Mandrisike o Ndatio Higoreve Aman’Andrianagnahare o Demoniao

Nagnino ty Satana naho o demonia’eo ro mikezake mafe mamitake o ndatio? Satria tea’e higoreve miarake ama’e tikagne. Tea’e hanompo aze tikagne. Tea’e ty hinoantikagne i vande’e rey naho hanoantikagne i raha heje i Jehovah rey. Mifandrambe amy ty fombafomba amy ty mate ty ankamaroa i raha rey.

Tena malahelo tikagne naho fa misy ndaty teantikagne mate, sady ara-dalàna zay. Mete ka ty anehoagne ty fihetseham-po tsapantikagne. Tafara ty nimateza i Lazarosy nama’e ty Jesosy, le ‘nipoke ty ranomaso’e.’​—Jaona 11:35.

Maro ty fombafomba mifandrambe amy ty mate, sady miovaova i raha rey arakarake ty tane raike. Tsy mifanipake amy ty fitsipike amy Baiboly ao ty maro amy irey. Faie misy fombafomba ila’e mifototse amy tihoe velogne sady afake mahatrea o ndaty velogneo o mateo. O aritorio, ty fanehoagne alahelo tafahoatse, vaho ty fomba fandevegnagne andaniam-bola bey le mifandrambe amy ty fatahoragne ty tsy hahazoagne fankasitrahagne boake amy ty fagnahy (esprits) o mateo. Faie manohagne ty vande i Satana ze manao ireo satria ty mate “tsy misy raha rendre’e.”​—Mpitoriteny 9:5.

Ty fomba amam-panao ndra fombafombam-pivavahagne hafa, le mifandrambe amy ty finoagne tihoe mipay ty fagnampea o ndaty mbe velogneo o mateo. Ty anto’e naho tsy meagne fahafaham-po iareo le hagnisy raty iareo. Amy ty tane ila’e agne, le misy fankalazagne naho fagnateragne fagnatetse atao agnate ty 40 andro ndra herentaogne afara ty nimateza ty ndaty raike. Izay ty hevere o ndatio fa hagnampe i ndaty nimatey ‘hitsake’ amy ty faritse ara-pagnahy agne. Ty fombafomba mahazatse hafa raike ka le ty fanoloragne hanegne naho raha inomegne hoahy i ndaty nimatey.

Tsy mete iaby ze raha zay satria manohagne ty vande i Satana miomba ty mate. Hankasitraha i Jehovah vao tika naho manao ty raha mifandrambe amy ty fampianara o demoniao? Ay, tena tsy tea’e zay!​—2 Korintianina 6:14-18.

Ty mpanompo i Andrianagnahare maregney, le tsy mandrambe anjara amy ty fombafomba manohagne ty vande i Satana. Mifantoke amy ty fagnampeagne o ndaty velogneo sady magnomey fampionognagne hoahy iareo ty asa iareo. Fanta iareo fa naho fa mate ty ndaty raike, le i Jehovah avao ty afake magnampe aze.​—Joba 14:14, 15.

Melohe i Jehovah o Fombafomba Mifandrambe amy ty Demoniao

Misy ndaty mifandrambe amy ty demonia mivantagne ndra amy ty ndaty mihaboke ho mahay mifandrambe amy ty mate. Fombafomba mifandrambe amy ty demonia (ndra spiritisma) ty itokavagne izay. Ty “vaudou” (karazana mazỳ mifangaro fombafombam-pivavahagne), ty fanoagne aoly raty, mazỳ, o ndaty mpijorò, vaho ty fagnonteneagne amy ty mate le sambe karazana spiritisma iaby.

Mampitao antikagne amo o raha rehoe hoe izao ty Baiboly: “Ao tsy hisy ama’areo ty ndaty... manao sikily, ndra ty jiny, ndra ty mpijoro, ndra ty mpihisa aoly, ty mamosave, ty mandeha mbamy ty mpandrombo angatse, ndra ty mandeha mbamy ty mpitoky vilagne, ndra ty mpagnontane lolo. Fa mampiloandoa i Jehovah ze manao o raha reo.”​—Deoteronomia 18:10-12.

Nagnino ty Jehovah ro mampitao mafe antikagne amo o raha rehoe?

Mba hahasoa antikagne ty anto’e mahavy i Jehovah mampitao antikagne amy ze fombafomba mifandrambe amy ty demonia zay. Tea’e o vahoa’eo sady mikarakara iareo reke, sady fanta’e ka fa ze mifandrambe amy ty demonia le tsy maintsy hijale.

Agnisa izay ty Nilda, ampela raike nihaboke fa nahay nifandrambe amy ty mate. Nampijalé o demoniao reke. Hoe reke: “Nifeheze i demonia rey raho (...), le nampanoe’e ze tea’e hatao. Mateteke raho toragne, le mahatsiaro tegna, nihoe izay avao. Hafara’e nampidiregne tamy ty tragno fitsaboagne o ndaty marare saigneo agne. Nenjehe o demoniao mafe raho, le nanjare narare ara-pihetseham-po. Nihinagne fagnafoly mampitony ahy raho, le nanomboke ninon-toake naho nifoke mateteke. Naharetse an-tao’e maro zay.”

Tamy ty fara’e, noho ty fagnampea i Jehovah naho ty Vavolombelo’e an-tane etoa, le afake tanterake tamy ty fampijalea o demoniao ty Nilda sady managne fiaignagne milamigne naho salama reke tie amy izao. Hoe reke: “Mandrisike o ndatio iaby raho mba tena tsy hifandrambe amy ty fagnahy (esprits) [raty], ndra ombia ndra ombia sady ndra tie kidikidy avao aza.”