Tanora Efatse Nankatò i Jehovah

Naho fa nandese i Nebokadnezara ta Babylona agne ty mpifehe i Joda, le nijobogne ze tanora mahira-tsaigne naho salama soa reke. Nampiofagnegne tagnate ty telo taogne o tanora reo mba hanjare ndaty manan-kaja a Babylona ao. I Aspenaza tandapa ty nampikarakaraegne iareo. Nampianaregne nanoratse, namaky naho nirehake akadiana, firehake ta Babylona tao iareo. Nimeagne hanegne tamy ty hane i mpanjakay naho ty tandapa’e ka iareo. I Daniela, i Hanania, i Misaela naho i Azaria ty efatse tamo o tanora reo. Nimea i Aspenaza agnaragne babyloniana vaovao iareo, le i Beltesazara, i Sadraka, i Mesaka naho i Abednego. Nampiova iareo vao ze fampianaragne zay?

Nanapa-kevetse tsy hivalike tamy i Jehovah iareo. Tsy nihinagne tamy i hane i mpanjakay iareo, satria nahafantatse tie maloto amy ty Lalà i Jehovah ty hanegne ila’e. Hoe iareo tamy i Aspenaza: ‘Ko meagne amy ty hane i Mpanjakay zahay ajafady.’ Hoe ty Aspenaza: ‘Hahia nareo naho tsy mihinagne, sady atao i mpanjakay tsy nimeako hanegne, le hovonoe’e amy izay raho.’

Hoe ty Daniela tamy i mpiambegney: ‘Omeo legioma naho rano avao zahay agnate ty folo andro, le ampirao amy ze mihinagne amy ty hane i mpanjakay reo.’ Nagneke i mpiambegney.

Naho fa niafake folo andro, le nampiraegne tamy ila’e rey ty ry Daniela faie iareo ty natanjake. Fale ty Jehovah fa nankatò aze iareo, le nimea’e fahendreagne hahay mamantatse ty dika ty nofy naho ty fahitagne ty Daniela.

Naho fa nivita i fampiofagnagney, le nindese i Aspenaza mbamy i Nebokadnezara mbeo iareo. Trea i mpanjakay tie i Daniela naho i ragne’e telo lahy rey ty natanjake naho nahira-tsaigne mandikoatse ila’e rey. Finili’e hiasa tan-dapa’e tao iareo efa-dahy sady nanjare mpanoro hevetse aze. Natao i Jehovah hendre ambone ty ndaty hendre naho ty ndaty mpanao mazỳ ta Babylona ao iareo.

Ndra tie tsy tamy ty tane’e ty Daniela, i Misaela, i Hanania naho i Azaria, le natoro iareo avao tie mpanompo i Jehovah iareo. Manahafa ry Daniela ka nareo.