Tsy Managne Tahinagne ty Andrianagnahare

INO TY INOA O NDATIO?

“Mbe tsy mitovy hevetse zahay naho managne tahinagne ty Andrianagnahare ndra tsy managne, le naho managne reke, le ia.”​—Profesora David Cunningham, Fianaragne Miomba ty Teolojia (angilé).

TY MAREGNE REHAFE TY BAIBOLY

Hoe ty Andrianagnahare: “Izaho o Jehovah-o. Izay ty agnarako.” (Isaia 42:8) Tihoe Jehovah, le boake amy ty rehake hebreo midika tihoe “Manao Ze Hampiavy Reke.”

Tea i Jehovah hampiasa i tahina’ey tikagne. Hoe ty Baiboly: “Tokavo i tahina’ey. Ampahafantaro o firenenao ty raha natao’e. Sady torio tie mahazo voninahitse i tahina’ey.”​—Isaia 12:4.

Nampiasa i tahinan’Andrianagnaharey ty Jesosy. Nivavake tamy i Jehovah reke, le nirehake tie: “Fa nampahafantareko iareo ty tahina’o, sady mbe hampahafantareko avao ka.” Nagnino reke ro nanao izay? Hoe reke: “Mba hanahake ty niteava’o ahy ty hiteava iareo ty hafa, sady mba hiharo amy iareo ka raho.”​—Jaona 17:26.

NAGNINO RO TOKO’E HO FANTAREGNE ZAY?

Hoe ty Walter Lowrie, teolojiana: “Tsy tena mahafantatse an’Andrianagnahare ty ndaty raike naho tsy mahafantatse i tahina’ey ... Tsy ho tea aze ka reke naho mihevetse aze ho hery avao.”

Niangogne isan-keregnandro ka ty Victor, faie tsy nihevetse reke tie tena nahafantatse an’Andrianagnahare. Hoe reke: “Naho fa tafara tatoy vaho nifantako tie, i Jehovah ty tahinan’Andrianagnahare. Hoe raha nampihaognegne tamy ty ndaty raike mbe lia’e naho nitreako raho. Nanjare tena misy reke tie tamako sady nikezake nifandrambe marine ama’e raho.”

Mifandrambe marine amy ze mampiasa i tahina’ey ty Jehovah. Nampitamà ze “misaintsaigne i tahina’ey” reke tie: “Hitretré iareo raho manahake ty ndaty mitretré ty ana’e manompo aze.” (Malakia 3:16, 17) Mamale soa ze mitoka ty tahina’e ty Andrianagnahare. Hoe ty Baiboly: “Ze mitoka ty tahina i Jehovah ro hovonjegne.”