Nitsepahegne ty Jesosy

Fa halem-bey tamy izay sady nazava volagne. Nimbamy ty Vavasaka i Kidrona mbeo ty Jesosy naho o apostoli’e reo, fa ho amy ty Vohitse Oliva agne. Naho fa niavy tamy ty tete i Getsemane ao iareo, le hoe ty Jesosy: ‘Mitoboha etoa nareo sady ko miroro.’ Nandeha mbamy i tetekey mbeo reke, le nitongaleke. Nitsemboke mafe reke, le nivavake tamy i Jehovah tie: ‘Lonike abey ty zoton’arofo’o ro hatao.’ Nandefa anjely ty Jehovah mba hampahery aze. Naho fa nizoe i Jesosy niroro ty telo tamy i apostoly rey, le hoe reke: ‘Mifohaza nareo fa tsy fotoagne firoroagne sasa zao! Fa avy ty lera hanoloragne ahy an-tagna ty fahavaloko eo.’

Niavy amy izay ty Jodasy ninday vahoake maro, ninday mesabey naho kobay. Fanta’e soa tie aia ty hahatreavagne i Jesosy, satria reke mpandeha mateteke tamo o tetekeo ao. Fa nirehake tamo o maramilao ka ty Jodasy, fa hatao’e ze hamantara iareo i Jesosy. Le avy le nimbamy i Jesosy mbeo amy izay reke sady nanao tihoe: ‘Salama Mpagnanatse!’ Le norofa’e ty Jesosy. Hoe ty Jesosy tama’e: ‘Oroke hao kahe Jodasy ty amaliha’o ahy?’

Nimbamy i vahoakey mbeo ty Jesosy, le hoe reke: ‘Ia palie’areò?’ Hoe iareo: ‘I Jesosy te Nazareta.’ Hoe ty navale’e: ‘I raho zay.’ Nihemotse i lahilahy rey sady nitonta an-taneo. Faie hoe indraike ty Jesosy: ‘Ia palie’areò?’ Le hoe iareo: ‘I Jesosy te Nazareta.’ Hoe ty navale i Jesosy: ‘Fa nambarako anareo anio, fa i raho zay, faie engao handeha hey retoagne.’

Niendrake loatse ty Petera, le avy le tinapa’e tamy i mesa’ey ty sofy i Malko, mpanompo i mpisorom-beỳ. Faie nitsapae i Jesosy i sofi’ey, le nisitragne. Hoe reke tamy i Petera: ‘Ahajao agne i mesa’oy. Fa ze mialy amy ty mesabey, le ho mate ty mesabey.’ Tsinepa o maramilao ty Jesosy naho niavy eo, le finehe iareo taly ty tagna’e. Fa i apostoly rey, nilay iaby. Nandese iareo tamy i Anasy lahibey ty mpisorogne agne reke. Nagnontenea i Anasy ty Jesosy, le nalefa’e tan-tragno i Kaiafa mpisorom-bey agne. Ino ty raha niseho tamy i apostoly rey?