Fa Nisy Andro vao Rehe Nangìke Naho Natahotse?

Heheke ty ajaja amy i sarey eo tiagne! Hoe ajaja mangìke naho matahotse. Fa nanahake io ka vao rehe?... Misy andro ka tikagne manahake io. Mirehake ty Baiboly fa nisy ndaty ragne i Jehovah nangìke sady natahotahotse. Agnate izay ty Elia. Andao tikagne hianatse ty miomba aze.

Fa ela bey taloha ty niterahagne i Jesosy, le nitoboke a Isiraely agne ty Elia. I Ahaba ty mpanjaka o Isiraelio tamy izay. Nivavake tamy ty andrianagnahare diso atao tihoeke Bala iareo amy i Jezebela vali’e. Tsy nivavake tamy i Jehovah iareo. Maro ka ty Isiraelita nivavake tamy i Bala. Raty fagnahy ty Jezebela. Ty hamono ze ndaty mivavake amy i Jehovah avao ty raha paliae’e. Ho vinono’e iaby ty Elia. Inogne ty raha nanoe i Elia?...

Nilay an-tane lavitse agne ty Elia, le nietake tagnate lakato. Inogne ty anto’e nietaha i Elia?... Natahotse. Faie tsy toko’e ho natahotse reke. Fa nagnino? Fa nahafantatse reke fa ho nagnampe aze ty Jehovah. Tamy tie indraike ty Jehovah namale ty vavake nanoe i Elia, le nanjotso afo boake an-dagnitse agne. Izay ty nanoroa’e ty heri’e. Toko’e ho nagnampe i Elia ka reke tamy io.

Naho fa nietake tagnate lakato ao ty Elia, le nagnontenea i Jehovah tie: ‘Nagninogne atoagne iheo?’ Namale ty Elia tie: ‘Izaho avao ty sisa manompo azo. Izaho raike avao ty tao, le natahotse raho kera hisy hamono.’ Nieretseretse ty Elia fa nimate iaby ty mpanompo i Jehovah ila’e. Nisaontsy tama’e ty Jehovah tie: ‘Vande zao. Mbe misy 7 000 ty ndaty manompo ahy agne. Ko matahotse rehe fa mbe maro ty asa hampanoeko azo.’ Nahafale i Elia vao ty naharey izay?...

Inogne ty raha ianara’o amy ty raha niseho tamy i Elia?... Tsy toko’e hatahotse naho hangìke rehe. Managne ragnetse tea i Jehovah naho tea azo rehe. Mahery ka ty Jehovah sady hagnampe azo. Mahafale azo vao ty mahafantatse tie tsy mangìke rehe?...