Mate ta Golgota ao ty Jesosy

Nandese ty lahibey i mpisorogne rey tan-dapa i governoray agne ty Jesosy. Hoe ty Pilato: ‘Ino ty raha natao’e agnameloha’areo o lahio?’ Hoe iareo: ‘Nirehake ty vata’e ho mpanjaka reke!’ Hoe ka ty Pilato tamy i Jesosy: ‘Mpanjaka o Jiosio vao rehe?’ Namale ty Jesosy tie: ‘Tsy agnisa ty tontolo toy ty Fanjakàko.’

Nalefa i Pilato tamy i Heroda agne ty Jesosy kera trea’e ty hadisoagne nanoe’e. Faie tsy nahatrea ty helo i Jesosy ka ty Heroda, le nagneregne aze tamy i Pilato agne. Hoe ty Pilato tamo o vahoakeo: ‘Ndra i Heroda ndra izaho tsy mahatrea ty helo o lahio. Hovotsorako reke.’ Nikorake i vahoakey tie: ‘Vonò reke! Vonò!’ Jinera i maramila rey tamy ty karavasy naho nandrora’e ty Jesosy. Nasia iareo satroke fatike ty loha’e, le nitsikihe iareo reke tie: ‘Manalama azo zahay Mpanjaka.’ Hoe indraike ty Pilato tamo o vahoakeo: ‘Tsy treako ty hadisoa o lahio.’ Nikorake i vahoakey tie: ‘Peho amo o hazo fijaleagneo reke!’ Hafara’e natolo i Pilato hovonoe iareo ty Jesosy.

Nandese iareo ta Golgota agne ty Jesosy, le nipehe iareo tamy ty hazo fijaleagne. Nivavake ty Jesosy tie: ‘Mamelà ty helo iareo Baba fa tsy fanta iareo ty raha atao’e.’ Natao iareo fiheheagne ty Jesosy, le hoe iareo: ‘Mizotsoa boakey rehe naho toe anan’Andrianagnahare vata’e! Sady avoto ty vata’o.’

Nisy malaso roe nihantogne tagnila’e teo. Hoe ty raike tama’e: “Tsiarovo raho naho fa avy amy i Fanjakà’oy agne rehe.” Nampitamà aze ty Jesosy tie: “Hiarake amako amy i paradisay agne rehe.” Naho fa nifolakandro, le nisy iegne tagnate ty telo lera ty nagneneke i taney. Nitsangagne tagnila i Jesosy eo ty mpiana’e ila’e naho i Maria rene’e. Nampikarakarae i Jesosy i Jaona ty Maria.

Hoe ty Jesosy tamy ty fara’e tie: “Vita!” Niondreke reke, le nimate. Nisy ezegnezen-tane mafe tamy izay. Niriatse ty ridò bey nampisarake ty Masigne naho ty Masigne Vata’e tamy i tempolỳ ao. Le hoe ty lahibey i maramila rey tie: ‘Anan’Andrianagnahare vata’e o lahio.’