Fagnontenea O Mpamakio...
Hahatofoke vao ty Hiaigne Nainai’e amy i Paradisay Ao?
▪ Mampitamà ty Baiboly fa ho afake hiaigne nainai’e amy i Paradisa an-tane etoỳ tikagne. (Salamo 37:29; Lioka 23:43) Hahatofoke vao ty hiaigne nainai’e amy ty tontolo raike voririke?
Lahibey ze fagnonteneagne zay. Trea o mpikarokeo fa naho manjare tofoke loatse ty ndaty raike, le va’e hanjare hinekoneko naho kivy vaho ho sahisahy raty. Ty ndaty tsy managne tanjogne amy ty fiaignagne ndra rokake ty fiaignagne andavanandro ro va’e ho tofoke amy ty fiaignagne. Tsy hisy tanjogne vao ty fiaigna o ndaty amy i Paradisay ao? Hahatofoke vao ty raha hanoegne andavanandro?
Mareho fa i Jehovah Andrianagnahare, i Nampanoratse o Baibolioy, ro mampitamà fiaignagne nainai’e. (Jaona 3:16; 2 Timoty 3:16) Ty hatea ty toetse tena mampiambake aze. (1 Jaona 4:8) Tena tea antikagne ty Jehovah sady ireke ro nagnomey antikagne o raha tena teantikagne amy izao reo.—Jakoba 1:17.
Fanta i Mpamorogne antikagney fa toko’e hisy tanjogne ty raha ataontikagne naho te ho sambatse tikagne. (Salamo 139:14-16; Mpitoriteny 3:12) Tsy hianto avao ty asa atao o ndatio amy i Paradisay ao. Handrambe soa amy ty asa atao’e reke naho ty ndaty tea’e. (Isaia 65:22-24) Le hahatofoke azo vao ty fiaignagne naho mahaliagne sady mampavitribitrike ty asa atao’o agnate ty andro raike?
Mareho ka fa tsy ze kila ndaty ro henga i Jehovah Andrianagnahare hiaigne amy i Paradisay ao. Ze manahake i Jesosy Ana’e ro mea’e fiaignagne nainai’e. (Jaona 17:3) Nahafinaritse i Jesosy ty nanao ty zoton’aforon-dRae’e tamy ty reke tambone tane etoy. Nampianare’e ze mpanonjohy ty lia’e tamy ty rehake naho ty atao’e fa ty magnomey ro tena mahasambatse tie amy ty mandrambe. (Asan’ny Apostoly 20:35) Ho tea an’Andrianagnahare naho ty nama’e ze ndaty hiaigne amy i Paradisay ao arake i lily lahibey faharoey. (Matio 22:36-40) Alao sare an-tsaigne tie ndaty tsy tea tegna ro magnodidigne azo, sady tea azo ro tea ty asa’e iareo! Le hahatofoke azo vao ty hiarake amy ty ndaty hoe izay?
Hanao akore ty fiaignagne amy i Paradisay ao? Hianatse raha vaovao miomba i Mpamorogney tikagne isan’andro. Fa maro ty raha mahalatsa miomba ty raha finoro i Jehovah trea o mpikarokeo. (Romanina 1:20) Faie zara’e naho mba mahafantatse o raha finorogneo tikagne amy hinane zao. Nandineke indraike ze fanta’e miomba izay ty Joba agn’arivo’e taogne maro lasa zay, le hoe reke: “Vaho kedekede amy ty raha vita’e zay, sady vaho bisibisike avao ty reintikagne miomba aze! Fa naho i hotroke mafe boake ama’e agney, ia ty mahafantatse izay?” (Joba 26:14) Mbe maregne avao o reha’e rehoe.
Tsy ombia ho fantantikagne ze kila raha miomba i Jehovah Andrianagnahare naho ty asa’e ndra tie hiaigne nainai’e aza tikagne. Rehafe ty Baiboly fa nataon’Andrianagnahare tam-pontikagne ao ty fagniriagne hiaigne nainai’e. Rehafe’e ao ka fa ‘tsy ho fantantikagne ty asan’Andrianagnahare boake am-boaloha’e hatrake ampara’e.’ (Mpitoriteny 3:10, 11) Le ho tofoke hianatse raha vaovao miomba i Mpamorogney vao rehe?
Ndra tie amy izao aza, le tsy hahatofoke ty ndaty tondregne manao asa mba hahasoa ty hafa naho hideragne an’Andrianagnahare ty fiaignagne. Azo antoke ka fa tsy ombia ho tofoke o fiaignagneo tikagne ndra tie hiaigne nainai’e aza naho tondregne manao asa hoe izay.
[Sare]
Tane: Image Science and Analysis Laboratory, NASA-Johnson Space Center; Vahendagnitse: The Hubble Heritage Team (AURA/STScI/NASA)