Tsy Nisy ze o Andrianagnahare zao tie Tamako

TY FIAIGNAKO TALOHA

Naterake tamy ty tanàgne kedekede raike atao tihoe Saxe raho. Agnisa ty Repoblika Demokratika i Alemaina (RDA) io tamy izay. Nahafinaritse ty fiaignagne tan-tragno tao sady nifankatea zahay. Nampianatse ahy ho soa findesam-batagne ty baba naho i nene. Tane o koministao ty RDA, le tsy mpivavake ty ankamaroa o ndatio. Tsy nisy ze o Andrianagnahare zao tie tamako. Namolavola ahy o Kominismao naho ty fampianaragne tihoe tsy misy o Andrianagnahare zao, hatrake amy ty raho 18 taogne.

Liagne tamo o Kominismao raho satria teako i heve iareo tihoey mitovy iaby o ndatio. Nekeko ka i tihoey, toko’e ho zaraegne mitovy soa o fanagnagneo iaby, amy izay tsy hisy sasa ty mpagnarivo naho ty mahantra tsisy hatokogne. Nizilike tamy ty fikambanagne tanora kominista areke raho. Nisy asa nataoko tamy iraho 14 taogne. Nagnodigne taratasy fa niasa mba ho azo ampiasaegne indraike raho, mba hiarovagne o tontolo iaignagneo. Tena nankasitrake ty kezake nataoko ty tanàgne atao tihoe, Aue, a Saxe agne, le nagnomey ahike fankasitrahagne. Nanjare nahafantatse mpanao politike nalaza ta RDA agne raho ndra tie mbe nitanora aza. Nieretseretse raho tie nanagne tanjogne soa sady namiratse ty hoaviko.

Faie niova tampoke ty fiaignako. Rava ty Manda i Berlin naho ty fitambara o firenena kominista ta Eoropa Antignanagne agneo tamy taogne 1989. Diso fanantenagne raho. Treako fa nisy avao ty tsy rare’e ta RDA agne. Navibìke ohatse ze tsy nanohagne o Kominismao. Tsy mitovy iaby ka hao o ndatio? Fitake avao zane o Kominismao? Nanjare tena ninekoneko raho.

Ty mozike naho ty hoso-doko indraike areke ro nifantohako. Te hanjare mpahay mozike raho. Ty anto’e, afake nianatse tamy ty lakilasy fianaragne aze raho sady afake nanohy izay tamy oniversite ey. Tsy nidareako sasa ty raha soa nampianare i baba naho i nene ahy. Ze raha nahafinaritse ahy avao ty nanjare lahibey tamako, ohatse mampiarake tamy ty somondrara maro. Faie le mbe ninekoneko avao raho ndra tie izay aza. Ndra ty hoso-doko nataoko aza nahatreavagne tie nisy raha tena nampatahotse ahy. Hanao akore ty hoavy? Ino ty anto’e nampisy ahy?

Gaga raho naho fa nahatrea ty vale i fagnonteneagne nagnelengelegne ty saiko rey. Nirehake miomba ty hoavy raho naho i mpiara-mianatse amako rey zay tamy ty hariva indraike zay. Agnisa izay ty Mandya sady Vavolombelo i Jehovah reke. Nagnomey ahy soso-kevetse soa maro reke. Hoe reke: “O Andreas, dineho soa o Baibolio naho te hahatrea ty vale i fagnontenea’o miomba ty fiaignagne naho ty hoavy rey rehe.”

Tsy le naharese lahatse ahike i reha’ey faie noriheko avao. Nirehafe i Mandy raho hagnente ty Daniela toko 2. Tena gaga raho naho fa namaky o faminaniagne iohoe. Rehafe’e ao i firenena matanjake hifandimbe an-tane etoy rey. Nitoroa i Mandy faminaniagne hafa boake amy Baiboly ao ka raho. Nitreako avao ty vale i fagnonteneako rey! Faie ia ty nanoratse i faminaniagne rey? Ia ty tena mahay mirehake ty hoavy? Misy avao vao ze o Andrianagnahare zao?

TY NAGNOVA O BAIBOLIO TY FIAIGNAKO:

Nampifankafantare i Mandy tamy ty mpivaly atao tihoe Horst naho Angelika raho. Vavolombelogne iareo sady nagnampe ahy hahafantatse soa ty Baiboly. Tsy ela le treako tie ty Vavolombelo i Jehovah avao ro fivavahagne mampiasa ty tahinan’Andrianagnahare tihoe Jehovah sady mampahafantatse io o ndatio. (Salamo 83:18; Matio 6:9) Nianarako fa mampitamà ty Jehovah tie afake hiaigne nainai’e amy i paradisa an-tane etoỳ o ndatio. Hoe ty Salamo 37:9: “Ze ndaty mitamà i Jehovah avao ro handova ty tane toy.” Tena mahafinaritse fa hahazo ze valesoa zay iaby ze mikezake mafe mankatò ty fitsipy ty Baiboly miomba ty findesam-batagne.

Faie tsy mora tamako ty niova. Nanjare mpahay mozike naho mpanao hoso-doko malaza raho, le nanjare nirehareha. Nila niambane areke raho. Mafe tamako ka ty niala tamy ty fahazaran-dratiko. Tena misaotse i Jehovah raho satria manam-paharetagne naho miferenaigne reke. Taka’e ty manjò ze mikezake mafe mampihatse ze raha rehafe ty Baiboly.

Nisy voka’e bey tamako hatrake tamy ty raho 18 taogne o Kominismao naho i fampianara’e tie tsy misy ze o Andrianagnahare zaò. Faie nagnova ty fiaignako ty Baiboly. Tsy ninekoneko miomba ty hoavy sasa raho sady misy dika’e ty fiaignako. Natao badisa raho tamy 1993, le nanjare Vavolombelo i Jehovah. Nanambaly i Tabitha raho, tamy 2000. Mpiara-mivavake ama’ay reke sady bey zotom-po. Manokagne fotoagne maro hagnampeagne ty hafa hahafantatse ty raha rehafe ty Baiboly zahay hinane zao. Tsy mino an’Andrianagnahare ka ty ndaty maro itoria’ay sady Kominista. Tena afa-po raho magnampe iareo hahafantatse i Jehovah.

TY SOA NIRAMBESEKO:

Nivignetse o rae aman-drenekò naho fa nianatse Baiboly tamy ty Vavolombelo i Jehovah raho. Faie nivazoho iareo fa nisy voka’e soa tamako io. Fale raho fa mamaky Baiboly ka iareo tie amy izao, sady mivory miarake amy ty Vavolombelo i Jehovah.

Sambatse zahay amy Tabitha satria mikezake magnorike ty toroheve ty Baiboly miomba ty fanambaliagne. Rehafe ty Baiboly ohatse fa tsy toko’e hivalike amy ty vali’e o ndaty manambalio. Vao mainke mifankatea zahay satria norihe’ay zay.​—Hebreo 13:4.

Tsy matahotse ndra minekoneko miomba ty hoavy sasa raho. Tsapako tie agnisa ty hasaveregna o Vavolombelo i Jehovah magneran-taneo raho. Milongo soa sady miharo saigne iareo. Mitovy iaby o ndatio tie ama’ay fa tsy misy ambone naho ambane. Izay ty raha nirieko hatrake amy izay!