Fa Miomagne amy i Fahatsiarovagney vao Rehe?

Tena lahibey ty fankalazagne Pasake fara’e natao i Jesosy. Ty anto’e, fa fotoagne kedekede sisa le ho mate reke. Nanao fandaharagne mba hiarahagne hankalaza i Pasakey miarake amy i apostoli’e rey areke ty Jesosy, sady hirehake amy iareo miomba ty fankalazagne vaovao. Tsy inogne zay fa ty Mahakama Hariva i Tompo. Nagnirake i Petera naho i Jaona ty Jesosy mba hagnambigne i tragnoy. (Lk 22:7-13; henteo ty sare amy i fogno’ey ao.) Maniahy antika zay fa toko’e hiomagne amy i Fahatsiarovagne amy 27 Marsay tika. Manao fandaharagne o fiangonagneo tie ia ty hanao i lahajakay, naho ty hikarakara i mofoy vaho ty raha hafa. Ino ty azontika tsikiraidraike atao mba hiomanagne amy i Fahatsiarovagney?

Omano ty fo’o. Vakio naho saintsaigno ty famakiagne Baiboly natao hoahy ty Fahatsiarovagne. Misy o fandaharagne iohoe ty amy ty bokekele Fandinihana ny Soratra Masina Isan’andro. Misy fagnazavagne maro miomba io ty toko 16 amy ty bokekele Tari-dalagne Hoahy ze Mianatse ty Saontsin’Andrianagnahare. (Henteo ty Tari-dalagne Hoahy ty Fivoriagne Avrily 2020.) Azo ty keleiagne atao ty mipay fagnazavagne magnazava ty maha lahibey i solovoigney amy ty Fanondroana Bokin’ny Vavolombelon’i Jehovah ndra amy i Fitaovana Fikarohana ho An’ny Vavolombelon’i Jehovah ao naho fa manao fotoam-pivavaha ty keleiagne.

Asao o ndatio mba hagnatreke aze. Manasà ndaty maro arake ze azo’o atao. Eretsereto tie ia iaby ty azo’o asaegne, agnisa izay ty fiheregna’o mitilike, ty mpiana’o Baiboly taloha, ndaty fanta’o naho ty longo’o. O androanavi-pagnahio ty hanasa ze fa tsy mitory sasa. Akore areke ty atao naho tsy mitoboke amy ty faritane’areo ey ze ndaty fanta’o? Afake magnente ty toeragne naho ty lera hanoagne i Fahatsiarovagney amy ty misy aze agne rehe. Miziliha amy tihoe MIOMBA ANAY, amy i peje tihoey fizilihagne amy jw.org/tdx ao. Naho fa avy eo gineho tihoe “Fahatsiarovagne.”

Ino ka ty raha hafa mbe azontikagne atao mba ho vognogne?