Nanjare Fantako tie Mamela Heloke ty Jehovah

TY FIAIGNAKO TALOHA:

Tamy ze tanàgne raike mahantra a Montréal etoagne zay ty nahabey ahy. Nimate ty babako tamy iraho enem-bolagne, le i nene raike avao ty niteza anay. Valo zahay ty ana i babako naho i reneko, le iraho ty faralahy.

Rongony, filokagne, aly, naho dahalo avao ty raha nitreako isan’andro naho fa nibey raho. Nanjare firakirahe o ampela makorelio naho o ndaty mpanao vola mitombò raho tamy izaho nifolo taogne. Mateteke raho ro navande, sady niteàko ty nametsefetse ndaty. Tsy niazoko ty fiaiko naho tsy namitake ndaty.

Nindra ty fahaiako mametsefetse ndaty naho fa ni-14 taogne raho, le hafarako nampiasa fomba maro sambe karaza’e. Nivily montira naho braselé vaho kavigne maro nisiagne pilàke volamena ohatse raho. Nisiako tihoe 14 karà iareo iaby, le ie naho fa niavy eo navaroko an-dalagne ey naho amy i toeragne fijanogna o tobileo rey, vaho amo o labodike beio ey. Tena fale raho naho fa mahazo vola ie amy izao tsy mba miasa mafe. Tie indraike zay aza le 10 000 dolara ty vola niazoko tagnate ty andro raike avao.

Tsy nisy tragno hitobohagne raho tamy izaho ni-15 taogne, satria nivoaroake boake amo o toeragne fitezagne ajaja marengerengeo ey. Tan-dalagne ey areke raho ro niroro, ndra tamo o toeragne fitobotobohagne fanjaka natao hoahy ty ndaty iabio, ndra amy ty namako agne.

Mateteke raho ro nagnontenea o polisio noho i aferafera tsy manjare nataoko rey. Faie mbe liako naho nigadra satria tsy nivarotse raha halatse raho. Lamandy ro naloako mateteke sady ie amy izao lafo. Ty anto’e, nanao piraty naho namitake ndaty raho, sady nivarotse ka, ie amy izao tsy nahazo alalagne. Iraho aza ty nitake ty vola o ndaty mpanao vola mitombò satria tsy mba natahotse ndra ia ndra ia zao. Nagnoho-doza ty nanao ze raha zay, le mateteke raho ro ninday basy naho fa nanao aze. Nisy andro aza raho niara-niasa tamo o dahalò.

TY NAGNOVÀ TY BAIBOLY TY FIAIGNAKO:

Niarake nitoboke zahay amy i sipako zay tamy iraho ni-17 taogne. Sambako tamy izay vaho nahatrea ze o Baiboly zao, satria reke nampianare o Vavolombelo i Jehovah-o Baiboly. Faie nihejeko ty raha rehafe o Baibolio miomba ty findesam-batagne, le nisarahako reke le nifindra tamy i sipako raike zay agne raho.

Nianatse Baiboly tamo o Vavolombelo i Jehovah-o ka o sipako iohoe. Nigaga raho fa nanjare nisoa fagnahy naho tena nandefetse reke. Nagneke raho naho fa nitaone’e hivory amo o tragno fivoria o Vavolombelo i Jehovah-o agne. Nandrambe ahy soa iaby ze ndaty tagne. Soa fagnahy ka iareo, malio naho milamigne sady mahalala fomba ka. Sambako nahatrea raha hoe zay! Tsy mba nahatsiaro ho teagne zao raho tan-tragno agne. Tsy mba nisy ndaty nitea naho nanambetambe ahy ka tamy iraho mbe nikedey. Faie nahatsapa ho teagne raho naho fa niarake tamo o Vavolombelo i Jehovah-o. Le avy le nagneke areke raho naho fa nitaone iareo hianatse Baiboly.

Naho tsy nianatse Baiboly raho, le va’e fa nimate hinane zay. Ty anto’e le izao: Nanagna o ndaty trosa tsy fotofoto raho. Dime alegne dolara mahery eo naho atambatse. Nieretseretse ty hamoy tragno areke zahay amy i namako roe lahy zay. Faie hasoan-draha fa tsy nandeha raho, satria nitratse ty raike amy i namakoy, le ty raike nimate.

Naho fa nihanandroso avao i fianarakoy le nitreako tie maro ty fiovagne toko’e hataoko. Nanjare nihaiko ohatse ty raha rehafe ty 1 Korintianina 6:10 ao toy tie: “Ty mpangalatse, ty mpihagne, ty mamo lava, ty mpiteratera, ty mpandrava, le tsy handova i Fanjakan’Andrianagnaharey.” Nandineke ty tegnako raho naho fa namaky o andinin-teny iohoe, le nipopoke ty ranomasoko. Tena nila niova tanterake raho. (Romanina 12:2) Ty anto’e, tena nitea aly raho, sady fa zatse navande loatse.

Naho fa nianatse Baiboly ka raho, le nanjare nihaiko tie mamela heloke ty Jehovah. (Isaia 1:18) Nivavake mafe ama’e areke raho, le nihalale tama’e mba hagnampe ahy hiova. Nagnampe ahy reke, le nivitako avao ty niova tsikedetsikede. Nisoratse ara-panambaliagne zahay amy i ampela sipakoy, sady io ty agnisa ty dingagne lahibey nataoko.

Ni-24 taogne raho tamy izay, le telo ty niana’ay. Tsy maintsy nipay asa magnara-dalàna raho. Faie tsy le nandia lakilasy raho sady tsy nisy ndaty azo atokisagne mba afake nirehake raha soa miomba ahy. Nivavake mafe tama’e indraike areke raho, le nandeha nipay asa naho fa niavy eo. Nirehafeko ze ndaty nipaliaeko asa tie vognogne hiova raho, le hiasa soa sady hanao ty maregne. Hazavaeko ka kindraike tie mianatse Baiboly raho, sady te ho ndaty soa. Faie tsy nagneke ty ankamaroa iareo. Niavy tamy ze rangahe raike zay ao raho tamy fara’e, sady nirehafeko ama’e iaby ty fiaignako. Le hoe reke: “Tsy haiko tie nagnino, fa hoe misy raha manere ahy handrambe azo hiasa amako ato.” Mino raho fa valem-bavake igne. Natao badisa zahay amy i valiko tafara tatoy.

TY SOA NIRAMBESEKO:

Va’e fa nimate raho hinane zay naho tsy nampihatse ty toro lala ty Baiboly sady tsy nikezake ho soa findesam-batagne. Fale raho fa manam-baly aman’anake, sady tena mifankatea zahay. Tsapako ka tie mamela heloke vata’e ty Jehovah sady tsy enjehe ty eretsereko sasa raho.

Fa 14 taogne zay raho ro nanokagne 70 lera isam-bolagne hampianaragne Baiboly o ndatio. Nanomboke nanao hoe izay ka ty valiko, vaho tsy ela zay. Tagnate ze 30 taogne zay, le 22 ty mpiara-miasa amako nampeako mba hanompo i Jehovah ka. Mbe mandeha amo o labodike beio ey avao raho tie amy izao. Faie tsy hametsefetse ndaty sasa ty ataoko egne, fa ty hirehake amy iareo ty raha inoako. Ty anto’e, teako iareo naho mahay tie afake ty ho velogne nainai’e amy i tontolo vaovaoy iareo sady tsy hisy ndaty mpametsefetse sasa ty ao amy izay.​—Salamo 37:10, 11.