Inogne ty Talily Soa Hoahy ze Ndaty Tea Fivavahagne?

1. Maregne iaby vao naho fa fivavahagne?

Misy ndaty tea an’Andrianagnahare ze kila fivavahagne. Vazoho i Jehovah o ndaty rehoe, sady tea’e. Faie misy ndaty magnararaotse o fivavahagneo mba hanoan-draha raty. (2 Korintianina 4:3, 4; 11:13-15) Rey amy ty vaovao ohatse, fa misy mpivavake mamono ndaty, magnorohoro, manohagne aly, mampijale sady mamahotse ajaja. Mampanahelo vata’e zay!​—Vakio Matio 24:3-5, 11, 12.

Magnomey voninahitse an’Andrianagnahare ty fivavahagne maregne. Faie mahavignetse aze ty fivavahan-diso, satria mampianatse ty raha tsy rehafe ty Baiboly. Agnisa izay ty fampianaragne raha diso miomba an’Andrianagnahare naho ty mate. Faie tea i Jehovah hahafantatse ty maregne o ndatio.​—Vakio Ezekiela 18:4; 1 Timoty 2:3-5.

2. Hataon’Andrianagnahare akore o fivavahan-disò?

Fantan’Andrianagnahare fa malaigne aze o fivavahan-disò, fa ty tontolo fehe i Satana toy ro tea iareo. (Jakoba 4:4) “Babylona Lahibey” ty anognona ty Baiboly ty fivavahan-diso iaby. Tanàgne nisy taloha ty Babylona. Tao ty nisy ty fivavahan-diso voaloha’e, tafara ty Safodrano faha i Noa. Fa marine ty handravan’Andrianagnahare o fivavahan-disò, satria mamitake naho mampijale ndaty.​—Vakio Apokalypsy 17:1, 2, 5, 16, 17; 18:8.

Faie intoy misy talily soa: Havory i Jehovah ze ndaty tea aze, mbe mivavake amy ty fivavahan-diso amy ty tane toy iaby. Fa manao izay reke amy izao, le mampianatse iareo ty hamarenagne.​—Vakio Mika 4:2, 5.

3. Inogne ty toko’e hatao ze ndaty tea an’Andrianagnahare?

Te hagnavotse ze ndaty mikezake manao ty soa ty Jehovah. Mandrisike iareo areke reke mba hiala amy ty fivavahan-diso. Vognogne hiala amy ty raha raty iaby ze ndaty tea an’Andrianagnahare vata’e.​—Vakio Apokalypsy 18:4.

Nisy ndaty hoe izay tamy ty taonjato voaloha’e. Naho fa nitoria o apostolio iareo, le avy le nagneke sady fale. Modely ho antikagne iareo satria nagnova ty fiaigna’e, le ty zoton’arofo i Jehovah indraike ty natao’e loha laharagne amy ty fiaigna’e. Nanjare sambatse iareo, satria nanjare nanagne tanjogne soa naho raha tamaegne.​—Vakio 1 Tesalonianina 1:8, 9; 2:13.

Rambese i Jehovah ho agnisa ty keleia’e ze ndaty miala amy ty fivavahan-diso. Hanjare ho nama’e naho hahazo longo vaovao ho tea azo rehe, sady hiaigne nainai’e naho magneke hiharine i Jehovah.​—Vakio Marka 10:29, 30; 2 Korintianina 6:17, 18.

4. Inogne ty raha hiseho amy ty hoavy?

Fa kedekede sisa, le ho foagne o fivavahan-disò. Talily soa vata’e zay! Tsy hijale sasa ty ndaty magneneke ty tane toy amy izay, satria tsy hisy fivavahan-diso hamitake naho hampialy sasa. Hivavake amy i Andrianagnahare raike sady maregney iaby ze kila ndaty amy izay.​—Vakio Apokalypsy 18:20, 21; 21:3, 4.