Mitovy amy ty ndaty manao sporo rehe naho miasa mafe. Mahasoa azo manomboke amy izao io ndra amy ty hoavy.

HOAHY TY TANORA

11 Ko Kamo Miasa

INO TY DIKA IZAY?

Tsy kamo miasa ty ndaty raike naho vognogne avao reke naho fa misy asa toko’e hatao. Tea miasa mafe reke, amy izay mahazo ze raha paliae’e sady afake magnampe ty hafa. Tea’e avao ty asa atao’e ndra tie tsy maro pitea aza.

NAGNINO ZAY RO TENA ILAEGNE?

Maro ty adidy mandigne azo ndra tea’o zay ndra tsy tea’o. Faie handrambe soa rehe naho mazoto miasa satria tsy ampe avao ty ndaty manao hoe izay ty amy izao.—Mpitoriteny 3:13.

“Nikezake ho tea miasa raho satria manjare fale naho afa-po ty ndaty tea miasa. Manjare managne laza soa ka rehe naho fa tsy kamo miasa.”—Rolland.

TORO LALA TY BAIBOLY: “Ahatreavagne tombo’e ze raha irokafagne.”—Ohabolana 14:23.

INO TY AZO’O ATAO?

Oriho ty dingagne retoa naho tea’o hahafinaritse azo ty asa’o:

Anò soa ze raha ampanoegne azo. Anò amy ty fo ze raha anoe’o ndra tolon-draha zay ndra devoara ndra asa fivelomagne. Naho fa hai’o soa ze raha ampanoegne azo, le mipaliava fomba hagnasoagne aze ndra hamitagne aze malaky. Vao mainke ho tea’o ty manao aze arakarake ty ahaia’o aze.

TORO LALA TY BAIBOLY: “Mahatrea ndaty mahay ty asa’e vao rehe? Agnatreha ty mpanjaka eo ty itsangana’e fa tsy hitsangagne agnatreha ty ndaty tsotra avao.”—Ohabolana 22:29.

Tadidio fa mahasoa ty hafa ty asa atao’o. Naho mazoto manao tolon-draha ohatse rehe, le hihegne ka ty asa atao ty hafa.

TORO LALA TY BAIBOLY: “Mahasambatse vata’e ty magnomey ty amy tie mandrae.”—Asan’ny Apostoly 20:35.

Manoa mihoatse ze raha nampanoegne azo. Ko feragne tie, ze raha tsy maintsy atao’o avao ro atao’o fa mikezaha hanao mihoatse izay. Amy izay rehe tsy hiriroke satria amy ty fo’o ty nanoa’o aze fa tsy nisy nanere.—Matio 5:41.

TORO LALA TY BAIBOLY: “Mba tsy ho sinere ty soa atao’o fa ho amy ty fo’o.”—Filemona 14.

Mahaia Manahatsahatse. Vognogne hiasa avao ze ndaty mazoto miasa faie tsy le lia’e mizizike eo avao. Tea’e ty asa’e faie mba misy fotoagne ka reke mitofa.

TORO LALA TY BAIBOLY: “Aleo fitofagne tagnan-draike, toy izay asa mafe tagnan-droe faie hoe mitsepake tioke avao.”—Mpitoriteny 4:6.