Niakatse Fitsaràgne ty Vahoa i Fanjakagney

1, 2. a) Ino ty natao ty mpitarike fivavahagne, le ino ty natao o apostoly reo? b) Ino ty raha natao o apostolio naho fa niraràgne tsy hitory sasa iareo?

TAOGNE 33 tamy izay. Vaho nivita tsielatsiela i Pentekostay, sady mbe nivaovao iaby ty fiangonagne kristiana ta Jerosalema tao. Nieretseretse areke ty Satana fa mete soa naho amy ireke mbe vaovao zao ro tafihegne amy izay rava. Le avy le natao’e ze handrarà o mpitarike fivavahagneo ty asa fitoriagne. Faie tsy natahotse o apostolio fa nitory avao, le lahilahy naho ampela maro ty nanjare “nino i Tompo.”​—Asa. 4:18, 33; 5:14.

² Niboseke o mpitarike fivavahagneo, le nigadrae’e iaby o apostolio. Faie nisy anjely i Jehovah nanokake i pirizoy naho fa tamy ty hale igne. Ie nimarain-dray bey le fa igne ka iareo fa nitory! Tsinepake indraike iareo satria fa rinara tsy hitory faie mbe nanohy avao. Nentegne tamy ty mpitarike fivavahagne tamo o Fitsaràgne Ambone o Jiosio ao areke iareo. Tsy natahotse iareo sady nirehake tie “Andrianagnahare ro mpitondra anay le ie ro orihe’ay, fa tsy ndaty.” Vao mainke niboseke i mpitarike fivavahagne rey, le “nitea’e ho vonoegne” iareo. Faie tamy ze fotoagne zay ro nisy ndaty ambone sady mpampianatse lalàna atao tihoe Gamaliela nampitao i fitsaràgney tie: “Ko militse amy ze atao o lahilahy reo fa engao avao iareo.” Nahagaga fa nagneke i reha’ey i fitsaràgney, le navotso’e i apostoly rey. Naho fa nivotsotse tao i apostoly rey, le vao mainke “tsy nitofa nampianatse naho nitory ty talily soa miomba i Kristy.”​—Asa. 5:17-21, 27-42; Ohab. 21:1, 30.

3, 4. a) Ino ty teteke ampiasae i Satana hatrake amy izao? b) Ino ty horehafentikagne amy ty toko toy ato naho amy ty toko roe magnarake?

³ Tamy izay ro vaho nisy manam-pahefàgne nandrara ty asa o Kristianao tsy hitory, le nampiakatse fitsaràgne iareo. (Asa. 4:5-8; 16:20; 17:6, 7) Faie tsy nijanogne hatrake eo zay. Mbe atao i Satana avao ty hahavy antikagne tsy hitory sasa. Misy ndaty risihe’e hanao kitomboke antikagne amo o manam-pahefàgneo tie mpagnakorotagne vahoake zao tikagne, mandrisike o ndatio higoreve, ndra ka mpivarotse boke. Ampiakarentikagne amy ty fitsaràgne i raharaha rey kindraike, naho fa treantikagne tie izay ty hevetse mete. Andao areke tikagne hagnente raharaham-pitsaràgne tsy ampeampe naho lilim-pitsaràgne naboake tamy izay. Hotrea’o fa mahasoa azo i lilim-pitsaràgne rey sady nagnampe antikagne ‘hiaro i talily soay naho hagnamafe oregne aze arake ty lalàna.’​—Fil. 1:7.

⁴ Horehafentikagne amy ty toko toy tie, nisy Vavolombelo i Jehovah niakatse fitsaràgne, satria nitake ty zo’e hitory. Hotreantikagne amy ty toko roe magnarake ka tie nisy niakatse fitsaràgne satria tsy nagneke ho agnisa ty tontolo toy sady te hagnorike ty fitsipy i Jehovah avao.

Mpagnakorontagne vao ty vahoa i Fanjakagney?

5. Nagnino ro nisy Vavolombelo i Jehovah tsinepake ty ta Etazonia tagne taloha kede ty 1940, le nieretseretse ty hanao ino ty rahalahy tamy foibey tagne?

⁵ Tsy nahazo nitory ty Vavolombelo i Jehovah ta Etazonia tagne taloha kede ty 1940 naho tsy nahazo alalagne tamy ty manam-pahefàgne. Tsy nimete nanao izay iareo, satria fanta iareo fa azo o fanjakagneo foagnagne avao i fahazoan-dalagne rey. Lily boake amy i Jesosy ka i tihoey tie mila mitory, le tsy managne zo hisakagne iareo tsy hanao izay o fanjakagneo. (Mar. 13:10) Ino ty voka izay? Anjato’e ty mpitory tsinepa o polisio. Nieretseretse hampiakatse i raharahay tamo o fitsaràgneo ey ty rahalahy tamy i foibey tao. Satria tea iareo hoporofoegne fa tsy rare’e naho raràgne tsy hitory ty Vavolombelo i Jehovah satria zo’e ty manao ze raha fatao ty fivavaha’e. Niakatse fitsaràgne vata’e areke iareo tamy 1938, le nisy voka’e soa tafara tatoy. Andao hohenteantikagne ty raha niseho.

6, 7. Ino ty niseho tamy i Newton naho ty valy aman’ana’e?

⁶ Nandeha nitory ta New Haven, a Connecticut agne, ty Newton Cantwell rahalahy 60 taogne, naho i Esther vali’e tamy ty maraindray ty talata 26 Avrily 1938. Niarake tamy iareo ty ana’e telo lahy atao tihoe Henry naho i Russell vaho i Jesse. Mpisava lalagne iaby iareo fokoa’e. Fa nampoize iareo fa va’e tsy ho tafapoly iareo tamo o hariva iohoe. Satria fa mateteke tsinepa o polisio iareo, le fa napoize’e tie va’e ho tsepahegne indraike. Faie tsy nahakivy iareo zay. Tobile roe ty nente iareo. Ty raike nisy boke naho gazete vaho grafofony, le i Newton ty ninday aze. Fa ty raike nisy parilera bey, le i Henry ty ninday aze. Mbe 22 taogne reke tie tamy izay. Vaho nitory kedekedeke iareo, le inge vata’e nisy polisy nisakagne.

⁷ I Russell avao hey ty tsinepake. Vaho 18 taogne reke tamy izay. Tsinepake ka ty Newton naho i Esther. Nitalake i Jesse boake lavitse tie nente i polisỳ iareo telo mianake. Tavela raike amy i tanàgney ao reke, satria ty Henry mbe nitory tamy ty toeragne hafa. Faie nandeha avao reke nitory niarake tamy i grafofonỳ. Nisy lahilahy Katolika roe rezay nagneke hitsanogne aze. Nandefa ty lahajaka i Rahalahy Rutherford areke ty Jesse. “Fahavalo” ty voalohan-dreha’e. Faie vaho nitsanogne kedekede iareo, le niboseke, sady le fa ho vinono iareo ty Jesse. Nisintake moramora avao areke reke, faie tsinepake ka naho fa niavy eo sady ginadra. Vaho 16 taogne ty Jesse tamy izay. Afake maliolio ty Esther fa i Newton naho i ana’e rey ginadra iaby. Nandoa lamandy iareo, le nakaregne tamy i andro igne avao, aparake ty handignisagne ty fitsaràgne iareo.

8. Nagnino ty Jesse Cantwell ro nivoaheloke ho mpagnakorotagne?

⁸ Ta New Haven agne ty ry Cantwell miroanake ro nitsaraegne, tamy Septambra 1938. Voaheloke higadra ty Newton naho Russell vaho i Jesse, satria nao nangata-bola tama o ndaty zao, faie tsy nahazo alalagne. Nampiakare iareo tamy ty fitsaràgne fara’e ambone a Connecticut agne i raharahay. Faie voaheloke ho mpagnakorotagne ty Jesse tie tagne. Satria niavy tagne i lahilahy roe nitoria’e rey, sady nagnamafe fa nao nagnaraty ty fivavaha’e zao i lahajaka nalefa i Jesse-y ro sady nitifitifitse iareo. Nampiakarentikagne tamy ty fitsaràgne ambone ta Amerika agne i raharahay. Io ty fitsaràgne fara’e ambone a Etazonia agne.

9, 10. a) Ino ty lilim-pitsaràgne naboa ty fitsaràgne Fara’e Ambone tamy 20 Mey 1940? b) Nagnino ro mbe mahasoa ty mpitory a Etazonia agne avao o lilim-pitsaràgne iohoe?

⁹ I Rahalahy Hayden Covington ty mpisolovavantikagne tamy izay.a I Charles Hughes ty Filoha i Fitsaràgne Amboney, sady nisy mpitsara valo niara-niasa tama’e. Tamy 29 Marsa 1940 iareo ro nanomboke nandineke i raharahay. Nitsanogne soa ty porofo nirehafe i rahalahy Covington i fitsaràgney. Mba nikezake nagnaporofo ka i mpisolovava i Connecticut rey tie mpagnakorotagne tikagne. Nirehake tama’e areke ty mpitsara raike tie: “Naho tsy diso raho, le tsy tea o ndaty ka ty Kristy Jesosy satria tsy tea iareo ty raha nitorie’e sa tsy izay?” Le namale i mpisolovavay tie: “Tena izay, fa naho tsy diso ka raho, le nisazea o ndatio reke satria mbe nitory avao ndra tie tsy tea o ndatio aza i rahay. Sa tsy izay vao ty rehafe ty Baiboly?” Voafandry ty reha’e avao i mpisolovavay! Tsy tsapa’e tie ireke avao, le fa mieke fa manahake i Jesosy tikagne satria tsy tea o ndaty ty raha torientikagne sady mitovy amy i ndaty namono i Jesosy rey ty fitsaràgne a Connecticut agne satria nagnasaze antika. Namoake lilim-pitsaràgne areke i fitsaràgney tamy 20 Mey 1940 tie managne ty rare’e tika Vavolombelo i Jehovah.

¹⁰ Tena nisy voka’e soa o lilim-pitsaràgne iohoe. Satria vao mainke nagnamafe ty zo o ndatio hanao ty raha fatao ty fivavaha’e io, le tsy mahazo manakagne aze o manam-pahefàgneo. Nirehake ka i fitsaràgney “fa tsy atahoragne hagnakorotagne vahoake” ty Jesse naho henteagne ty raha natao’e. Voaporofo areke fa tsy mpagnakorotagne o Vavolombelo i Jehovah-o. Nandrese tikagne tamy igne! Mbe mahasoa antikagne avao o lilim-pitsaràgne iohoe hatrake amy izao. Hoe ty rahalahy raike mpisolovava toy: ‘Tsy voafehefehe bey sasa zahay, fa afake mitory i talily soay amy ty magnodidigne anay avao. Tsy matahotse hosakana o manam-pahefàgneo sasa zahay.’

Mitaogne ndaty higoreve amo o fanjakagneo vao tika?

11. Ino ty natao ty Vavolombelo i Jehovah ta Kanada agne, le ino ty anto’e?

¹¹ Nijalejale ka ty Vavolombelo i Jehovah ta Kanada agne tafara kede ty taogne 1940. Tsy nengà o fanjakagneo hitory iareo. Namoake taratasy milimpy nampahafantatse izay areke iareo tamy 1946, le nizarae iareo tagnate ty 16 andro io. Efatse ty peje i taratasy milimpỳ sady izao ty voalohan-dreha’e tie Hegnatse Hoahy i Kanada ty Fankalaigna i Québec An’Andrianagnahare Naho i Kristy Vaho ty Fahafahagne (frantsay). Nitognonegne tao ty raha iaby nanjò o Vavolombelo i Jehovah-o. Nitarike vahoake mba hipay aly amo o Vavolombelo i Jehovah-o ty mpitarike fivavahagne ta Québec tao. Ankoatse izay, le nampijaléjalé o polisio ka iareo. Hoe i taratasy milimpỳ: “Misy Vavolombelo i Jehovah tsepahegne avao ndra tie tsy nandika lalàna aza. Fa ho 800 eo ho eo ty kitomboke natao tamy iareo a Montréal agne.”

12. a) Akore ty nandrambesa o ndatio i taratasy milimpỳ? b) Inogne ty nanoagne kitomboke antika? (Henteo ka ty fagnamarehagne ambane peje.)

¹² Niboseke ty Maurice Duplessis, praiminisitra i Québec, naho boake namaky i taratasy milimpỳ, le nirehake fa “hialy” amo o Vavolombelo i Jehovah-o. Niharo hevetse tama’e ka ty Kardinaly Villeneuve. Nao hoe o ndatio fa mandrisike ty hafa higoreve amo o fitondragneo ze mpitory nizara i taratasy milimpỳ. Tampotampoke teo, le nisy 1 600 ty fitoriagne antikagne amy i fitsaràgney agne. Hoe ty rahavave raike mpisava lalagne toy: “Mateteke tsinepake zahay, le tsy fa voaisako sasa.”b

13. Ia ty niakatse fitsaràgne voaloha’e, le ino ty lily niboake tamy izay?

¹³ Agnisa ty nihara ty raha nirehafegne tamy i taratasy milimpỳ tao ty rahalahy raike atao tihoe Aimé Boucher naho ty anak’ampela’e roe atao tihoe Gisèle naho Lucille. T’atimo ty tanà i Québec agne iareo ro nitoboke. Niambane naho naleme fagnahy ty Rahalahy Boucher. Mpambole reke, le misy fotoagne ka mandeha an-drova agne sady mandeha sarete. Tsy agnisa ze o ndaty mpagnakorotagne zao iareo telo mianake. Faie naho fa nizara i taratasy milimpỳ tan-tanà iareo ey iareo, le nirehafegne tie nao mandrisike o ndatio higoreve. Iareo areke ty niakatse fitsaràgne voaloha’e tamy 1947. Vaho 18 taogne ty Gisèle tamy izay fa i Lucille 11 taogne. Tsy tea Vavolombelogne i mpitsaray, le tsy nagneke reke tie tsy diso ty ry Boucher ndra tie nivoaporofo aza zay. Ndra leo’e nanognogne i heve i mpisolovava i tanàgney tihoey tie mandrisike o ndatio hifankalaigne i taratasy milimpy nizarae ry Boucher-ay. Nitantara ty raha tena nisy avao i taratasy milimpỳ. Naho tsoregne areke, le te hirehake i mpitsaray tie voaheloke ze mirehake ty maregne. Nivoaheloke higadra ty Aimé naho i Gisèle, le ndra i Lucille mbe kedekedey aza ginadra roe andro. Nampiakarentikagne tamy ty fitsaràgne fara’e ambone ta Kanada agne areke i raharahay. Io ty fitsaràgne fara’e ambone agne.

14. Ino ty natao o Mpitory ta Québec agne reo ndra tie nampijalegne aza?

¹⁴ Vao mainke nampijalé ty ndaty ta Québec tagne o mpitorio. Faie nahasahy nitory miomba i Fanjakagney avao iareo, sady mateteke aza ro nisy voka’e tena soa zay. Nitelonjato avao hey ty Vavolombelogne tagne tamy iareo nizara i taratasy milimpỳ. Faie nanjare 1 000 iareo efatse taogne tafara izay!c

15, 16. a) Ino ty lilim-pitsaràgne naboa ty Fitsaràgne Fara’e Ambone a Kanada agne? b) Ino ty voka izay tamy ty mpitory ta Kanada agne naho ty ndaty hafa?

¹⁵ Niakatse Fitsaràgne Ambone ty ry Aimé Boucher tamy Jona 1950. Mpitsara sive ty tamy i fitsaràgney tao, le i Rahalahy Glen How ty mpisolovavantikagne. Niboake i lilim-pitsaràgney tamy 18 Desambra 1950 tie afake maliolio iareo. Satria nihazavae i Rahalahy How tagnatreha i fitsaràgney eo fa ty atao tihoe “mitaogne ndaty higoreve amo o fitondragneo”, le mandrisike ndaty mba higoreve naho hagnongagne fanjakagne. “Faie tsy nandrisike o ndatio hanao izay i taratasy milimpỳ” hoe reke fa “nirehake ty maregne avao sady tsy voarara ty lalàna zay.” Nieke areke i fitsaràgney fa maregne ty reha’e. Hoe ty Rahalahy How: “Tena hitako tamy igne fa natao i Jehovah ty hahavy anay handrese.”d

¹⁶ Tena nandrese vata’e ty Fanjakàn’Andrianagnahare! Satria nisy kitomboke 122 ka tsy nanan-kery sasa naho fa niboake i lilim-pitsaràgney. Manjare mahazo mirehake ty raha trea’e tsy mete atao o fanjakagneo ka ty mponegne a Kanada ao naho ty firenena maromaro mirehake angilé (Commonwealth Britanike). Tsy vita izay fa tsy nitomombagne ty teteke natao ty mpitarike fivavahagne naho ty fitondragne ta Québec tagne mba hifehefeheagne antikagne.e

Mpivarotse boke vao ty vahoa i Fanjakagney?

17. Ino ty raha rehafe ty fitondragne ila’e miomba antika?

¹⁷ Tsy ‘nivarotse ty Saontsin’Andrianagnahare’ ty Kristiana voaloha’e. Manahake izay ka tikagne. (Vakio ty 2 Korintianina 2:17.) Faie misy fitondragne mirehake tie mpivarotse boke tikagne fa tsy mpitorin-teny avao, le toko’e hagnorike ty lalàna miomba ty varotse. Nisy tamantikagne aza niakatse fitsaràgne noho ze raha zay. Andao tikagne handineke ty raha niseho.

18, 19. Inogne ty natao ty manam-pahefàgne ta Danemarka agne mba hisakanagne antika tsy hitory sasa?

¹⁸ Danemarka: Namoake lalàna o fanjakagneo tamy 1 Oktobra 1932 tie tsy azo atao ty mivarotse boke ndra gazete naho tsy mangatake alalagne amy iareo. Faie tsy nanao izay o mpitorio. Nisy Vavolombelogne dime nitory ty ta Roskilde tagne tamy ty maray igne. Telopolo kilometatse mahery ahandrefa i Copenhague, rova i Danemarka agne o tanàgne iohoe. Tsinepake ty raike tamy iareo satria nao nivarotse boke zao faie tsy nahazo alalagne. August Lehmann ty agnara’e.

¹⁹ Niakatse fitsaràgne ta Roskilde agne ty Lehmann tamy 19 Desambra 1932. Nagneke reke tie ninday boke an-tragno o ndaty agne, faie nihazavae’e fa tsy hivarotse aze ty tanjo’e. Nitovy hevetse tama’e i fitsaràgney. Hoe i fitsaràgney: ‘Mahavelon-tegna soa i voahelokey. Tsy mahazo tombo’e ka reke naho fa mizara boke, sady tsy mieretseretse ty halake tombo’e. Ireke aza magnakatse ty vola’e boake amposi’e ao mba handehana’e hitete tragno.’ Niboake areke i lilim-pitsaràgney tie tsy “varotse” i natao i Lehmann-ay. Faie tsy nijanogne hatrake eo o fahavalo o vahoa i Jehovah-o reo. Nampiakare iareo amy ty fitsaràgne fara’e ambone a Danemarka agne i raharahay satria tsy tea’e hitory sasa ty Vavolombelogne magneragne i Danemarka. (Sal. 94:20) Ino ty natao o rahalahintikagne reo?

20. Ino ty lilim-pitsaràgne naboa ty Fitsaràgne Fara’e Ambone a Danemarka agne? Le ino ty natao o Rahalahintikagneo noho ze raha zay?

²⁰ Vao mainke nikezake nitory ty mpitory nagneragne i Danemarka, heregnandro taloha ty hitsaràgne i Lehmann. Niboake i lilim-pitsaràgney tamy talata 3 Oktobra 1933, le nitovy hevetse tamy i Fitsaràgne Ambone ta Roskilde tagney avao i Fitsaràgne Fara’e Amboney. Nirehake io tie tsy nandika lalàna ty Lehmann. Tsy mila mangatake alalagne areke o Vavolombelogneo naho fa mitory. Nieke iareo fa i Jehovah ty nahavy izay, le vao mainke nazoto nitory iareo. Tsy nisakatsakagne iareo sasa o fitondragneo tafara izay.

21, 22. Ino ty lilim-pitsaràgne naboa ty Fitsaràgne Fara’e Ambone Amerika agne?

²¹ Etazonia: Mpisava lalagne ty Robert Murdock. Nitory ta Jeannette agnila i Pittsburgh a Pennsylvania agne reke naho ty mpitory fito tamy lahady 25 Fevrie 1940. Faie nitsepahegne iareo tamy izay, sady nitsaraegne. Nao diso zao iareo satria tsy nandoa vola tamo o fanjakagneo mba hahazoagne alalagne hizara boke. Nampiakaregne tamy ty Fitsaràgne Ambone ta Amerika agne areke i raharahay.

²² Niboake i lilim-pitsaràgney tamy 3 Mey 1943, le nirehafegne fa tsy diso o Vavolombelo i Jehovah-o. Nirehake i fitsaràgney fa tsy toko’e hangatake alalagne tikagne satria zontikagne ty mizara boke naho gazete, arake ty lalàm-pagnoregnagne. Nifoagna i fitsaràgney areke i lalàna naboa ty tanà i Jeannette igne satria “manakatsakagne o ndatio tsy hamoake boke naho gazete naho tsy hanao ty raha ampanoe ty fivavaha’e aze.” Nirehake ty mpitsara raike atao tihoe William Douglas fa ‘tsy mizara boke avao o Vavolombelo i Jehovah-o naho fa mitete tragno fa mitory teny ka. Tsy toko’e hosakatsakanagne areke iareo satria mitovy amy ty ndaty mivavake am-piangonagne agne naho mitory teny ambone i alitaray ey avao.’

23. Nagnino ro mbe ilaegne hatrake amy izao i lilim-pitsaràgne tamy 1943 rey?

²³ Tena niambake i lilim-pitsaràgne ignehoe satria nagnamafe tie tsy mpivarotse tikagne fa mpitory teny. Raharaha 13 ty nitsaraegne tamy ty Fitsaràgne Ambone tamy 3 Mey 1943 io sady nandrese tikagne tamy ty raharaha 12 tamy io. Tena nilaegne tafara tatoy i lilim-pitsaràgne niboake iaby tamy ioy satria irey avao ro nampiasaegne isake tie nisy te hisakagne antikagne tsy hitory ndra isan-tragno zay ndra amy ty toeragne hafa.

‘Andrianagnahare ro tsy maintsy ankatoave’ay’

24. Ino ty ataontikagne naho fa mandrara antika tsy hitory sasa o fitondragneo?

²⁴ Tena fale tikagne naho fa engà o fanjakagneo hitory i talily soay. Faie misy fanjakagne mirehake mivantagne amantikagne kindraike tie tsy mahazo mitory tika. Ino ty ataontikagne amy izay? Manahake o apostolio tika, le ‘Andrianagnahare ro tsy maintsy ankatoaventika fa tsy ndaty.’ (Asa. 5:29; Mat. 28:19, 20) Mitory avao areke tikagne, faie mipay hevetse hafa ka mba hirehafagne amo o ndatio. Faie tsy mijanogne amy izay avao tika fa ampiakarentikagne amo o fitsaràgneo ey i raharahay. Intoa misy ohatse roe:

25, 26. Nagnino ty Vavolombelo i Jehovah ta Nikaragoà agne ro nandeha tamy ty Fitsaràgne Fara’e Ambone agne, le ino ty nivoka izay?

²⁵ Nikaragoà: Misionera ty Rahalahy Donovan Musterman sady mpikarakara sampagne. Tinoka ho amy ty Kapiteny Arnoldo García agne reke, tamy 19 Novambra 1952. Ireke ty lahibey ty Biròm-panjakagne Miandraikitse ty Fifindra-monegne a Managoà, rova i Nikaragoà agne. Nirehake tama’e i Kapitenỳ fa “tsy mahazo mitory ty raha inoa’e sasa” ty Vavolombelo i Jehovah a Nikaragoà agne “sady tsy mahazo mitaogne ndaty hagnorike ty fivavaha’e.” Nagnazava i Kapitenỳ tie tsy nahazo alalagne hitory iareo sady misy ty mirehake tie Kominista ka iareo. Ia ty nanao kitomboke iareo? O mpitarike Fivavahagne Katolikao.

²⁶ Le avy le nikezake nifandamigne tamy ty ministera ty fivavahagne naho ty Prezidà Anastasio Somoza García ty Rahalahy Munsterman, faie tsy nisy voka’e. Nipay hevetse hafa mba hanompoagne i Jehovah areke o mpitorio. Tsy nivory tamy i Anjomba i Fanjakagney agne sasa iareo fa tamy ty toeragne hafa agne sady tsiampeampe avao ty niarake nivory. Mbe nitory avao iareo, faie tsy nitory an-dalagney sasa. Nangatake tamy ty Fitsaràgne Ambone a Nikaragoà ao iareo mba hagnafoagnagne i fandraragney. Nanjare nalaza amo o gazeteo zay, le nagneke handineke i raharahay i Fitsaràgne Amboney. Niboake i lilim-pitsaràgney tamy 19 Jona 1953. Nirehake i fitsaràgney fa tsy toko’e ho sakatsakanagne tsy hitory o Vavolombelo i Jehovah-o satria zo’e ty maneho hevetse naho manao ze eretserete’e fa mete sady mirehake amo o ndatio ty raha ino’e arake ty lalàm-pagnoregnagne. Nirehake ka reke fa toko’e hikezake hifandrambe soa amy ty Vavolombelo i Jehovah indraike o fitondragneo.

27. Nagnino ro nahagaga ty ponegne a Nikaragoà agne i lilim-pitsaràgne naboa ty Fitsaràgne Fara’e Amboney, le akore ty nandrambesa o rahalahio izay?

²⁷ Nigaga ty mponegne ta Nikaragoà ao naho fa niaro o Vavolombelo i Jehovah-o i Fitsaràgne Amboney. Fa nagnino? Satria to rehake ty mpitarike fivavahagne agne, le tsy nahavany nandietse ty reha iareo o fitsaràgneo taloha izay. Nifehefehe loatse ka o mpitondrao, le mahalagne vaho izay nisy nahavany nagnafoagne ty lily naboa iareo o fitsaràgneo. Nieke areke o rahalahintikagne tagneo fa nampea i Jesosy Mpanjaka iareo sady nazoto nitory matoa nandrese.​—Asa. 1:8.

28, 29. Ino ty fiovagne lahibey nisy ta Zaire agne tamy 1986?

²⁸ Zaire (Repoblika Demokratika i Kongò): Nahatratse 35 000 teo ho eo ty Vavolombelo i Jehovah tagne tamy 1985. Nitombo avao o mpitorio, le nisy tragno vaovao naoregne mba hatao Betela. Nisy havoriambey iraisam-pirenena ka ty ta Kinshasa rova i Kongò agne tamy Desambra 1985, le 32 000 ty mpagnatreke. Faie nisy fiovagne lahibey tafara izay.

²⁹ Misionera ta Zaire tagne tamy izay ty Marcel Filteau, rahalahy boake a Québec a Kanada agne. Fa agnisa ty niaretse i fagnenjehagne ta Québec agney reke. Hoe reke: “Nahazo taratasy ty sampa i Zaire tamy 12 Marsa 1986 tie tsy ekegne ho ara-dalàna sasa ty fikambana ty Vavolombelo i Jehovah. I Prezidà Mobutu Sese Seko ty nanao sonia aze.

30. Ino ty raha nanahiran-tsaigne o Komity i Sampagneo, le ino ty nifanapahan-keve iareo?

³⁰ Nisy fagnambaragne tamy radio naho fa nimaray io tie: ‘Tsy hisy ze o Vavolombelo i Jehovah zao sasa ty a Zaire eto manomboke amy izao.’ Tsy ela tafara izay, le nisy namoteke ty Anjomba i Fanjakagney tagne sady nisy nangalatse ka ty enta o rahalahintikagneo. Tsinepake naho nigadraegne ka iareo sady nampijalegne. Nigadraegne iaby hatrake amy ty ajaja kidikidike! Nalae o fanjakagneo ty fanagna i fandaminagne tamy 12 Oktobra 1988 sady polisy ty nanjare nitoboke tamy Betela ao. Nangatake tamy Prezidà Mobutu ty sampa i Zaire mba hagnafoagnagne i lily naboa’ey faie tsy nahazo vale’e. Nisahiran-tsaigne areke ty Komity Sampagne tagne tie hitory amy ty Fitsaràgne Ambone sa handigne hey. Misionera tagne ty Timothy Holmes tie tamy izay, sady ireke ka ty mpandrindra ty Komity i Sampagne agne. Hoe reke: “Nivavake tamy i Jehovah zahay mba hahafantaragne ty toko’e hatao sady hahaiagne manapan-kevetse.” Nitrea iareo naho fa niavy eo tie soa naho mandigne hey. Ndra aleo iareo areke nampahery o rahalahy naho rahavaveo sady nipay hevetse hafa mba hitoriagne.

31, 32. Ino ty lilim-pitsaràgne niambake naboa ty Fitsaràgne Fara’e Ambone a Zaire agne, sady ino ty nivoka izay?

³¹ Nandeha ty fotoagne. Nanjare tsy le nenjehegne sasa o Vavolombelogneo, sady nanjare nagnaja ty zo o ndatio o manam-pahefàgneo. Trea ty Komity i Sampagne areke fa mete amy izay naho mangatake amy ty Fitsaràgne Ambone a Zaire ao iareo mba hagnafoagnagne i fandraragney. Nahagaga fa nagneke handineke i fangatahagney i fitsaràgney. Niboake areke i lilim-pitsaràgney tamy 8 Janvie 1993, ty dika izay fa ho fito taogne tafara i lily naboa i prezidà-aỳ. Voarehake tao fa tsy rare’e ty natao o fitondragneo, le foagnagne i fandraragney. Mba eretsereto moa! Nivany i mpitsaray ty nagnafoagne i lilỳ ndra tie ho namoe ty fiai’e aza iareo noho ze raha zay. Hoe ty Rahalahy Holmes: “Trea’ay tamy irey vata’e tie mahay magnova raha ty Jehovah.” (Dan. 2:21) Tsapa iareo fa i Jesosy vata’e ty nanoro tie ino ty toko’e hatao sady ombia zay ro hatao. Tena nampahery iareo zay!

³² Nanjare afake napilitse misionera ta Zaire agne areke ty birò i sampagne, afake nagnoregne Betela vaovao, sady afake nagnafatse boke naho gazete.f Tena fale areke tika mpanompo i Jehovah magneran-tane satria treantikagne fa tena mamonje antikagne vata’e reke.​—Isaia 52:10.

“I Jehovah ro mpagnampe ahy”

33. Nagnino ro mampahery antikagne ty nandineke i raharaha aram-pitsaràgne tato rey?

³³ Nirehake ty Jesosy tie: Izaho hagnomey anareo vava naho fahendreagne tsy hay ty fahavalo’areo iaby resegne naho toheregne.” (Vakio ty Lioka 21:12-15.) Tanterake vata’e zay. Satria tika nandrese mateteke tamo o fitsaràgneo ey. Nisy mpitsara ohatse nahavany nagnomey rare’e antikagne manahake ty natao i Gamaliela tamy ty taonjato voaloha’e. Natao i Jehovah tsy tomombagne o mpanohetse antikagneo. (Vakio ty Isaia 54:17.) Tsy misy mahakalagne antikagne tsy hitory sasa areke satria ireke ty nagnirake antika hanao izay.

34. Nagnino ro mahagaga tihoe nandrese avao tikagne tamo o fitsaràgneo tey, sady magnaporofo ino zay? (Henteo ka tihoe “Lilim-pitsaràgne Nahasoa ty Mpitory i Fanjakagney.”)

³⁴ Mahagaga tihoe nandrese avao tika, ndra tie tsy ndaty ambone sady tsy misehoseho bey aza. Tsy mifily ka tika naho fa misy fifidianagne. Sady tsy manao politike ro tsy manohagne o mpanao politikeo. Rehafe o ndatio fa tsy nianatse sady ndaty tsotra o rahalahintikagne niakatse fitsaràgneo. (Asa. 4:13) Tsy hisy tombo’e ho azo o fitsaràgneo areke naho miaro antikagne iareo naho fa manohetse antikagne ty fivavahagne hafa naho o fitondragneo. Faie mateteke o fitsaràgneo ro nagnomey rare’e antika. Porofo zay fa ‘ambane ty fihainon’Andrianagnahare eo tika sady tafaharo amy i Kristy.’ (2 Kor. 2:17) Magneke manahake i apostoly Paoly areke tika tie: “I Jehovah ro mpagnampe ahy, le tsy hatahotse raho.”​—Heb. 13:6.