TOKO 25
Ino ty Hataoko fa Manjare Zatse Mikasikasike ty Maha Lahilahy Ahy Raho?
“Valo taogne raho le fa nizatse nikasikasike ty maha lahilahy ahy. Fantako naho fa tafara tatoy fa tsy tean’Andrianagnahare io. Tena nanegnegne raho isake tie tsy nahafehe tegna. Nieretseretse raho tie: ‘Iraho vao le mbe ho tea’e?’”—Liva.
Naho fa manjare tanora ty ndaty raike le mihamafe ty fagniriagne te hila ndaty agnate’e ao. Misy tanora manjare zatse mikasikasike ty maha lahilahy aze areke voka izay.a Maro ty mirehake fa tsy misy voka’e raty io sady tsy mampagnino. Faie diso zay. Nirehake ty apostoly Paoly fa toko’e ho ‘vonoegne’ ndra ho fehezegne ty fagniriagne te hila ndaty naho tafahoatse. (Kolosianina 3:5) Faie tsy hahafehe o fagniriagne iohoe ty ndaty raike naho zatse mikasikasike ty maha lahilahy aze, fa vao mainke hampitombo aze. Dineho ka retoa:
● Manjare tea tegna ty ndaty zatse mikasikasike ty maha lahilahy aze. Ze hahazoa’e fahafinaretagne avao ty paliave’e.
● Manjare mieretseretse reke tie fitaovagne hahazoagne fahafinaretagne avao o ampelao.
● Naho fa mifampila iareo mirovaly naho fa afara agne, le sambe tsy ho afa-po ndra ireke ndra i vali’e satria fa tea tegna loatse.
Ko mikasikasike ty maha lahilahy azo ndra tie te hila ndaty aza rehe. Mikezaha hifehe tegna. (1 Tesalonianina 4:4, 5) Akore ty hahavita’o izay? Manoro hevetse antikagne ty Baiboly, mba tsy hanao raha mampisy tsapa hevetse. (Ohabolana 5:8, 9) Faie akore naho fa mahazatse azo ty mikasikasike ty maha lahilahy azo? Va’e fa nikezake nifehe tegna rehe fa tsy nahavita. Mieretseretse rehe tie tsy hahavita hankatò ty fitsipin’Andrianagnahare sasa. Izay ty tsapa i Hery. Hoe reke: “Le tena nanegnegne raho isake tie tsy nahafehe tegna. Nieretseretse raho fa tsy hagnenga ty hadisoako ty Andrianagnahare. Nanjare nimegnatse raho naho fa hivavake.”
Ko kivy naho izay ty tsapa’o. Maro ty tanora naho ty ndaty bey nahavita tsy nikasikasike ty maha lahilahy aze sasa. Hahavita hoe izay ka rehe!
‘Tena diso raho’
Mateteke mirehake hoe izay ty ndaty zatse mikasikasike ty maha lahilahy aze. Soa naho ‘malahelo arake ty zoton’arofon’Andrianagnahare’ reke, ty dika izay tena malahelo, satria handrisike aze hiova zay. (2 Korintianina 7:11) Faie tsy mete naho malahelo bey loatse reke, satria va’e ho kivy, le hanjare tsy hikezake sasa.—Ohabolana 24:10.
Ko mirehake hoe izao: ‘Tsisy tamaegne sasa ty amako.’ Maregne fa raty ty mikasikasike ty maha lahilahy, satria agnisa i tokave ty Baiboly tihoey fahalotoagne io. Va’e hanjare ho raty ty toe-tsay ty ndaty manao io, sady ‘handevoze ty fagnirian-draty naho fahafinaretagne maro sambe hafa.’ (Titosy 3:3) Faie tsy fahotagne lahibey manahake ty mijangajanga io. (Joda 7) Ko mieretseretse tihoe tsy ho voavela sasa ty hadisoa’o. Mikezaha hifehe tegna, sady ko magneke ho rese zao!
Maregne fa tena kivy rehe naho fa tsy mahafehe tegna. Faie tsiarovo amy ze fotoagne zay ty Ohabolana 24:16 manao tihoe: “Va’e ho tonta impito ty ndaty maren-tane, faie le mbe hahafoha avao. Faie ty raty fagnahy lelia’e hihomake amy ty loza mahazo aze.” Tsy agnisa ty “raty fagnahy” rehafegne eò rehe ndra tie rese aza kindraike. Ko kivy areke, fa henteo tie ino ty nahavy i rahay, sady mikezaha tsy hagneregne aze sasa.
Mikezaha hisaintsaigne tie tea azo ty Andrianagnahare sady mamindra fo. Hoe ty Davida mpanao salamo, fa nanao hadisoagne ka reke: “Mamindra fo amy ty ana’e ty rae, hoe izay ka fa mamindra fo amy ze matahotse aze ty Jehovah. Fanta’e soa ty namboara’e antikagne, sady tsy haligno’e fa lemboke tikagne.” (Salamo 103:13, 14) Fanta i Jehovah fa tsy voririke tikagne, le “vognogne hamela heloke” reke. (Salamo 86:5) Faie tea’e ka naho mikezake miova tika. Ino areke ty azo’o atao?
Dineho kera mila ovagne ty fihisagne atao’o. Kera ndra raha mampieretsere-draty ty raha hentea’o amy tele ndra amy Internet ao? “Ko engagne hagnente raha tsy misy ilagne aze” areke ty maso’o, arake ty vavake natao i mpanao salamoy.b—Salamo 119:37.
Mikezaha hieretseretse raha soa. Hoe ty William: ‘Mamakia boke ara-baiboly aloha ty hiroro, amy izay raha soa ty an-tsai’o ao. Tena magnampe zay!’—Filipianina 4:8.
Rehafo amy ty ndaty atokisa’o i rahay. Mahamegnatse zay faie tena hagnampe azo. Hoe ty Dina: ‘Nirehake tamy i baba’ay raho. Tena tsy halignoko i saontsi’ey. Fanta’e fa natahotse raho, le nisomimoke reke sady nanao tihoe: “Soa ihe mirehakeo! Tena mete zay!” Izay i raha nilaekoy! Vao mainke raho te hikezake tafara izay!’
‘Nisy andinin-teny maromaro ka nivakie’e tamako, mba hahatsapako fa tsy raty saigne raho, faie tsy raha soa i ataokoy. Nisaontsy tamako reke naho fa avy eo tie: “Engao agne ze fa agne, fa mikezaha mafe avao amy ty magnarake, le naho fa avy eo tikagne mirehake indraike. Naho sagnatria rese, le ko kivy fa mikezaha hifehe tegna maharetse amy ty magnarake.” Soa avao fa nisy ndaty nahafantatse ty raha manjò ahy sady nanoro hevetse ahy. Tena nilaeko zay!’c
Mete vao ty mila ndaty, faie tsy mieretseretse ty hiarake?
[Fagnamarehagne ambane peje]
a Natao hoahy ty ampela zatse mikasikasike ty maha ampela ka ty toko toy. Fantaro fa tsy satrie ty tanora kindraike ty te hila ndaty. Miseho amy ty ajalahy ohatse zay naho fa misy rom-boto miboake amy ty maha lahilahy aze naho fa halegne, ndra taitse tampoke reke naho fa miroro. Misy ka ampela te hila ndaty, lohotsie naho fa aloha ty iavia ty lio’e ndra afara izay. Tsy diso iareo satria tsy satrie’e zay. Faie ze mikasikasike ty maha lahilahy ndra ty maha ampela aze ro tena satrie’e.
b Henteo ty Manontany ny Tanora, Boke Faha- 2, Toko 33.
c Henteo ty Manontany ny Tanora, Boke Faha- 2, peje 239-241.
ANDININ-TENY
“Ilaiso ze fagniriagne mpahazo ty tanora, le mikezaha mafe hanao ty maregne, hanagne finoagne naho hatea vaho fiadagnagne, miarake amo o mitoka i Tompo amy ty fo maliò.”—2 Timoty 2:22.
SOSO-KEVETSE
Amy irehe mbe tsy mialy mafey, le fa mivavaha. Mihalalea amy i Jehovah Andrianagnahare hagnomea’e azo “hery fagnampe’e.”—2 Korintianina 4:7.
FANTA’O VAO ...
Naho tena tapa-kevetse ty hifehe tegna rehe, le ho vita’o ty tsy hihisahisa ty maha lahilahy ndra ty maha ampela azo ndra hila ndaty, ndra tie tsy misy mahatrea aza. Va’e tsy hahafehe tegna rehe naho mbe tsy tena tapa-kevetse.
RAHA ERETSERETEKO HATAO!
Izao ty hataoko mba tsy hieretsere-draty raho ․․․․․
Izao ty hataoko naho te hihisahisa ty maha lahilahy ahy raho ndra ty maha ampela ahy ․․․․․
Izao ty hagnonteneako i Baba naho i Nene miomba i raha nirehafegne tamy toko toy ato rey ․․․․․
AKORE TY HEVE’O?
● Nagnino rehe ro tena mila mitadidy tie “vognogne hamela heloke” ty Jehovah?—Salamo 86:5.
● Ino ty fanta’e fa ho vita’o kanao reke mandrisike azo hifehe tegna, ndra tie natao’e hagniry hila ty hafa aza tikagne olombelogne?
[Hevetse Lahibey]
“Milamigne ty saiko amy izao satria fa tsy mikasikasike ty maha ampela ahy sasa raho. Fantako fa tsy vignetse amako sasa ty Jehovah. Tsisy raha atakaloko izay!”—Sarah
[Sare]
Ko mieretseretse tie tsy misy dika’e ty kezake fa natao’o, naho sagnatria tsy mahafehe tegna rehe. Hoe raha milay rehe le naho fa avy eo tonta. Tsy montso antoke ty kezake fa natao’o fa tohizo avao