“Tsy Miala amy ty Rehako”
“Naho tsy miala amy ty rehako nareo le tena mpianako vata’e, sady ho fanta’areo ty maregne, le ty maregne ro hamotsotse anareo.”—JAONA 8:31, 32.
Ino ty Dika Izay? Ty fampianara’e ty atao tihoe ‘reha i Jesosy.’ Faie boake aman’Andrianagnahare zay satria hoe reke: “I Rae nagnirake ahikey ro nandily ahike amy ty raha horehafeko naho ty raha hampianareko.” (Jaona 12:49) Hoe ka reke tamo o Rae’e iohoe: “Ty saontsi’o ro hamarenagne.” (Jaona 17:17; Matio 4:4, 7, 10) Ino areke ty amantaragne ty tena Kristiana? Tsy miala amy ty reha i Jesosy iareo, ty dika izay ekè iareo fa ty Saontsin’Andrianagnahare ndra ty Baiboly ro “hamarenagne.” Ze raha rehafegne ao naho ty fitsipike ao avao ro inoa’e naho orihe’e.
Nanao Izay vao i Kristiana Voaloha’e Rey? Agnisa i Kristiana voaloha’e rey ty Apostoly Paoly. Lahibey ama’e ty Saontsin’Andrianagnahare satria hoe izay ka ty nifihevera i Jesosy aze. Hoe reke: ‘Ty Soratse Masigne atoagne iaby le boake amy ty hery ty fagnahy masin’Andrianagnahare sady mahasoa.’ (2 Timoty 3:16) Nisy lahilahy nampianatse tamo o fiangonagneo ka tie tamy izay. Tsy niala tamy ty Saontsin’Andrianagnahare ndra “i saontsy azo antokey” iareo naho fa nampianatse. (Titosy 1:7, 9) Nikezake ka o Kristiana voaloha’eo mba tsy hino o filozofiao naho ty heve ty tontolo toy satria tsy mifagnarake amy ty fampianara i Kristy i raha rey.—Kolosianina 2:8.
Ia ty Magnorike ty Reha i Jesosy ty amy Izao? Hoe ty Katesizy o Eglizy Katolikao (angilé): ‘Tsy boake amy ty Soratse Masigne avao ty raha inoa ty Eglizy Katolika, fa boake amy ty tantaran-drazagne masigne ka. Sambe toko’e hekegne naho hohajaegne ndra i tantaran-drazagne masigney ndra o Soratse Masigneo.’ Hoe ty pasitera raike a Kanada agne amy ty gazeteboke Maclean’s ao: “Nagnino moa tikagne ro tsy maintsy magnorike ty reha i Jesosy naho ty Soratse Masigne, ie amy izao fa 2000 taogne lasa zay ty nampisy aze? Managne hevetse soa maro tikagne amy izao, faie nanjare tsy nisy dika’e i raha rey tie amy izao satria tsy maintsy ampifagnarahegne amy ty ahy i Jesosy naho o Baibolio.”
Hoe ka ty Fangalan-kilala Katolika Vaovao (angilé) miomba o Vavolombelo i Jehovah-o: “Ze rehafe ty Baiboly avao ty inoa iareo sady ze fitsipike ao avao ty orihe’e.” Malaza ka iareo tie mampiasa Baiboly. Nisy Vavolombelo i Jehovah raike zay ohatse nitory tamy ty lahilahy raike ta Kanada agne. Naho vaho nirehake reke tie Vavolombelo i Jehovah, le avy le nirehake i lahilahỳ tie: “Naho fa nahatrea i Baiboly ignehoe avao raho, le avy le nifantako tie ia nareo.”