Niheregne An-dagnitse Agne ty Jesosy

Nifankatrea tamy i mpiana’e rey ty Jesosy ta Galilia agne. Izao ty nandilia’e iareo: ‘Anò mpianatse ty ndaty amy ty tane toy iaby. Ampianaro iareo ze raha nampianareko anareo, le anò badisa iareo.’ Izao ka ty nampitamàe’e: ‘Ko haligno, fa hiarake ama’areo avao raho.’

Efapolo andro tafara ty niveloma i Jesosy, le niseho tamy ty mpiana’e 100 ta Galilia agne naho ta Jerosalema agne reke. Nampianatse iareo reke sady nanao fahagagagne. Niseho tamo o mpiana’e reo tamy i Vohitse Olivay eo reke tamy ty fara’e. Hoe reke: ‘Ko miala a Jerosalema ao, fa ligniso avao ty raha nampitamaen-dRaeko anareo.’

Tsy azo i apostoli’e rey ty tea’e hambara. Hoe iareo: ‘Amy izao vao ty fotoagne haha Mpanjaka Israely azo?’ Hoe ty Jesosy: ‘Mbe tsy amy izao ty anoa i Jehovah ahy ho Mpanjaka. Faie kele sisa, le hahazo i fagnahy masigney nareo, le ho vavolombeloko. Mandenà mitory a Jerosalema ao, a Joda naho a Samaria agne vaho amy ty faritse fara’e lavitse amy ty tane toy.’

Le niakatse an-dagnitse agne ty Jesosy, le nisy rahogne nanakogne aze. Mbe niandra avao i mpiana’e rey faie fa tsy nahatrea aze sasa.

Le niala tamy i Vohitse Olivay eo i mpiana’e rey, le nandeha a Jerosalema agne. Nivory mateteke iareo mba hiarake hivavake. Nandigne ty toromareke fagnampe’e boake amy i Jesosy iareo.