Talily Soan’Andrianagnahare Vata’e vao ze Agnate Baiboly Ao?

1. Boake amy ia ty Baiboly?

Sinoratse agnate Baiboly ao i talily soa manao tihoey tie ho velogne nainai’e an-tane etoy o ndatio. (Salamo 37:29) Misy bokekele 66 ty agnate Baiboly ao. Lahilahy 40 nino an’Andrianagnahare ty nanoratse aze. I Mosesy ty nanoratse ty boke dime voaloha’e, fa ho 3500 taogne lasa zay. I apostoly Jaona ty nanoratse i boke fara’ey, fa mihoatse ty 1900 taogne zay. Heve ia ty nisorate o mpanoratse Baiboly reo? Ty heven’Andrianagnahare fa tsy ty heve iareo. Nahazo fagnahy masigne iareo. (2 Samoela 23:2) Boake amy i Jehovah areke ty Baiboly.​—Vakio 2 Timoty 3:16; 2 Petera 1:20, 21.

Henteo ty video Ia ty Nampanoratse o Baibolio?

2. Maregne vao ty raha rehafe ty Baiboly?

Boake aman’Andrianagnahare vata’e ty Baiboly, satria rehafe ty Baiboly amy ty pitsopitso’e ty raha mbe ho avy. (Josoa 23:14) I Andrianagnahare Tompo ty Herỳ avao ro mahavita mamantatse ty raha mbe ho avy, fa tsy misy ndaty mahavita izay.​—Vakio Isaia 42:9; 46:10.

Inogne ty mampiambake ty Baiboly? Misy amy ty firehake an-jato’e ty Baiboly, sady fa agnarivo’e tapetrisa ty fa vita pirinty. Mifanandrife amy ty siansa ka ty raha rehafe’e ndra tie fa ela aza ty Baiboly. Tsy mifanohetse ty raha rehafegne ao, ndra tie ndaty 40 ty nanoratse aze.a Mampibaribary ty hatean’Andrianagnahare ka ty Baiboly sady mahery kanao magnova ndaty ho soa toetse. Tsy mitovy amy ty boke hafa vata’e ty Baiboly. Ndaty an-tapetrisa’e ty rese lahatse fa Saontsin’Andrianagnahare vata’e io.​—Vakio 1 Tesalonianina 2:13.

Henteo ty video Ino ty Porofo fa Maregne o Baibolio?

3. Inogne ty raha rehafe ty Baiboly?

Soa ty fikasan’Andrianagnahare hoahy o ndatio. I talily soa zay ro rehafe ty Baiboly. Rehafe ty Baiboly fa nisy paradisa tie taloha, faie tsy nahazo nitoboke ao sasa o ndatio. Rehafe’e ao ka fa mbe ho paradisa indraike ty tane toy.​—Vakio Apokalypsy 21:4, 5.

Fagnampe izay, le misy torohevetse naho lalàna vaho toro lalagne ty agnate ty Saontsin’Andrianagnahare ao. Ahafantaragne ty toetsen’Andrianagnahare ka ty fitantaragne ty fomba nifandrambesa’e tamo o ndatio. Hagnampe azo hahafantatse an’Andrianagnahare vata’e areke ty Baiboly. Atoro’e ao ka ze toko’e hatao’o naho te hinamagne amy Jehovah rehe.​—Vakio Salamo 19:7, 11; Jakoba 2:23; 4:8.

4. Inogne ty hagnampe azo hahazo ty heve ty Baiboly?

Hagnampe azo ty bokekele toy, satria ty fomba fampianara i Jesosy ty orihegne atoa. Nanognogne andinin-teny maro reke, mba hagnazavagne “ty heve ty Soratse Masigne.”​—Vakio Lioka 24:27, 45.

Miambake vata’e ty talily soa boake aman’Andrianagnahare. Faie tsy liagne amy izay ty ndaty ila’e. Misy aza malaigne aze. Faie ko kivy rehe. Mila mianatse ty miomba an’Andrianagnahare rehe, naho te hahazo i havelogne nainai’ey.​—Vakio Jaona 17:3.