, le nivavake tie: ‘Hankatò azo avao raho Jehovah.’ Narova i Jehovah ty Jona, le tsy nimate ndra tie telo andro tan-tro i trozogney ao. Nasae i Jehovah naloa i trozogney tamy ty tane maike amy izay reke naho fa niavy eo.

Navota i Jehovah ty Jona. Faie tsy nandeha a Ninive agne sasa vao reke? Mbe nirahe i Jehovah ho agne reke. Nitory reke tie: ‘Ho rava ty Ninive afake 40 andro.’ Tsy nampoizegne fa nitsanogne aze i ndaty rey le niova. Hoe ty mpanjaka i Ninive tamy i vahoakey: ‘Mivavaha amy i Jehovah tika sady miovà, amy izay tikagne tsy hovonoe’e.’ Naho fa nivazoho i Jehovah tie niova iareo, le tsy rinava’e ty Ninive.

Boseke ty Jona naho fa tsy niravaegne i tanàgney. Mba dineho! Nandefetse naho namindra fo tamy i Jona ty Jehovah, fa i Jona tsy mba namindra fo tamy ty ndaty a Ninive ao. Le niala i tanàgney ty Jona sady nitoboke tambane ty aloke ty vatavo raike sady nitorifike. Mate amy izay i raha mitirỳ, le niboseke ty Jona. Le hoe ty Jehovah tama’e: ‘Le i raha mitirỳ vao ro teà’o mandikoatse ty ndaty a Ninive ao? Faie namindra fo tamy iareo raho le tsy mate iareo.’ Te hisaontsy ty Jehovah fa sarobily mihoatse i raha mitirỳ ty ndaty a Ninive ao.