Ianaro ty Saontsin’Andrianagnahare
Nagnino ty Andrianagnahare ro Mienga o Haratiagneo Naho o Fijaleagneo Hisy?
Hodinehentikagne amy ty lahatsoratse toy ty fagnonteneagne va’e fa napetra’o. Ho trea’o ato tie, aia amy Baiboly ao ty vale’e. Ho fale ty Vavolombelo i Jehovah hiarake midineke ama’o ty miomba izay.
1. Akore ty niatomboha o haratiagneo?
Nanjare nisy haratiagne ty tan-tane etoy naho fa nirehake vande voaloha’e ty Satana. Tsy raty toetse reke tamy tie reke vaho niforognegne. Anjely voririke reke, faie “tsy nipiteke tamy ty maregne.” (Jaona 8:44) Nagniry hivavahagne reke, faie Andrianagnahare raike avao ty toko’e hivavahagne. Navandeza’e ty Eva, i ampela voaloha’ey, sady nirese’e lahatse mba hankatò aze fa tsy hankatò an’Andrianagnahare. Tsy nankatò ka ty Adama, le nanjare nisy o fijaleagneo naho o fateo.—Vakio ty Genesisy 3:1-6, 17-19.
Nitaogne i Eva handietse ty fitondran’Andrianagnahare ty Satana, naho fa nandrisike aze tsy hankatò. Nagnorike i Satana ka ty ankamaroa o ndatio, le tsy nagneke an’Andrianagnahare ho Mpitondra. Nanjare “mpitondra ty tontolo toy” areke ty Satana.—Vakio ty Jaona 14:30; Apokalypsy 12:9.
2. Nisy tsy nimete vao ty raha niforognen’Andrianagnahare?
Afake nankatò an’Andrianagnahare o ndatio naho o anjely niforogne’eo. (Deoteronomia 32:5) Niforogne’e ho afake hifily hanao ty soa ndra hanao raty tikagne. Afake maneho ty hateantikagne aze areke tikagne.—Vakio ty Jakoba 1:13-15; 1 Jaona 5:3.
3. Nagnino ty Andrianagnahare ro mienga o fijaleagneo hisy?
Mbe mandefetse amy ze mandietse i fitondra’ey ty Jehovah mba hampisehoagne fa tsy hahomby o ndatio naho tsy i reke ty mitondra. (Jeremia 10:23) Magnamaregne izay ty raha nisy tagnate ty 6 000 taogne. Tsy nahavita namoagne o alio, o hampiarotegneo, o tsy rare’eo, vaho o aretegneo o mpitondra olombelogneo.—Vakio ty Mpitoriteny 7:29; 8:9; Romanina 9:17.
Mandrambe soa ze magneke an’Andrianagnahare ho Mpitondra. (Isaia 48:17, 18) Hofaragna’e tsy ho ela o fitondran’olombelogneo iaby. Ze mifily aze ho Mpitondra aze avao ro hiaigne an-tane etoy.—Isaia 2:3, 4; 11:9; vakio ty Daniela 2:44.
4. Manam-paharetagne ty Andrianagnahare, ino ty azontikagne atao?
Nirehake ty Satana fa tsy hisy ndaty hankatò i Jehovah. Manam-paharetagne ty Andrianagnahare, le afake mampiseho tikagne tie, ia ty ekentikagne ho mpitondra: Andrianagnahare sa olombelogne. Ty fomba fiaignantikagne ty ahatreavagne izay.—Vakio ty Joba 1:8-11; Ohabolana 27:11.
5. Akore ty ampisehoantikagne fa Andrianagnahare ty filientikagne ho Mpitondra?
Manao izay tikagne naho fa mipay sady magnorike ty fivavahagne maregne, mifagnarake amy ty Saontsi’e, le ty Baiboly. (Jaona 4:23) Tsy manao politike naho tsy mialy ka tikagne mitovy amy ty natao i Jesosy.—Vakio ty Jaona 17:14.
Mampiasa ty heri’e ty Satana mba handrisike o ndatio ho raty findesam-batagne naho hanao raha raty. Va’e hisy namantikagne naho longontikagne hitsikike naho hanohetse antikagne naho fa tsy manao irey tikagne (1 Petera 4:3, 4) Mila mifily areke tika. Hiarake amy ty ndaty tea an’Andrianagnahare vao tikagne? Hankatò ty fitsipi’e feno hatea naho fahendreagne vao tikagne? Izay ty agnaporofoantikagne fa mavande ty Satana naho fa mirehake tie tsy hisy hankatò an’Andrianagnahare.—Vakio ty 1 Korintianina 6:9, 10; 15:33.
Naho mipay fagnazavagne fagnampe’e, le henteo ty boke Inogne Vata’e ty Raha Ampianare ty Baiboly? toko 11, naboa ty Vavolombelo i Jehovah.
[Sare]
Nanao safidy raty ty Adama
[Sare]
Ty safidintikagne ty ahatreavagne tie Andrianagnahare ty teantikagne ho Mpitondra antikagne