Ty Manda i Jerosalema

Hohenteantikagne indraike ty raha niseho tamy ty andro i Nehemia. Israelita nitoboke tamy ty tanà i Sosana, ta Persa agne ty Nehemia. Mpanompo i Artaksersesy Mpanjaka reke. Niavy boake a Joda agne ty rahalahy i Nehemia hitalily tie: ‘Matahotse o vahoake a Jerosalema ao reo, fa mbe tsy vita voatse avao i manday naho ty lalambey sinimba o Babylonianao.’ Nanahelo ty Nehemia, le nivavake reke sady nangatake tamy i mpanjakay mba hiheregne a Jerosalema agne.

Nitrea i mpanjakay tie nanahelo ty Nehemia. Hoe reke: ‘Tsy fatao’o zao Nehemia! Misy inogneo?’ Hoe ty Nehemia: ‘Manahelo raho fa rava ty tanàko.’ Hoe i mpanjakay: ‘A ino ty tea’o hataoko ho azo?’ Nivavake am-po tsielatsiela ty Nehemia, le namale tie: ‘Engao handeha a Jerosalema agne raho hamboatse i manda’ey.’ Nagneke ty Artaksersesy Mpanjaka sady nagnomey maramila hiaro aze an-dalagney. Natao’e governora i Joda ka ty Nehemia, le nimea’e hatae hamboaragne ty lalambey i tanàgney.

Nagnente i manda simbay ty Nehemia naho fa niavy ta Jerosalema ao. Navori’e o mpisorogneo naho o mpifeheo, le hoe reke: ‘Mampatahotse toa. Mila manomboke miasa tikagne.’ Nagneke i vahoakey, le nanomboke namboatse i manday.

Nikizake o Israelitao ty fahavalo iareo ila’e, le nanao tihoe tie: ‘Ndra o amboao tsy hampihotrake ty manda aore’areo tiagne?’ Nanohy niasa avao Israelita rey fa tsy nidare ty fagnaratia iareo. Le nanjare abo naho mafe oregne i manday.

Nanapa-kevetse hanafike i Jerosalema tampoke ty fahavalo iareo. Natahotse o Jiosio naho fa naharey izay, faie hoe ty Nehemia: ‘Ko matahotse fa magnampe antika ty Jehovah.’ Nasia’e mpiambegne hiaro aze o mpamboatseo, le tsy afake nanafike o fahavalo iareò.

Vita soa i manday naho ty lalambei’e naho fa niafake 52 andro. Nente i Nehemia mba Jerosalema mbeo iaby o Levitao hitokagne aze. Zinara’e ho antoko mpihira roe iareo. Nanganike tamy ty fanganihagne amy i manday eo iareo. Nisarake iareo naho fa niavy eo, sady sambe nandeha tamy ty lalagne mifanipake magnodidigne i tanàgney, amparake ty ifanalakà iareo amy i tempolỳ eo. I Ezra niarake tamy ty antoko raike, le i Nehemia niarake tamy ty raike hafa. Nihira hoahy i Jehovah iareo sady nitioke antsiva, nijera langorogne naho nititike harpa. Nanao fagnatetse hoahy i Jehovah iaby o vahoakeo. Hafaleam-bey ty tamy izay! Ndra ty ndaty lavitse, le naharey ty hira iareo.