Mpamono Ndaty o Demoniao!

Fa mampijale naho magnoho-doza avao ty Satana naho i demonia’e rey amparake izay. Tam-boaloha’e tagne ty Satana, le namono ty biby naho ty mpanompo i Joba, lahilahy tsy nivalike. Naho fa niavy eo, ty ana i Joba folo vinono’e tamy ty alala ty “tiobey” nampihomake i tragno iareoy. Tafara izay ty Satana, le “nagnisy bae boake an-doha i Joba hatrake amy ty tombo’e agne.”​—Joba 1:7-19; 2:7.

Tamy ty andro i Jesosy, le natao o demoniao ty hahavy o ndatio tsy hahay hirehake naho ho goa. (Matio 9:32, 33; 12:22) Nampijale ty lahilahy raike iareo, le natao’e ty hahavy aze handililily ty tegna’e tamy ty vato. (Marka 5:5) Nampikolalaike ty ajalahy raike ka iareo sady nanonta aze tamy ty tane, vaho “nampifanintotsintogne aze mafe.”​—Lioka 9:42.

Mbe vognogne hamono o ndatio avao ty Satana naho i demonia’e rey tie amy izao. Naho ty maregne, le nitombo ty asa raty natao iareo nanomboke ty nandroahagne iareo boake an-dagnitse agne. Ty vaovao azo magneran-tane le magnamaregne ty maha mpampijale iareo. Atao iareo ze hahavy ty ndaty ila’e harare mafe. Ampijalejalé iareo ty ila’e naho fa halegne, le atao’e ty hahavy iareo tsy ho azon-droro ndra mampagninofy aze raha raty. Atao’e ka ty hahavy o ndatio hamahotse ty ndaty hafa. Mahavy ty hafa hanjare minegne, hamono ndaty ndra hamono tegna iareo.

Tantarae i Lintina, mipetrake a Suriname agne fa namono ty 16 amy ty keleia’e ty demonia, ndra ty fagnahy raty raike, le nampijale aze ara-batagne naho ara-tsaigne tagnate ty 18 taogne. Noho ty raha nanjò aze manokagne, le afake mirehake reke fa o demoniao le “fale mampijale tsisy indrafo sady le lia’e vonoe’e o ndaty mampalahelo fa niazo’eo.”

Faie afake miaro ty mpanompo’e amy ty fampijalea i Satana ty Jehovah.​—Ohabolana 18:10.